މަސްވެރިންގެ ހިއްމަތުގެ އަގު ވަޒަންކުރުމަކީ ޤައުމީ ވާޖިބެއް:ރައީސް މުޢިއްޒު

މަސްވެރިން ކުރާ ހިއްމަތުގެ އަގު އިޙްތިރާމާއެކު ވަޒަންކުރުމަކީ ޤައުމީ ވާޖިބެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ މަސްވެރިންގެ ދުވަހާ ގުޅުވައިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ރައީސް މުޢިއްޒުގެ ޕޯސްޓުގައި ވިދާޅުވެފައިވަނީ ވާރޭއާއި އަވީގައި ރެއާއި ދުވާލު ބިޔަ ކަނޑުތަކުގައި ދިވެހި މަސްވެރިން ކުރާ ހިއްމަތުގެ އަގު އިޙްތިރާމާއެކު ވަޒަންކުރުމަކީ ޤައުމީ ވާޖިބެއް ކަމަށެވެ. އަދި މަސްވެރިންގެ ދުވަހުގެ ތަޙުނިޔާވެސް އެމަނިކުފާނު ވަނީ އަރިސްކުރައްވާފައެވެ.

މަސްވެރިންގެ ދުވަސް ފާހަގަކުރަމުންދާއިރު، މަސްވެރިންގެ ކަންބޮޑުވުންތައް ހައްލުކޮށް މަސްވެރިކަމުގެ ސިނާއަތް އިތުރަށް ތަރައްގީ ކުރުމަށް ސަރުކާރުން ގިނަ މަސައްކަތްތަކެއް ކުރަމުންދާކަން ރައީސް ފާހަގަކުރެއްވިއެވެ. އެގޮތުން، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް މަސްވެރިންނަށް މަސްކިރުވާތާ 48 ގަޑިއިރު ތެރޭގައި ފައިސާ ލިބޭނެ އިންތިޒާމް މިހާރު ވަނީ ހަމަޖައްސާފައިވާ ކަމަށް ވިދާޅުވިއެވެ.

މީގެއިތުރުން، ރާއްޖޭގެ ކޮންމެ އަތޮޅަކުން އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސުމަށް، "ފިއުލް ސްޓޯރޭޖްތައް" ގާއިމްކުރުމުގެ މަޝްރޫޢެއް މިދިޔަ މަހު ސަރުކާރުން ފަށާފައިވާކަމަށާއި، މި މަޝްރޫޢުގެ ދަށުން ރާއްޖޭގެ ހަތަރު ސަރަޙައްދެއްގެ ހަތަރު ރަށަކުން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމު ހަމަޖައްސާފައިވާކަންވެސް ރައީސް ފާހަގަކުރެއްވިއެވެ.

ރައީސް މުޢިއްޒު އިތުރަށް ވިދާޅުވީ، މަސްވެރިކަމުގައި ސަރުކާރުގެ ކޮންޓްރޯލް ދޫކޮށްލައްވައި ހުރިހާ ބާރެއް މަސްވެރިންނަށް ދެއްވާނެ ކަމަށެވެ. އެގޮތުން ކައުންސިލްތަކުން ބޭނުންވާނަމަ އައިސްޕްލާންޓުތައް ހިންގުމުގެ ފުރުސަތު ސަރުކާރުން ދެއްވާނެ ކަމަށްވެސް އެމަނިކުފާނު ވިދާޅުވިއެވެ.

ރާއްޖޭގައި ކޮންމެ އަހަރަކުވެސް މަސްވެރިންގެ ދުވަސް ފާހަގަކުރަނީ ޑިސެމްބަރު މަހުގެ 10 ވަނަ ދުވަހުއެވެ.