ޚަބަރު
މަހިބަދޫ އާބަން ސެންޓަރަކަށް ހެދުމުގެ މަސައްކަތް ފަށާނެކަމަށް ރައީސް އިއުލާންކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
މަހިބަދޫގެ ބައެއްގެ ގޮތުގައި ކަނޑައެޅި މާފަރުފަޅާއެކު އާބަން ސެންޓަރެއްގެ ގޮތުގައި ތަރައްޤީކުރުން ހަގީގަތަކަށް ހަދައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އަރިއަތޮޅު ދެކުނުބުރީ މަހިބަދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް މުޢިއްޒު ވިދާޅުވީ، މަހިބަދޫއަށް އެމަނިކުފާނު ވެވަޑައިގެންފައިވާ ހުރިހާ ވަޢުދެއް ފުއްދަވާނެކަމުގެ ޔަޤީންކަން ދެއްވާކަމަށެވެ. އެގޮތުން އެންމެ މުހިންމުކަމެއްގެގޮތުގައި ރައީސް ފާހަގަކުރެއްވީ އދ. މާފަރުފަޅަކީ މަހިބަދޫގެ ބައެއްގެ ގޮތުގައި މިއަހަރުގެ އޭޕްރީލްމަހުގެ ތެރޭގައި ކަނޑައެޅުއްވުމެވެ.
މިހާރު މިފަށާ މަރުހަލާ، 20 އަހަރުގެ ޤައުމީ ތަރައްޤީގެ މާސްޓަރ ޕްލޭންގައިވެސް ކަންތައް ބައްޓަންވެގެންދާނީ އެގޮތަށް. އެއްވެސް ގޮތަކަށް 7 ސަރަހައްދުން ނިންމާލާކަށްނޫން. އެއީ ކޮންމެހެންވެސް ތަރައްޤީކުރަންޖެހޭ 7 ސަރަހައްދު. އެހެންވީމަ މަހިބަދޫ އާބަން ސެންޓަރަކަށް މި ކަނޑައެޅީ މިފަޅު ހިމަނައިގެން ޑިވެލޮޕްމަންޓްތަކެއް ގެނައުމަށް. ޔަޤީންކަން މިއަރުވަނީ އެގޮތަށް ކުރިއަށް ގެންދާނެކަން
ރައީސް ޑރ.މުޢިއްޒު
މީގެއިތުރުން، މަހިބަދޫގެ މިހާރުގެ ބިމުގައި 100 ހައުސިން ޔުނިޓް ތަރައްޤީކުރުމުގެ މަޝްރޫޢުގެ އަމަލީ މަސައްކަތް އަންނަ އަހަރު ފަށްޓަވައި 2025 ވަނަ އަހަރުގެ ތެރޭގައި ނިންމާނެކަމަށްވެސް ރައީސް ވިދާޅުވިއެވެ. އަދި މާފަރުފަޅު ހިއްކުމާ ހަމައަށްވެސް މިހާރުގެ ބިމުގައި ލޭންޑު ޔޫސްޕްލޭންގައި ހިމެނޭ އެހެނިހެން ކަންކަންވެސް ފުރިހަމަކޮށްދެއްވާނެކަމަށް ރައީސް ވަޢުދުވެވަޑައިގަތެވެ.
މި މަޝްރޫޢުތަކުގެ ސަބަބުން މަހިބަދޫގެ ބޯހިޔާވަހިކަމަށާއި އެ ސަރަހައްދުގެ އިޤްތިޞާދީ މަސައްކަތްތައްވެސް ފުޅާވެ ފައިދާވާނެ ހަބަކަށް މަހިބަދޫ ވާނެކަމަށްވެސް ރައީސް މުޢިއްޒު ވިދާޅުވިއެވެ. މިއީ ރާއްޖޭގެ ދެމެހެއްޓެނިވި ތަރައްޤީއަށް މުހިންމު ފިޔަވަޅެއްކަމަށް ރައީސް ފާހަގަކުރެއްވިއެވެ.