Ads by Exprox

ޚަބަރު

މަންދޫ ގައި އޭޓީއެމްގެ ޚިދުމަތް ގާއިމް ކޮށްދިނުމަށް އެދިއްޖެ

މަންދޫ ގައި އޭޓީއެމްގެ ޚިދުމަތް ގާއިމް ކޮށްދިނުމަށް އެދިއްޖެ

ރައީސް ޑރ މުޢިއްޒު މަންދޫ ކައުންސިލާއި ބައްދަލުކުރެއްވެވުން. ފޮޓޯ: ރައީސް އޮފީސް

ޙަސްނާ އަޙްމަދް

ޙަސްނާ އަޙްމަދް

14 ޑިސެމްބަރު 2024، 09:18

14 ޑިސެމްބަރު 2024، 09:18

އދ.މަންދޫގައި އޭޓީއެމްގެ ޚިދުމަތް ގާއިމް ކޮށްދިނުމަށް އެރަށު ކައުންސިލުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަރިހުގައި އެދިއްޖެއެވެ.

މަންދޫ ކައުންސިލުން މިފަދައިން ރައީސް މުޢިއްޒުގެ އަރިހުން އެދިފައިވަނީ އެމަނިކުފާނު މިހާރު އދ.އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅުގެ ދަނގެއްޗަށް ވަޑައިގެން މަންދޫ ކައުންސިލާއި އެރަށުގެ އަންހެނުންގެ ތަރައްްޤީއަށް މަސައްކަތް ކުރާ ކޮމިޓީއާއި އެކު ބޭއްވެވި ބައްދަލުވުމުގައެވެ. 

މިބައްދަލުކުރެއްވުމުގައި މަންދޫ ކައުންސިލުން ވަނީ ފާއިތުވި އަހަރުތަކުގައި އެރަށުގައި ތަރައްޤީގެ މަޝްރޫޢުތައް ހިންގިފައިވާ މިންވަރު މަދުކަން ފާހަގަކޮށްފައެެވެ. އަދި މިސަރުކާރުގައި އެކަން އެހެން ވެގެން ދިޔަ ނުދިނުމަށް އެދިފައިވެއެވެ. 

މީގެއިތުރުން ރަށަށް އެންމެ ބޭނުންވާ ކަންކަން ފާހަގަކުރައްވައި ވާހަކަފުޅު ދައްކަވަމުން ކައުންސިލުން ވަނީ ރަށުގެ ސުކޫލަށް އިތުރު ކްލާސް ރޫމް ބޭނުންވާ ކަން ފާހަގަ ކުރައްވައިފައެވެ. ހަމަމިއާއި އެކު  ޞިއްޙީ މަރުކަޒުގެ ޚިދުމަތް އިތުރަށް ތަރައްޤީކުރުމަށް ބޭނުންވާކަމަށާއި، ބަނދަރު ރައްޔިތުން ބޭނުންވާ ގޮތަށް ތަރައްޤީކޮށްދެއްވުމަށާއި، އޭޓީއެމްގެ ޚިދުމަތް ރަށުން ލިބުމަށް ބޭނުންވާކަން މަންދޫ ކައުންސިލުން ވަނީ ފާހަގަކޮށްފައެވެ.

ރަށުން މާލެއަށް ފަސޭހަކަމާއެކު ދެވޭނެ އިންތިޒާމެއް ހަމަޖައްސަވައިދެއްވުމަށް ވެސް ކައުންސިލުން އެދިވަޑައިގެންފައިވެއެވެ. 

މި ބައްދަލުކުރެއްވުމުގައި ރައީސް މުޢިއްޒު ވިދާޅުވީ ވަޢުދުވެވަޑައިގެންފައިވާ ކަންކަން ކުރިއަށް ދާނެކަމަށެވެ. އަދި މުޅި ރާއްޖޭގައި އޭޓީއެމްގެ ޚިދުމަތް ތަޢާރަފުކުރުމުގެ މަޝްރޫޢު ފެށިފައިވާކަން އެމަނިކުފާނު ފާހަގަކުރައްވައިފައިވެއެވެ.

މިއަދުގެ ބައްދަލުކުރެއްވުމުގައި ރައީސްގެ  އަރިހުގައި ބައިވެރިވެވަޑައިގެންނެވި ވަޒީރުން ވަނީ މަންދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢޫލޫމާތުތައް ޙިއްޞާކުރައްވާފައެވެ. އަދި ކައުންސިލުން ފާހަގަކުރެއްވި އެކި މަޝްރޫޢުތަކުގެ އެންމެ ފަހުގެ މަޢުލޫމާތުވެސް ކަމާގުޅޭ ވަޒީރުން ޙިއްޞާކުރެއްވިއެވެ.

މި ބައްދަލުކުރެއްވުން އޮތީ މިއަދު ހަވީރު އދ. ދަނގެތި ކައުންސިލް އިދާރާގައެވެ.

މި ލިޔުން ކިޔާލުމުން

Ads by MSS