ރައީސް މުޢިއްޒު މަހިބަދޫއަށް: ރައްޔިތުންގެ ހޫނު މަރުޙަބާއެއް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އދ. އަތޮޅަށް ކުރައްވަމުން ގެންދަވާ ދެ ދުވަހުގެ ދަތުރުފުޅުގެ ތެރެއިން މިއަދު މަހިބަދޫއަށް ވަޑައިގެންނެވުމުން ގިނަ އަދަދެއްގެ ރައްޔިތުން ހޫނު މަރުޙަބާއެއް ދަންނަވައިފިއެވެ. ރައީސް މަހިބަދޫއަށް ވަޑައިގެންނެވުމުން ގިނަ އަދަދެއްގެ ރައްޔިތުން ބަނދަރު ސަރަހައްދަށް އެއްވެ، އެމަނިކުފާނަށް މަރުޙަބާ ދެންނެވިއެވެ.

މި ދަތުރުފުޅުގައި ރައީސް މުޢިއްޒު އެންމެ ފުރަތަމަ ވަޑައިގެންނެވީ އިއްޔެ އދ. ދަނގެއްޗަށެވެ. އަދި މިއަދު މެންދުރުފަހުގެ ވަގުތެއްގައި އިމަދޫއަށް ވަޑައިގަތުމަށްވަނީ ހަމަޖެހިފައެވެ.

މަހިބަދޫގައި ރައީސުލްޖުމްހޫރިއްޔާ އެ ރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ އަދި ރައްޔިތުންނާ ބައްދަލުކުރެއްވިއެވެ. މީގެ އިތުރުން، އަރިއަތޮޅު ކައުންސިލާއި ހަންޏާމީދޫ ކައުންސިލާއި ކުނބުރުދޫ ކައުންސިލްގެ އިތުރުން އެ ރަށްތަކުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާވެސް ރައީސް ބައްދަލުކުރައްވާނެއެވެ.

މި ދަތުރުފުޅަކީ ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި، އަތޮޅުތަކާއި ރަށްތަކާއި ސިޓީތަކުގެ  ލޯކަލް ކައުންސިލުތަކާ ބައްދަލުކުރެއްވުމަށް ރައީސުލްޖުމްހޫރިއްޔާ ފަށްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރެއިން ކުރައްވާ ދަތުރުފުޅެކެވެ. މި ދަތުރުފުޅުތަކުގައި، އެރަށްރަށުގެ ރައްޔިތުންގެ ހާލުއަހުވާލު ބައްލަވައި، ރައްޔިތުން އެންމެ އެދޭ ކަންކަން އޮޅުންފިލުއްވައި، ތަރައްޤީގެ މަޝްރޫޢުތައް ތަރުތީބުކުރާނޭގޮތާމެދު މަޝްވަރާކުރައްވާނެއެވެ. މިހާތަނަށް 190 ކައުންސިލަކާ އެމަނިކުފާނު ވަނީ ބައްދަލުކުރައްވާފައެވެ.

މި ދަތުރުފުޅުގައި ރައީސް މުޢިއްޒުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވައެވެ.