ޚަބަރު
ހަންޏާމީދޫ ކައުންސިލުން އެދުނީ ޒަމާނީ ކުނިކޮށްޓެއް ތަރައްޤީކޮށްދިނުމަށް

އދ.ހަންޏާމީދޫ ކައުންސިލާއި ރައީސް ޑރ މުޢިއްޒު ބައްދަލުކުރެއްވެވުން. ފޮޓޯ: ރައީސް އޮފީސް
ހުލާސާ
އދ.ހަންޏާމީދޫ ގައި ޒަމާނީ ކުނި ކޮށްޓެއް ތަރައްޤީކޮށްދިނުމަށް އެރަށުގެ ކައުންސިލުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަރިހުގައި އެދިއްޖެއެވެ.
ރައީސް ޑރ މުޢިއްޒުގެ އަރިހުގައި އެރަށު ކައުންސިލުން އެދިފައިވަނީ ހަންޏާމީދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި އެކު ރައީސް ޑރ މުޢިއްޒު ބޭއްވެވި ބައްދަލުވުމުގައެވެ.
މި ބައްދަލުކުރެއްވުމުގައި ރަށުގެ ތަރައްޤީއަށް ބޭނުންވާ މުހިންމު ކަންކަމާގުޅޭގޮތުން މަޝްވަރާކުރައްވައިފައިވެއެވެ.
ހަންޏާމީދޫ ކައުންސިލުން ވަނީ އެރަށުގެ ގޮނޑުދޮށް ހިމާޔަތްކޮށްދިނުމަށް މަސައްކަތް ކޮށްދެއްވުމަށާއި، ހަންޏާމީދޫގެ ކުޅިވަރުގެ ދާއިރާ ކުރިއެރުވުމަށް ބޭނުންވާކަމަށާއި، ސުކޫލުގެ ހާލަތު ރަނގަޅުކުރުމަށް ބޭނުންވާކަމަށެވެ.
މީގެއިތުރުން ރަށުގައި ޒަމާނީ ކުނި ކޮށްޓެއް ތަރައްޤީކޮށްދެއްވުމަށާއި، ރަށުގެ ސަޤާފަތާ ތަރިކަ ރައްކާކޮށް، އެކަމުން ރަށަށް މަންފާކުރާނެ ގޮތެއް ބޭނުންވާކަން ފާހަގަކުރައްވާ އެކަން ކުރުމަށް ރައްޔިތުން އެދޭގޮތް ކައުންސިލުން ޙިއްޞާކުރެއްވިއެވެ.
ހަމަމިއާއި އެކު ރަށުގެ ދޯނި އެހެލާ ސަރަހައްދަށް ގެންނަން ބޭނުންވާ ބަދަލުތައް ވެސް ކައުންސިލުން ޙިއްޞާކުރެއްވިއެވެ.
މިބައްދަލުވުމުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ ޕިކްނިކް ދާނެ ރަށެއް ހަންޏާމީދޫ ކައިރީގައި ނެތުމުން ކަންބޮޑުވުން ފާޅުކުރައްވާފައެވެ. އަދި ރަށުގެ ހިނަވާގޭގެ މަސައްކަތް ނިންމުމަށް ސަރުކާރުން އެހީތެރިކަން ބޭނުންވާކަން ކޮމިޓީން ވަނީ ފާހަގަކުރައްވާފައެވެ.
މިއަދުގެ ބައްދަލުކުރެއްވުމުގައި ރައީސް ޑރ މުޢިއްޒުގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ހަންޏާމީދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.
މިއަދުގެ ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ މުޢިއްޒު ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވައި އެކަންކަން ކުރިއަށްގެންދިއުމުގައި ކައުންސިލުން ފާހަގަކުރެއްވި ގޮތަށް ކުރިއަށްދިއުމަށް މަސައްކަތްކުރައްވާނެކަމަށެވެ. އަދި ވަޢުދުވެވަޑައިގެންފައިވާ ކަންކަން ކުރިއަށްދާނެކަން އެމަނިކުފާނު ފާހަގަކުރެއްވިއެވެ.
މި ބައްދަލުކުރެއްވުން ކުރިއަށްދިޔައީ މިއަދު ހެނދުނު އަރިއަތޮޅު ދެކުނުބުރީ އަތޮޅު ކައުންސިލް އިދާރާގައެވެ.