ޚަބަރު
ދަނގެތީގެ ބަނދަރު ތަރައްޤީކުރުމުގެ މަސައްކަތް އަންނަ އަހަރު ފަށްޓަވާނެކަމަށް ރައީސް މުޢިއްޒު ވިދާޅުވެއްޖެ

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
އަރިއަތޮޅު ދެކުނުބުރީ ދަނގެތީގެ ރައްޔިތުންނަށް މިވަގުތު ދިމާވެފައިވާ އެންމެ ބޮޑު އެއް މައްސަލައަކީ ބަނދަރުގެ ދަތިކަންކަމަށާއި، ރައްޔިތުން އެދޭގޮތަށް ބަނދަރު ތަރައްޤީކުރުމުގެ ޢަމަލީ މަސައްކަތް މި ފެށޭ އަހަރު ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ދަނގެތީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދަނގެތި ކައުންސިލާއެކު ބޭއްވެވި ބައްދަލުކުރެއްވުމުގައި ރަށަށް އެންމެ މުހިންމު ކަމެއްގެގޮތުގައި ފާހަގަކުރައްވާފައިވަނީ ބަނދަރުގެ މައްސަލަކަމަށެވެ. ބަނދަރުގެ ދަތިކަމަކީ ޒަމާންވީ ބޮޑު މައްސަލައެއްގެ ގޮތުގައި ފާހަގަކުރައްވަމުން ރައީސް ވިދާޅުވީ، ދަނގެތީގެ އިޤްތިޞާދު ކުރިއެރުމަށާއި، ރަށުގެ އިޖުތިމާޢީ، އަދި ލަފާފުރުމުގެ މައްސަލައަށް ހައްލެއް ގެނެސްދެއްވާނެކަމަށެވެ. އެގޮތުން އަންނަ އަހަރު ބަނދަރުގެ ޢަމަލީ މަސައްކަތް ފަށްޓަވައި، 2026 ވަނަ އަހަރު މަޝްރޫޢު ނިންމަވާނެކަމަށް ރައީސް ވިދާޅުވިއެވެ.
"ފެށޭ އަހަރު ދަނގެތީގެ ލޮބުވެތި ރައްޔިތުން އެދޭގޮތަށް އެހުރިހާ މައްސަލައެއް ހައްލުވާގޮތަށް ބަނދަރު ހަދައިދޭނަން." ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ ދަނގެތީގެ ބަނދަރު ތަރައްޤީކުރާނީ ދުރު މުސްތަގުބަލަށްވެސް ބޭނުންކުރެވޭނެގޮތަށްކަމަށެވެ. އަދި މި މަޝްރޫޢުއާއެކު ރަށްގިރުމުގެ މައްސަލައަށްވެސް ޙައްލު ގެނެވޭނެކަމަށް އެމަނިކުފާނު ވިދާޅުވިއެވެ.
ދަނގެއްޗަކީ ލޯކަލް ޓޫރިޒަމް ފުޅާވަމުން އަންނަ ރަށެއްކަމަށާއި، މިވަގުތު 18 ގެސްޓް ހައުސް ހިންގަމުންދާކަމަށް ރައީސް ފާހަގަކުރެއްވިއެވެ. އަދި ކުރިއަށް އޮތް ދެއަހަރު ދުވަހުގެތެރޭގައި ޓޫރިޒަމްގެ އެނދުގެ އަދަދު އެރަށުގައި 600އަށް އަރާނެކަމަށް ވިދާޅުވިއެވެ.
މީގެ އިތުރުން، ރައީސް ވަނީ އަންނަ އަހަރުގެ ފަހުކޮޅު ނުވަތަ 2026 ވަނަ އަހަރު ދަނގެތީގެ ބިން ހިއްކައި ބޯހިޔާވަހިކަމުގެ މަޝްރޫޢު ހިންގަވާނެކަމަށްވެސް ވިދާޅުވެފައެވެ. އަދި ރަށުގެ ރައްޔިތުން އެދޭގޮތަށް ސަގާފީ ސެންޓަރެއްވެސް ހިންގައި ރައްކާތެރިގޮތުގައި ކުނި ނައްތާލެވޭނެ ނިޒާމުވެސް ޤާއިމްކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.