ޚަބަރު
ޤާނޫނުއަސާސީއަށް ގެނެވުނު އިސްލާހުތަކުން ރައްޔިތުންނަށް ލިބޭ ބާރުތައް ރައީސް ތަފްސީލުކޮށްދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ރައްޔިތުންގެ ހައްޤުގައި ޤާނޫނުއަސާސީއަށް ސަރުކާރުން ގެންނެވި އިސްލާހުތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަފްސީލްކޮށްދެއްވައިފިއެވެ. އއ. މަތިވެރީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ ޤާނޫނުއަސާސީއަށް އެންމެފަހުން ގެންނެވި އިސްލާހުތަކުގެ ބޭނުމާއި، އެކަންކަމުން ރައްޔިތުންނަށް ލިބިގެންދާނެ ފައިދާތައް ތަފްސީލީ ގޮތެއްގައި ބަޔާންކޮށްދެއްވާފައެވެ.
ރައީސުލްޖުމްހޫރިއްޔާ ވިދާޅުވީ ޤާނޫނުއަސާސީއަށް ގެންނެވީ މައިގަނޑު 5 އިސްލާހެއްކަމަށެވެ. އެއީ:
- ދިވެހިރާއްޖޭގެ ސަރަހައްދާ ގުޅޭ އިސްލާހު
- ބޭރުގެ އެއްވެސް ފަރާތަކަށް ރާއްޖޭގެ ސަރަހައްދުތައް މިލްކޮށްދިނުމާއި އަސްކަރީ ބޭނުމަށް ދިނުމާ ގުޅޭ އިސްލާހު
- ރައްޔިތުންގެ މަޖިލީހުގެ މެމްބަރުންގެ ޝަރުތުތަކާ ގުޅޭ އިސްލާހު
- ޤާނޫނުއަސާސީއަށް ބަދަލު ގެނައުމުގެ ކުރިން ރައްޔިތުންގެ ހިޔާލު ހޯދުމާ ގުޅޭ އިސްލާހު
- ރައީސުލްޖުމްހޫރިއްޔާގެ މަސްޢޫލިއްޔަތުތަކާ ގުޅޭ އިސްލާހު
ރައީސް ވިދާޅުވީ މި 5 އިސްލާހަކީވެސް ރައްޔިތުންގެ އަތަށް ބާރުތައް ލިބޭގޮތަށް ގެނެސްފައިވާ އިސްލާހުތަކެއްކަމަށެވެ. މިގޮތުން، ރާއްޖޭގެ ސަރަހައްދަށް ބަދަލު ގެނެވޭނީ ރައްޔިތުންގެ ވޯޓަކާއި ރައްޔިތުންގެ މަޖިލީހުގެ 4 ބައިކުޅަ 3 ބައިގެ އަޣުލަބިއްޔަތުންކަމަށް ރައީސް ފާހަގަކުރެއްވިއެވެ.
އަދި ބޭރުގެ ސިފައިންނަށް ރާއްޖޭގައި އޮޕަރޭޓް ކުރެވޭނީ މަޖިލީހުގެ އަޣުލަބިއްޔަތުން ފާސްކޮށްގެންކަމަށާއި، ރައްޔިތުންގެ މަޖިލީހުގެ މެންބަރުންގެ ޝަރުތުތަކާ ގުޅޭ އިސްލާހަކީވެސް ރައްޔިތުންގެ އަތްމައްޗަށް ބާރު އަނބުރާ ދިނުމަށް ގެންނެވި އިސްލާހެއްކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މި އިސްލާހުތަކަކީ ޤައުމަށް ހަމަޖެހުމާއި ތަރައްޤީ ގެނެސް، ގައުމުގެ މިނިވަންކަމާއި ސިޔާދަތު ރައްކާތެރިކުރުމަށްޓަކައި ގެންނެވި އިސްލާހުތަކެއްކަމަށެވެ. އަދި އެމަނިކުފާނު އަބަދުވެސް މަސައްކަތް ކުރައްވާނީ ރައްޔިތުންގެ ފަޅީގައި ހުންނަވައިގެން ރައްޔިތުންގެ ކުރިމަގާއި ޤައުމުގެ ތަރައްޤީއަށް ކުރަންޖެހޭ ކަންކަން ކުރުމަށް ކަމަށްވެސް ވިދާޅުވިއެވެ.