ޑައުންސިންޑްރޯމް ހުރުމުން އަސާސީ ތައުލީމަށް ހުރަސްއެޅި މައްސަލައެއް ބައްލަވާނެކަމަށް ވިދާޅުވެއްޖެ

ޑައުންސިންޑްރޯމް ހުރުމުގެ ސަބަބުން ކުއްޖަކަށް އަސާސީ ތައުލީމު ހޯދުމަށް ހުރަސްއެޅުނު މައްސަލަ ބައްލަވައި، އެފަދަ ކުދިންނަށް ތައުލީމީ ނިޒާމުގެ ތެރެއިން ހަމަހަމަ ފުރުސަތު ފަހިކޮށްދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.

ރައީސުލްޖުމްހޫރިއްޔާ މި ޔަގީންކަން ދެއްވީ، އެ މަނިކުފާނާ ބައްދަލުކުރަން އެދޭ އާންމު ރައްޔިތުންނާ ވަކިވަކިން ބައްދަލުކުރެއްވުމަށް ފަށްޓަވާފައިވާ "ރައްޔިތުންގެ އަޑު" ސިލްސިލާގެ ތެރެއިން، ޑައުންސިންޑްރޯމް ހުންނަ ކުއްޖެއްގެ ބެލެނިވެރިއަކު ހިއްސާކުރި ޝަކުވާތަކާއި ކަންބޮޑުވުންތަކާ ގުޅިގެންނެވެ.

މި ބައްދަލުވުމުގައި ބައިގަޑިއެއްހާއިރު ވަންދެން ކުއްޖާގެ ބެލެނިވެރިޔާ ވަނީ އޭނާ ތަހައްމަލުކުރަން ޖެހިފައިވާ ގިނަ ދަތިތަކެއް ރައީސްއާ ހިއްސާކޮށްފައެވެ. އެގޮތުން އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރީ ތައުލީމީ ނިޒާމުގައި ހާއްސަ އެހީއަށް ބޭނުންވާ ކުދިންނަށް ހަމަހަމަ ފުރުސަތު ނެތުމުގެ މައްސަލައެވެ. ބެލެނިވެރިޔާ ބުނި ގޮތުގައި އޭނާގެ ދަރިފުޅަކީ ޑައުންސިންޑްރޯމް ހުންނަ ކުއްޖަކަށް ވުމުން، މާލޭގެ ފަސް ސްކޫލަކުން އެ ކުއްޖާއަށް ޖާގަ ދިނުމަށް ވަނީ ދެކޮޅު ހަދައިފައެވެ.

މީގެއިތުރުން، އެފަދަ ކުދިންނަށް ބޭނުންވާ ތެރަޕީތައް ހޯދުމުގައި ހުރި ދަތިތަކާއި، އާއިލާއަށް ދިމާވެފައިވާ ބޯހިޔާވަހިކަމުގެ ދަތިކަން ވެސް ބެލެނިވެރިޔާ ވަނީ ރައީސުލްޖުމްހޫރިއްޔާގެ ސަމާލުކަމަށް ގެނެސްފައެވެ.

މި ކަންބޮޑުވުންތައް އެއްސެވުމަށްފަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ފާހަގަކުރެވުނު ހުރިހާ މައްސަލަތަކަށް ސަރުކާރުން ހައްލު ހޯއްދަވައިދެއްވާނެ ކަމަށެވެ. ހާއްސަކޮށް، ސްކޫލްތަކުން ޖާގަ ނުލިބުނު މައްސަލަ ވަގުތުން ބައްލަވައި، ތައުލީމީ ނިޒާމުގެ ތެރޭގައި ހުރި އެފަދަ ހުރަސްތައް ނައްތާލުމަށް އަޅަންޖެހޭ ފިޔަވަޅުތައް އަޅުއްވާނެ ކަމުގެ ފުރިހަމަ ޔަގީންކަން އެމަނިކުފާނު ދެއްވިއެވެ. އަދި ތެރަޕީއާއި ބޯހިޔާވަހިކަމާ ގުޅޭގޮތުން ހުށަހެޅި ކަންކަމުގައިވެސް އެހީތެރިކަން ފޯރުކޮށްދެއްވާނެ ކަމަށް ރައީސް ވިދާޅުވިއެވެ.