ތައިލެންޑަށް ކުރިމަތިވި ފެންބޮޑުވުމުގެ ހާދިސާތަކާ ގުޅިގެން ރައީސުލްޖުމްހޫރިއްޔާ ތައުޒިޔާ ފޮނުއްވައިފި

ބޯކޮށް ވާރޭވެހި ތައިލެންޑުގައި ފެންބޮޑުވުމުގެ ސަބަބުން ހިނގި ހިތާމަވެރި ހާދިސާތަކާ ގުޅިގެން، އެ ޤައުމުގެ ބޮޑުވަޒީރު އަނުތިން ޗާންވީރަކުލްއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، ފެންބޮޑުވުމުގެ ސަބަބުން މީހުންގެ ފުރާނަ ގެއްލި، ގިނަ ބަޔަކު ގެދޮރު ދޫކޮށް ދާންޖެހި، އަދި ބޮޑެތި ގެއްލުންތަކެއް ލިބުމާ ގުޅިގެން އެކަމުގެ ފުން ހިތާމަ ފާޅުކުރައްވާފައިވެއެވެ.

ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ވަނީ ތައިލެންޑުގެ ބޮޑުވަޒީރަށާއި، ސަރުކާރަށާއި ރައްޔިތުންނަށް އިޚްލާޞްތެރި ތައުޒިޔާ އަރިސްކުރައްވާފައެވެ. ޚާއްޞަކޮށް ކަރަންޓުގައި ޖެހުމުގެ ސަބަބުންނާއި ގެނބިގެން ފުރާނަ ގެއްލުނު ފަރާތްތަކުގެ ޢާއިލާތަކަށް އެމަނިކުފާނު ވަނީ ތައުޒިޔާ ރައްދުކުރައްވާފައެވެ.

މީގެއިތުރުން، މި ހާދިސާގައި އަނިޔާވި މީހުންނަށް އަވަސް ޝިފާއަކަށް އެދިވަޑައިގެން، މިހާރު ކުރިއަށްދާ ކުއްލި އެހީތެރިކަން ފޯރުކޮށްދިނުމުގެ މަސައްކަތްތައް އެއްވެސް ހުރަހެއްނެތި ކުރިއަށްގޮސް، ހާލުގައި ޖެހިފައިވާ ފަރާތްތަކަށް އަވަސް ލުޔެއް ލިބުމަށް އުންމީދުކުރައްވާ ކަމަށްވެސް ރައީސުލްޖުމްހޫރިއްޔާގެ މެސެޖުގައި ފާހަގަކުރައްވާފައިވެއެވެ.