ނަހަމަ ފައިދާއަށާއި ކޮރަޕްޝަނަށް ރައީސް މުޢިއްޒު ފާޅުގައި ވިދާޅުވީ ނޫނެކޭ: ވަޒީރު އާދަމް ނަސީރު

ނަހަމަ ފައިދާއަށާއި ކޮރަޕްޝަނަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ފާޅުގައި ނޫނެކޭ ވިދާޅުވެއްޖެ ކަމަށް ދިވެހި ބަހާ ސަޤާފަތާ ތަރިކައާ ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ.

މިހާރު ފެންމަތިވެގެން އުޅޭ ހައުސިންގ ޑިވަލޮޕްމެންޓް ކޯޕަރޭޝަނާއި ގުޅޭ ކޮރަޕްޝަންގެ މައްސަލަ އާއި ގުޅިގެން ވަޒީރު އާދަމް ނަސީރު ކުރެއްވެވި ޕޯސްޓުގައި ވިދާޅުވެފައިވަނީ ކޮރަޕްޝަންގެ އެމައްސަލަ އެބަ ބަލާ ކަމަށާއި އޭގެ މާނައަކީ ނަހަމަ ފައިދާއަށް، ކޮރަޕްޝަނަށް ރައީސް ޑރ މުޢިއްޒު ފާޅުގައި ނޫނެކޭ ވިދާޅުވުން ކަމަށެވެ.

އަދި ރައްޔިތުން އިތުބާރުކުރަނީ ރައީސް މުޢިއްޒުގެ މި ޢަޒުމާއި މާތް އަޚްލާޤަށް ކަމަަށް ވަޒީރު އާދަމް ނަސީރު ވަނީ ވިދާޅުވެފައެެވެ.

މައްސަލަ އެބަ ބަލައެވެ. އޭގެ މާނައަކީ ނަހަމަ ފައިދާއަށް ކޮރަޕްޝަނަށް ރައީސް @MMuizzu ޑރ. މުޙައްމަދު މުޢިއްޒު ފާޅުގައި ނޫނެކޭ ވިދާޅުވުމެވެ. ރައްޔިތުން އިތުބާރުކުރަނީ އެމަނިކުފާނުގެ މި ޢަޒުމަށެވެ. މާތް އަޚްލާޤަށެވެ.

— Adam Naseer Ibrahim (@Minister_MDLCH) December 19, 2024

މިމައްސަލައާއި ގުޅިގެން ފުލުހުން ބުނެފަައިވަނީ ފުލުހުން ތަހުޤީޤު ކުރަމުންދަނީ  ޑޮކިއުމަންޓުތަކެއް ފޯޖުކޮށްފައިވާ ކަމަށް ތުހުމަތު ކުރެވޭ މައްސަލައެއްކަމަށެވެ. އަދި  މިއީ ފުލުހުންނަށް ލިބިފައިވާ މައުލޫމާތަކާ ގުޅިގެން ފުލުހުން އިސްވެ ފެށި ތަހުޤީޤެއް ކަމަށްވެސް ފުލުހުން ވަނީ ބުނެފައެވެ.

މި މައްސަލައާ ގުޅިގެން އެޗްޑީސީގެ ބޯޑުގެ ޗެއަރމަން ފިޔަވައި އެހެން ހުރިހާ ބޯޑު މެންބަރުން ވަނީ ސަސްޕެންޑުކޮށްފައިވާއިރު، އޭގެ ތެރޭގައި އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޟުލް ރަޝީދުވެސް ހިމެނެއެވެ.ހަމަމިއާއި އެކު މި މައްސަލައިގައި ހިމެނޭ ފަޟުލް ރަޝީދުގެ އާއިލާ ބޭފުޅެއް ކަމުގައިވާ  މުޙައްމަދު ފަޒީލް ރަޝީދުވެސް އޭނާ ހުންނެވި މަޤާމު ކަމުގައިވާ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުގެ މަޤާމުން ސަސްޕެންޑް ކުރެވިފައިވެއެވެ.