ސިޔާސީ ވާދަވެރިކަމުގެ ތެރޭގައި ރީތި އާދަތައް ގެއްލެމުންދާކަމަށް ރައީސް މުއިއްޒު ވިދާޅުވެއްޖެ

ދިވެހިންގެ ތެރޭގައި ޒަމާނުއްސުރެ ފެށިގެން ގެންގުޅޭ ރީތި އާދަތައް ރާއްޖޭގެ ސިޔާސީ ދާއިރާ ފުޅާވެގެން ދިއުމުގެ ސަބަބުން ގެއްލެމުންދާކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އދ. އަތޮޅުގެ ތިން ރަށަކަށް އިއްޔެ ފެއްޓެވި ރަސްމީ ދަތުރުފުޅުގައި މިއަދު މަހިބަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވަމުން ރައީސް މުއިއްޒު ވިދާޅުވީ ތަރައްގީއަކީ ހަމައެކަނި އުމްރާނީ ތަރައްގީ ނޫން ކަމަށެވެ. އުމްރާނީ ތަރައްގީއާ އެކު ފިކުރީ އަދި އިންސާނީ ތަރައްގީ އައުމުން ނޫނީ ގައުމަށް އަސްލު ތަރައްގީ ނާންނާނެ ކަމަށް ރައީސް ފާހަގަކުރެއްވިއެވެ.

އަޅުގަނޑުމެންގެ ތެރޭގައި ވަރަށް ބޮޑަށް ނެތިގެން އެބަދޭ، އަމުދުން މި ފަހަކަށް އައިސް ސިޔާސީ މައިދާން ފުޅާވެގެން ގޮސް ތަޣައްޔަރު ވަމުންދޭ، އޭގެ އަވާގައި ޖެހިގެން އަޅުގަނޑުމެންގެ ތެރޭގައި ހުރި ވަރަށް ގިނަ ރީތި އާދަތަަކެއް، ގަސްދުގައި ނޫނަސް އެބަ ގެއްލޭ

ރައީސް މުއިއްޒު ވިދާޅުވި އެވެ.

މުޖުތަމައުން ނެތެމުންދާ ރިވެތި އަޚްލާޤުތަކާއި އިސްލާމީ އުސޫލުތައް އަލުން މުޖުތަމަޢަށް އިއާދަކުރަން ޖެހޭ ޖެހޭކަން ފާހަގަކުރައްވަމުން، ރައީސް ވިދާޅުވީ މީހުންނަށް އިޙްތިރާމްކުރުމާއި ރީތި ބަހުން ވާހަކަދެއްކުން ފަދަ ކަންކަން އިޢާދަކުރުމަކީ ކޮންމެހެން ކުރަންޖެހޭ ކަމެއް ކަމަށެވެ.

ރައީސް އިތުރަށް ފާހަގަކުރެއްވީ ސްކޫލް ކުދިންގެ މެދުގައި އާންމުވެފައިވާ ވޭޕްގެ މައްސަލަ ހައްލުކުރުމަށާއި، ޑްރަގްގެ ވަބާއިން މި ޖީލު ސަލާމަތްކުރުމަށް އަދި ގޭންގުތަކުގެ މައްސަލަ ހައްލުކުރެއްވުމަށް ސަރުކާރުން ކުރައްވާ މަސައްކަތްޕުޅުތަކެވެ. މި ގޮތުން، ރާއްޖޭގައި މިއަދުން ފެށިގެން ވޭޕް ބުއިމާއި ވިއްކުން ސަރުކާރުން ވަނީ މަނާކޮށްފައެވެ.

ރައީސް މުއިއްޒުގެ މި ދަތުރުފުޅަކީ ރައްޔިތުންގެ ކަންބޮޑުވުންތަކަށް އަޑުއެއްސެވުމަށާއި، ސަރުކާރުގެ ތަރައްގީގެ މަޝްރޫޢުތަކުގެ މަޢުލޫމާތު ރައްޔިތުންނާ ހިއްސާކުރެއްވުމަށް ކުރައްވާ ދަތުރުފުޅެކެވެ.