ޚަބަރު
އަންހެނުންގެ ތަރައްޤީއަށް މަސައްކަތްކުރާ ކޮމިޓީ މެންބަރުންނަށް މުސާރަ އާއި ރޯދަ އެލެވެންސް ދޭން ގާނޫނަށް އިސްލާހު ހުށަހަޅަނީ

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް މުސާރަ ލިބޭގޮތަށް ހަމަޖައްސައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވައިފިއެވެ.
އދ. ދަނގެތީގައި ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ގެންނަ އިޞްލާހުތަކާއެކު، މިއަންނަ ރަމަޟާންމަހުން ފެށިގެން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް މުސާރަ ލިބޭގޮތަށް ހަމަޖައްސައިދެއްވާނެ ކަމަށެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަކީ ރަށުގެ ތަރައްގީއަށް ވަރަށް މުހިންމު ދައުރެއް އަދާކުރާ ކޮމިޓީތަކެއް. އެހެންވީމަ ކޮމިޓީ މެންބަރުންގެ ވަރަށް ގިނަ ކަންތައްތަކެއް ހައްލުކޮށްދޭނަމޭ އަޅުގަނޑު ބުނިން ގާނޫނު ހަދާ މަޖިލީހުގެ ތެރެއިން
ރައީސް ޑރ.މުޢިއްޒު
މިހާރު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުކަމަކީ ދާއިމީ މަޤާމަކަށް ނުވުމުން، އެ މެންބަރުންނަށް ލިބެނީ އެލަވަންސެއް ކަމަށާއި، މިކަމުގެ ސަބަބުން ލޯނު ނެގުމަށާއި، އެނޫންވެސް ސަރުކާރުގެ ފެސިލިޓީތަކުން އެފަރާތްތަކަށް ޖާގައެއް ނުލިބޭކަން ރައީސް ފާހަގަކުރެއްވިއެވެ. އަދި މިއީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ ކަންބޮޑުވުމެއްކަމަށްވެސް ވިދާޅުވިއެވެ.
ތިބޭފުޅުންނަށް ލޯންތަކަށް ލެއްވުން، އެކި ތަންތަނުން ދޫކުރާ ފެސިލިޓީތަކަށް ފުރުޞަތު ލިބިގެންދިއުން. މިކަންކަން މިހާރު ނުވޭ. އެހެންވީމަ ލާމަރުކަޒީ ޤާނޫނަށް ގެންނަންޖެހޭ އިޞްލާހެއް އެބައޮތް. އަދި ވަޒީފާއާ ބެހޭ ޤާނޫނަށްވެސް އިޞްލާހެއް ގެންނަން އެބައޮތް. އެކަމަށް ދިރާސާކުރަން ވަގުތުކޮޅެއް ނެގީ. ދެން މަޖިލިސް ހުޅުވޭއިރު އިރާދަކުރެއްވިއްޔާ މި އިޞްލާހުތައް ހުށައަޅާދޭނަން ފެބުރުއަރީ މަހު ކުރީކޮޅު. އަދި އެ އިޞްލާހުތައް ގެނެސް މިއަންނަ ރަމަޟާންމަހުން ފެށިގެން ކޮންމެ ރަމަޟާންމަހަކު ޑަބްލިއުޑީސީގެ މެންބަރުންނަށް ރޯދަމަހުގެ އެލަވެންސް ދޭނެކަމުގެ ޔަޤީންކަން އަޅުގަނޑު ދެން
ރައީސް ޑރ. މުޢިއްޒު
ރައީސް ޑރ. މުޢިއްޒު ވިދާޅުވީ، ރައްޔިތުންގެ މަޖިލީހުގެ ކުރިއަށްއޮތް ދައުރުގެ ތެރޭގައި ސަރުކާރުގެ ފަރާތުން އެކަމަށް ބޭނުންވާ އިސްލާހުތައް ހުށައަޅުއްވާނެ ކަމަށެވެ. މި އިސްލާހުތަކާއެކު، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް ރަމަޟާންމަހުގެ އެލަވަންސާއި، ވިހެއުމުން ލިބޭ ޗުއްޓީ ލިބޭނެ ކަމަށާއި، އެބޭފުޅުންގެ މުސާރައަކީ ބޭންކުތަކުން ޤަބޫލުކުރާ އެއްޗެއްކަމަށް ވެގެންދާނެކަމަށްވެސް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، މި އިސްލާހުތައް ފެބްރުއަރީ މަހުގެ ކުރީކޮޅު ހުށަހަޅުއްވާނެ ކަމަށާއި، މިއަންނަ ރަމަޟާންމަހުން ފެށިގެން ކޮންމެ ރަމަޟާންމަހަކު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް ރޯދަމަހުގެ އެލަވަންސް ދެއްވާނެ ކަމަށެވެ.
މި ބަދަލުތައް ގެންނަނީ ރައްޔިތުންނަށް ލިބޭ އެއްޗެއް އަތުނުލައި ރައްޔިތުންނަށް މުއްސަނދިކަން ގެނެސްދިނުމަށް ކަމަށާއި، ރާއްޖެ ބަނގުރޫޓުވިޔަ ނުދީ މިކަން ކުރަނީ ފައިސާ ޗާޕުނުކޮށް ކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.