ޓީޗަރުންނަށް އެއްބާރުލުން ދިނުމަކީ ޤައުމުގެ ބިންގާ ވަރުގަދަ ކުރުން: ރައީސް ޑރ. މުޢިއްޒު

ޓީޗަރުންނަށް ބޭނުންވާ އެއްބާރުލުމާއި އެހީތެރިކަން ފޯރުކޮށްދިނުމަކީ، ދަރިވަރުންނާއި މުޅި ޤައުމު ބިނާވެގެންދާނެ އަސާސީ ބިންގާ ވަރުގަދަ ކުރުން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ބައިނަލްއަޤްވާމީ ގޮތުން ފާހަގަކުރާ ޓީޗަރުންގެ ދުވަހުގެ މުނާސަބަތުގައި ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ހަލުވިކަމާއެކު ބަދަލުވަމުން އަންނަ ދުނިޔެއަކަށް ޒުވާނުން އަހުލުވެރިކުރުވުމުގައި ކޮންމެ ތަނެއްގައިވެސް ޓީޗަރުން މުހިންމު ދައުރެއް އަދާކުރަމުންދާ ކަމަށެވެ. އެގޮތުން ޓީޗަރުންގެ އިލްމާއި، ކެރުމާއި، އަދި ޅަދަރިންގެ ސިކުނޑިތަކަށް އެ ފަރާތްތަކުން ކުރާ ދެމިގެންވާ އަސަރުގެ އަގު ވަޒަންކުރައްވާ ކަމަށް އެމަނިކުފާނު ވިދާޅުވިއެވެ.

ޓީޗަރުން އެމީހުންގެ މުހިންމު ޒިންމާތައް ފުރިހަމައަށް އަދާކުރުމަށް ބޭނުންވާ އެހީތެރިކަމާއި އެކަށީގެންވާ މާޙައުލެއް ޤާއިމުކޮށްދިނުމަކީ ދައުލަތުގެ ޒިންމާއެއްކަން ރައީސް ފާހަގަކުރެއްވިއެވެ. މިގޮތުން، ޓީޗަރުންގެ ދުޅަހެޔޮކަމަށް އިސްކަންދިނުމަށާއި، މަސައްކަތުގެ ބުރަ ކުޑަކުރުމަށާއި، ވަޒީފާ އަދާކުރާ މާޙައުލު ރަނގަޅުކުރުމަށް މި ސަރުކާރުން އިސްކަންދޭނެ ކަމުގެ ޔަޤީންކަން ރައީސް ދެއްވިއެވެ.

މީގެ އިތުރުން ޝާމިލުކޮށްގެން ކިޔަވައިދިނުން ހަރުދަނާކުރުމަށާއި، ޚާއްޞަ އެހީއަށް ބޭނުންވާ ކުދިންނަށް އެހީތެރިކަން ފޯރުކޮށްދިނުމަށްޓަކައި ޓީޗަރުންގެ ޤާބިލުކަން އިތުރުކުރުމަކީވެސް ސަރުކާރުން ޚާއްޞަ އިސްކަމެއް ދީގެން ކުރަމުން އަންނަ މަސައްކަތްތަކެއް ކަމުގައި ރައީސް ޑރ. މުޢިއްޒު ވިދާޅުވިއެވެ.

 "އަޅުގަނޑުމެން ޓީޗަރުންނަށް އެހީތެރިކަން ދޭއިރު، އަޅުގަނޑުމެންގެ ދަރިންނާއި ޤައުމު ބިނާވެގެންދާނެ ބިންގާ އެ ވަރުގަދަކުރެވެނީ" ރައީސް ޑރ މުޢިއްޒުގެ ޕޯސްޓުގައި ވިދާޅުވެފައިވެއެވެ.

 އުނގަންނައިދިނުމުގެ ދާއިރާއަށް އަގުދީ، އެ ދާއިރާއަށް އިންވެސްޓްކޮށް، ކޮންމެ ކުއްޖެއްގެ ކިބައިގައިވާ ފުރިހަމަ ޤާބިލުކަން ނެރެދިނުމަށްޓަކައި ކޮންމެ ޓީޗަރަކަށް ބޭނުންވާ އެހީތެރިކަން ފޯރުކޮށްދޭ ތަޢުލީމީ ނިޒާމެއް ބިނާކުރުމުގައި ދެމިތިބުމަށް އެމަނިކުފާނު ވަނީ ގޮވާލައްވާފައެވެ.

Teachers everywhere are helping young people navigate a rapidly changing world. On World Teachers’ Day, we honour their knowledge, dedication and the lasting influence they have on our young minds, and express our heartfelt gratitude for their service, sacrifice and commitment for the future of our nation. Our responsibility is to ensure that teachers have the support and conditions they need to perform their vital role effectively. This administration is committed to prioritising teacher wellbeing, reducing excessive workloads, improving working conditions, strengthening inclusive education, and expanding teacher capacity to support children with disabilities. When we support our teachers, we strengthen the foundation on which our children and our nation will grow. Let us continue to value the teaching profession, invest in our educators, and build an education system where every teacher has the support they need to help every child reach their full potential.

— Dr Mohamed Muizzu (@MMuizzu) October 5, 2026