ޚަބަރު
ތިން ވުޒާރާގެ މަސައްކަތް ދަރުބާރުގެއަށް ބަދަލުކުރުމުގެ ތައްޔާރީތައް ރައީސް ބައްލަވާލައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދަރުބާރުގޭގައި ފޮޓޯ:ރައީސް އޮފީސް
އަލިފާނުގެ ހާދިސާއިން ގެއްލުން ލިބުނު ތިން ވުޒާރާގެ މަސައްކަތްތައް ވަގުތީގޮތުން ދަރުބާރުގެއަށް ބަދަލުކޮށް ޚިދުމަތް ދިނުމަށް ވަމުންދާ ތައްޔާރީތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭގެ ވަގުތެއްގައި ބައްލަވާލައްވައި، އެކަމަށް ބޭނުންވާ އިރުޝާދުތައް ދެއްވައިފިއެވެ.
ބުރާސްފަތި ދުވަހު ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ ހިންގާ އިމާރާތުގައި ހިނގި އަލިފާނުގެ ހާދިސާގައި އެ ވުޒާރާއާއި އިމާރާތްކުރުމާއި ބިނާރާބެހޭ ވުޒާރާ ވަނީ ބޭނުންނުކުރެވޭ ވަރަށް އަނދާފައެވެ. އަދި އިންވެގެން ހުންނަ ގްރީން ބިލްޑިންގައި ހިންގަމުން އަންނަ މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއަށްވެސް ވަނީ އަލިފާނުގެ އަސަރުކޮށްފައެވެ.
މި ހާދިސާގެ ސަބަބުން ތިން ވުޒާރާގެ މަސައްކަތްތައް ހުއްޓިފައިވާތީ، އެ މަސައްކަތްތައް އަލުން ފެށުމަށްޓަކައި ދަރުބާރުގެއަށް ބަދަލުކުރުމުގެ މަސައްކަތް ސަރުކާރުން ވަނީ ފަށާފައެވެ. މި މަސައްކަތްތައް ކުރިއަށްދާގޮތް ބެއްލެވުމަށް ރައީސުލްޖުމްހޫރިއްޔާ ވަނީ ރޭ ދަރުބާރުގެއަށް ވަޑައިގެން، އެތަނުގައި ހަމަޖައްސަމުންދާ އިންތިޒާމުތައް ބައްލަވާލައްވާފައެވެ. އަދި އެކަމުގައި ޢަމަލުކުރަންވީ ގޮތްތަކާ ގުޅޭ އިރުޝާދުތައް ވުޒާރާތަކަށް ދެއްވާފައިވެއެވެ.
ގެދޮރުވެރިކަމާބެހޭ ވަޒީރު ޑރ. އަލީ ހައިދަރު އަހުމަދު ވިދާޅުވެފައިވާ ގޮތުގައި، އާދީއްތަ ދުވަހު އަލުން މަސައްކަތް ފެށޭނެއެވެ. އަލިފާނުގެ ހާދިސާގައި ގެއްލުން ލިބުނު އެހެން ދެ ވުޒާރާގެ މަސައްކަތްތައްވެސް ވަގުތީގޮތުން ދަރުބާރުގެއަށް ބަދަލުކުރުމުގެ މަސައްކަތް ދަނީ ކުރެވެމުންނެވެ.