ފެންބޮޑުވެގެން ނޭޕާލްގެ ގިނަ ބައެއްގެ ފުރާނަ ގެއްލުމާ ގުޅިގެން ރައީސުލްޖުމްހޫރިއްޔާ ތައުޒިޔާ ވިދާޅުވެއްޖެ

ނޭޕާލަށް ބޯކޮށް ވާރޭވެހި، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން ގިނަ ބައެއްގެ ފުރާނަ ގެއްލި، ބޮޑެތި ގެއްލުންތަކެއް ލިބުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ ސޯޝަލް މީޑިއާގައި ހިއްސާކުރެއްވި މެސެޖެއްގައި ވިދާޅުވީ، ނޭޕާލަށް ކުރިމަތިވި މި ހިތާމަވެރި ކާރިސާގައި ގިނަ ބައެއްގެ ފުރާނަ ގެއްލި، އެ ގައުމުގެ ރައްޔިތުންނަށް ދިމާވި ދަތި އުނދަގޫ ހާލަތުގެ ޚަބަރު އެއްސެވީ ފުން ހިތާމައާއެކު ކަމަށެވެ.

މީގެއިތުރުން، މި ހާދިސާގައި ފުރާނަ ގެއްލުނު ފަރާތްތަކުގެ އާއިލާތަކަށާއި، ވީނުވީއެއް ނޭނގި ގެއްލިފައިވާ މީހުންގެ އާއިލާތަކުގެ އިތުރުން، މި ކާރިސާގެ އަސަރުކުރި އެންމެހާ ފަރާތްތަކަށް ރައީސުލްޖުމްހޫރިއްޔާ ވަނީ ހަމްދަރުދީ ފާޅުކުރައްވާފައެވެ.

Saddened by the loss of lives and hardships caused by the recent floods and landslides in Nepal following heavy rainfall.

My thoughts are with the families who have lost their loved ones, and who remain missing, and all affected communities. The #Maldives stands in solidarity…

— Dr Mohamed Muizzu (@MMuizzu) September 28, 2026

ރައީސްގެ މެސެޖުގައި އިތުރަށް ވިދާޅުވީ، މި ދަތި ދަނޑިވަޅުގައި ދިވެހިރާއްޖެ އޮތީ ނޭޕާލްގެ ރައްޔިތުންނާ އެކުގައި ކަމަށެވެ. އަދި މި ހާދިސާގެ އަސަރުކުރި އެންމެހާ ފަރާތްތަކަށް ރައްކާތެރިކަމާއި، ކެތްތެރިކަން މިންވަރުކުރައްވައި، ލިބުނު ގެއްލުންތަކުން އަވަސް ޝިފާއެއް ލިބުމަށް އެދިވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.

ނޭޕާލަށް ކުރި ވިއްސާރައިގައި ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން އެތައް ބަޔަކު މަރުވެ، ބޮޑެތި ގެއްލުންތަކެއް ވަނީ ލިބިފައެވެ. ސަލާމަތްކުރާ ފަރާތްތަކުން އަދިވެސް ދަނީ ގެއްލިފައިވާ މީހުން ހޯދުމުގެ މަސައްކަތް ކުރަމުންނެވެ.