ދިއްފުށީ ސްކޫލުން އޭލެވެލް ފެންވަރަށް ކިޔެވޭނެ އިންތިޒާމު ހަމަޖައްސައިދިނުމަށް އެރަށު ކައުންސިލުން އެދިއްޖެ

ކ.ދިއްފުށީ ސްކޫލުން އޭލެވެލް ފެންވަރަށް ކިޔެވޭނެ އިންތިޒާމް ހަމަޖައްސައިދިނުމަށް ދިއްފުށީ ކައުންސިލުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަރިހުގައި އެދިއްޖެއެވެ. 

ދިއްފުށީ ކައުންސިލުން ރައީސް ޑރ މުޢިއްޒުގެ އަރިހުގައި މިފަދައިން އެދިފައިވަނީ އެރަށު ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި އެކު ރައީސް މުއިއްޒާއި ބައްދަލުކުރައްވައެވެ. 

މިބައްދަލުވުމުގައި ދިއްފުށީގެ ތަރައްޤީއަށް އެންމެ ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފައިވެއެވެ.

އެގޮތުން ދިއްފުށީ ކައުންސިލުން ވަނީ ރަށުގެ ބިން ހިއްކުމާއި ގިރާ ސަރަހައްދު ހިމާޔަތްކުރުމަށް ބޭނުންވާކަން ހާމަކޮށްފައެެވެ. އަދި ރަށުގެ ސުކޫލުން އޭލެވެލް ފެންވަރަށް ކިޔެވޭނެ އިންތިޒާމު ހަމަޖައްސައިދެއްވުމަށާއި ޞިއްޙީ ނިޒާމު ހަރުދަނާ ކުރެއްވުމަށް ބޭނުންވާކަމުގައި ރައީސް ޑރ މުޢިއްޒުގެ އަރިހުގައި ދަންނަވައިފައިވެއެވެ. 

މިއަދުގެ ބައްދަލުކުރެއްވުމުގައި ދިއްފުށި އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ އެކި ޕްރޮގްރާމްތައް ހިންގުމަށް މަލްޓިޕާޕަސް ހޯލެއް ބޭނުންވާކަން ފާހަގަކުރައްވާފައެވެ.

މިބައްދަލުކުރެއްވުމުގައި ރައީސް ޑރ މުޢިއްޒުގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ މާލެއަތޮޅު ދިއްފުށީގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢޫލޫމާތުތައް ޙިއްޞާކުރައްވާފައެވެ.

މިބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ޑރ މުޢިއްޒު ވިދާޅުވީ ކައުންސިލުން ފާހަގަކުރެއްވިކަންކަން ބައްލަވާނެކަމަށެވެ. އަދި ކަމާގުޅޭ ވުޒާރާތަކާއި މަޝްވަރާކުރައްވައިގެން ހައްލުކުރެވެންހުރިކަންކަން އެގޮތަށް ކުރިއަށްގެންދިއުމަށް އެމަނިކުފާނު ބާރުއެޅުއްވިއެވެ.

މި ބައްދަލުކުރެއްވުން ކުރިއަށްދިޔައީ މިއަދު ހަވީރު ހުރާ ކައުންސިލްގެ އިދާރާގައެވެ.