Ads by Exprox

ޚަބަރު

ހުރާގެ ޞިއްޙީ މަރުކަޒުން ސްކޭންގެ ޚިދުމަތް ލިބުމަށް އެރަށުގެ ރައްޔިތުން އެދޭ: ހުރާ ކައުންސިލް

ހުރާގެ ޞިއްޙީ މަރުކަޒުން ސްކޭންގެ ޚިދުމަތް ލިބުމަށް އެރަށުގެ ރައްޔިތުން އެދޭ: ހުރާ ކައުންސިލް

ކ.ހުރާ ކައުންސިލާއި ރައީސް ޑރ މުޙައްމަދު މުޢިއްޒު ބައްދަލުކުރެއްވުން. ފޮޓޯ: ރައީސް އޮފީސް

ޙަސްނާ އަޙްމަދް

ޙަސްނާ އަޙްމަދް

09 ޑިސެމްބަރު 2024، 06:21

09 ޑިސެމްބަރު 2024، 06:21

ހުލާސާ


ހުރާގެ ޞިއްޙީ މަރިުކަޒުން ސްކޭންގެ ޚިދުމަތް ލިބުމަށް އެރަށުގެ ރައްޔިތުން އެދޭ ކަމަށް ހުރާ ކައުންސިލުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަރިހުގައި ދަންނަވައިފިއެވެ.

ރައީސް ކ.އަތޮޅަށް ކުރައްވާ ދަތުރުފުޅުގެ ތެރެއިން މިއަދު އެއަތޮޅު ހުރައަށް ވަޑައިގެން އެރަށުގެ ކައުންސިލާއި އެރަށުގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ވަނީ ބައްދަލުކުރައްވައިފައެެވެ.

މިބައްދަލުވުމުގައި ހުރާ ކައުންސިލުން ވަނީ ރާއްޖެއަށް ކުރިމަތިވެފައިވާ ޑޮލަރުގެ ދަތިކަން ނައްތާލުމަށް ރައީސް ޑރ މުޢިއްޒު އެޅުއްވި ފިޔަވަޅުތަކަށް ތަޢުރީފުކޮށްފައިވެއެވެ. އަދި އެފަދަ ކަންކަމަކީ " ކޮންމެ ކޮންމެ ފަރާތަކަށް ކުރަން ކެރޭނެކަމެއް ނޫން" ކަން އެކައުންސިލުން ވަނީ ފާހަގަކުރައްވައިފައެވެ. 

 ހުރާގެ ރައްޔިތުންނަށް އެންމެ ދަތިވެފައިވާ އޭޓީއެމްގެ މައްސަލައަށް ސަރުކާރުން ހައްލު ހޯއްދަވައިދެއްވިކަމަށްޓަކައި ހުރާ ކައުންސިލުން ވަނީ ރައީސް ޑރ މުޢިއްޒަށް ޝުކުރުއަދާކުރައްވައިފައެެވެ.

 ހަމައެއާއެކު ރަށުގެ ބަނދަރުގެ މަސައްކަތް ބާރު ސްޕީޑުގައި ކުރިއަށްދާތީވެސް ކައުންސިލުން ޝުކުރުއަދާކުރެއްވިއެވެ. މީގެ އިތުރުންވެސް ހުރާގެ ރައްޔިތުން ބޭނުންވާ ގޮތަށް ބިން ހިއްކުމުގެ މަޝްރޫޢު ކުރިއަށް ގެންދެވީތީވެސް ހުރާ ކައުންސިލުން ރައީސް މުއިއްޒަށް އެކައުންސިލުން ޝުކުރުއަދާކުރެއްވިއެވެ.

މިއަދުގެ ބައްދަލުކުރެއްވުމުގައި ކައުންސިލުން ވަނީ އެރަށު ޞިއްޙީ މަރުކަޒުން ސްކޭންގެ ޚިދުމަތް ލިބުމަށް ރައްޔިތުން އެދިވަޑައިގަންނަވާކަން ފާހަގަކުރައްވާފައިވެއެވެ. އަދި އަތޮޅުތަކުގެ ރަށްތަކަށް ގޯލްޑް ކަޕް މުބާރާތް ކުޅެވޭނެގޮތް ހައްދަވައިދެއްވުމަށްވެސް ކައުންސިލުން ވަނީ އެދިފައެވެ. މީގެއިތުރުން ރަށުގެ ސުކޫުލްގައި ތަރައްޤީކުރުމަށް ބޭނުންވާ ކަންކަންވެސް ކައުންސިލުން ވަނީ ފާހަގަކޮށްފައެެވެ.

ހުރާ އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ އެކޮމިޓީއަށް ދިމާވެފައިވާ ބަޖެޓުގެ ދަތިކަން ފާހަގަކުރައްވާފައެވެ. އަދި އެކި ރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް ބައްދަލުވެލައި، އެއްބަޔަކު އަނެއް ބަޔެއްގެ މަސައްކަތްތައް ޙިއްޞާކުރެވޭނެ ފުރުޞަތުތައް ފަހިކޮށްދެއްވުމަށް އެދިވަޑައިގެންފައިވެއެވެ.

މި ބައްދަލުކުރެއްވުމުގައި ރައީސް ޑރ މުޢިއްޒު ވަނީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ. އަދި އެމަނިކުފާނު ވަނީ ކައުންސިލުން ވިދާޅުވި ކަންކަމަށް ރަނގަޅު ހައްލެއް ގެނެސްދެއްވުމަށް މަސައްކަތް ކުރައްވާނެކަމުގައި ވިދާޅުވެފައެވެ.

 މި ބައްދަލުކުރެއްވުން ކުރިއަށްދިޔައީ މިއަދު މެންދުރުފަހު ހުރާ ކައުންސިލް އިދާރާގައެވެ. 

 

މި ލިޔުން ކިޔާލުމުން

Ads by MSS