ޚަބަރު
ދަނގެތީގައި ރައްކާތެރި ނަރުދަމާ ނިޒާމުގެ ޚިދުމަތް ރައީސް ފައްޓަވައިދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
އަރިއަތޮޅު ދެކުނުބުރީ ދަނގެތީގައި ޤާއިމްކުރެވުނު ނަރުދަމާ ނިޒާމުގެ މަސައްކަތް ނިމި، އެ ޚިދުމަތް ރަސްމީކޮށް ފަށައިފިއެވެ. މި ޚިދުމަތް ރަސްމީކޮށް ފަށްޓަވައިދެއްވީ އެ ރަށުގައި ބޭއްވުނު ޚާއްޞަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ދަނގެތީގައި ޤާއިމްކުރެވުނު މި ނަރުދަމާ ނިޒާމަކީ އެގްޒިމް ބޭންކް އޮފް އިންޑިއާގެ ލައިން އޮފް ކްރެޑިޓްގެ ދަށުން 34 ރަށެއްގައި ފެނާއި ނަރުދަމާގެ ނިޒާމް ޤާއިމުކުރުމުގެ މަޝްރޫޢުގެ ބައެކެވެ. މި މަޝްރޫޢު ވަނީ ޢިމާރާތްކުރުމާއި ބިނާކުރުމާބެހޭ ވުޒާރާއިން ކަލްޕަތުރު ޕްރޮޖެކްޓްސް އިންޓަރނޭޝަނަލް ލިމިޓެޑާ ޙަވާލުކޮށްގެން ނިންމާފައެވެ.

އަރިއަތޮޅު ދެކުނުބުރީ ދަނގެތީގައި ޤާއިމްކުރި ނަރުދަމާގެ ނިޒާމުގެ މަސައްކަތް ނިންމާ ޚިދުމަތް ފަށައިފި
1140 މީހުންގެ އާބާދީއެއް އޮތް ދަނގެއްޗަކީ ލޯކަލް ޓޫރިޒަމް ކުރިއަރާފައިވާ ރަށެކެވެ. މިހާތަނަށް ރަށުގެ ރައްޔިތުންނަށް ދިމާވެފައިވާ އެންމެ ބޮޑު އެއް ދަތިކަމަކީ ރައްކާތެރި ނަރުދަމާ ނިޒާމެއް ނެތުމެވެ. ނަމަވެސް މި އައު ނިޒާމާއެކު ރަށުގެ ރައްޔިތުންނަށް ވަނީ ބޮޑު ލުޔެއް ލިބިފައެވެ.
ދަނގެތީ ކައުންސިލުން ފާހަގަކުރައްވާ ގޮތުގައި މި ނިޒާމަކީ ރަށުގެ އިޤްތިޞާދީ ހަރަކާތްތައް ހިންގުމަށްވެސް ލިބުނު ބޮޑު ކުރިއެރުމެކެވެ. މިހާރުވެސް ދަނގެތީގައި 18 ގެސްޓްހައުސް ހިންގަމުންދާއިރު، އެއީ ޖުމްލަ 280 ޓޫރިސްޓު އެނދާ އެކުގައެވެ.
މި އައު ނަރުދަމާ ނިޒާމާއެކު، ކުރިން ގޭގޭގައި ޖަންކްޝަން ހަދައިގެން ބޭނުންކުރަމުން އައި ނިޒާމުގެ ބަދަލުގައި ރައްކާތެރި ނިޒާމެއް ދަނގެއްޗަށް ވަނީ ކަށަވަރުވެފައެވެ. މީގެ ސަބަބުން ރަށުގެ އިޤްތިޞާދީ ހަރަކާތްތައް އިތުރަށް ފުޅާވެ، ރައްޔިތުންނަށް އިތުރު ލުއިފަސޭހަކަމެއް ލިބިގެންދާނެ ކަމަށް ބެލެވެއެވެ.