ޒުހޫރުގެ ސިޓީއެއް ލިބިފައެއް ނުވޭ، ލިބުނުނަމަ ވަގުތުން މިސަރުކާރުން ފިޔަވަޅުއަޅާނެ: ރައީސް މުޢިއްޒު

ހައުސިންގ ޑިވަލޮޕްމެންޓް ކޯޕަރޭޝަން(އެޗްޑީސީ)ގެ ބޯޑުގެ ކުރީގެ ޗެއަރމަން އަޙްމަދު ޒުހޫރުގެ ސިޓީއެއް ލިބިވަޑައިގެންފައިނުވާ ކަމަށާއި ޚިޔާނާތުގެ މައްސަލަތަކާ ގުޅުން ހުރި ސިޓީއެއް ލިބިވަޑައިގަތްނަަމަ ވަގުތުން މިސަރުކާރުން ފިޔަވަޅު އަޅާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ. 

ރައީސް ޑރ މުޢިއްޒު މިހެން ވިދާޅުވީ މިއަދު މެންދުރުފަހު ރައީސް އޮފީސް ބޭރުގައި ބައެއް މީޑިއާތަކާ ވާހަކަފުޅު ދައްކަވަމުންނެވެ. މިއީ މިމައްސަލައާއި ގުޅިގެން ރައީސް މުޢިއްޒު ސީދާ ބަސްފުޅެއް ވިދާޅުވި ފުރަތަމަ ފަހަރުކަން ފާހަގަކޮށްލަން ޖެހެއެވެ.

ރައީސް މުޢިއްޒު ވިދާޅުވީ އެޗްޑީސީގެ ކުރީގެ ޗެއަރމަން ޒުހޫރުގެ ސިޓީއެއް އެމަނިކުފާނަށް ލިބިވަޑައި ނުގަންނަވާކަމަށާއި، އެފަދަ ސިޓީއެއް ލިބިވަޑައިގެންނެވިނަމަ ވަގުތުން ފިޔަވަޅު އަޅުއްވަން ފަސްޖެހިވަޑައިނުގަންނަވާނެކަމަށެވެ. ރައީސް މުޢިއްޒު ވިދާޅުވީ ކޮރަޕްޝަންގެ ޢަމަލެއް ނުވަތަ ޤަވާޢިދާއި ޚިލާފަށް ކުރާ ކަމެއް ހުއްޓުވަށް އެމަނިކުފާނު ފަސްޖެހިވަޑައިނުގަންނަވާނެ ކަމަށެވެ. އަދި އަދާ ހަމައަށްވެސް އެފަދަ ކަންކަމުގައި، މަޢުލޫމާތު ލިބުމާއި އެކު ހުންނާނީ ފިޔަވަޅު އަޅަން ދަންވައިފައި ކަމަށެވެ.

މީގެއިތުރުން އެމަނިކުފާނު ވިދާޅުވީ ބޭނުންފުޅު ވެވަޑައިގަންނަވަނީ މިސަރުކާރަކީ ކޮރަޕްޝަނާއި ނުޤަވާއިދުން ހިންގާ ކަންކަމާ ދުރުވެފައި އޮންނަ ސަރުކާރަކަށް ހައްދަވަން ކަމަށާއި އެމަނިކުފާނު ވަޢުދުވެވަޑައިގެންނެވި ގޮތަކީވެސް އެއީ ކަމަށެވެ.

ސިޓީއެއް ލިބި އަޅުގަނޑު އެއައަށް ޢަމަލު ނުކޮށް އޮތްވާހަކައަކީ ހަޤީޤަތާއި ޚިލާފު ވާހަކައެއް. އަޅުގަނޑަށް ކަންކަން އެނގުނު ހިސާބުން ފިޔަވަޅު އަޅާފައިވަނީ

ރައީސުލްޖުމްހޫރިއްޔާ ޑރ މުޢިއްޒު ވިދާޅުވިއެވެ.

ޤާނޫނާއި ޤަވާޢިދާ ޚިލާފު އެއްވެސްކަމެއް ސަރުކާރު ތެރެއިން ހިނގަން އެމަނިކުފާނު ބޭނުންފުޅުވެވަޑައި ނުގަންނަވާ ކަމަށާއި، އަދި އެފަދަ ފުރުޞަތެއް އެމަނިކުފާނުގެ ސަރުކާރެއްގައި ނޯންނާނެކަމުގެ ޔަޤީންކަން ރައީސް ވަނީ ދެއްވައިފައެވެ.

ރައީސް މުޢިއްޒު ވިދާޅުވީ ކުރީގެ ސަރުކާރުތަކުން އެގޮތަށް ޢަމަލުނުކުރެއްވި ނަމަވެސް އެމަނިކުފާނު އެފަދަ ކަންކަމަށް ފިޔަވަޅު އަޅުއްވަން ފަސްޖެހިވަޑައިނުގަންނަވާނެކަމަށެވެ.

އެޗްޑީސީގައި ހިންގިކަމަށް ތުހުމަތުކުރެވޭ ކޮރަޕްޝަންގެ މައްސަލައާއި ގުޅިގެން ބައެއް މުވައްޒަފުން މިއަދު އެކުންފުނިން ވަކިކޮށްފައިވާކަން ރައީސް މުޢިއްޒު ވަނީ ފާހަގަކުރައްވައިފައެވެ. އަދި އެފަދަ ޢަމަލުތައް ހިންގަން އެއްވެސް މުޢައްސަސާއަކާއި އެއްވެސް ކުންފުންޏެއްގައިވެސް ޖާގަ ދެއްވަން ބޭނުންފުޅު ވެވަޑައިނުގަންނަވާކަން ވެސް ރައީސް ފާހަގަކުރެއްވެވިއެވެ.

ހުރިހާ ފަރާތްތަކެއްގެ އެއްބާރުލުން ލިބިގެން، ކަންކަން ރަނގަޅު ކުރެވޭނެކަމުގެ ޔަޤީންކަން އެބައޮތް ކަމަށާއި، އެގޮތުން އޮފީސްތަކާއި އާންމުންގެ އެއްބާރުލުން ލިބިގެން މިކަން ކުރެވޭނެކަމަށް ރައީސުލްޖުމްހޫރިއްޔާ ޑރ މުޢިއްޒު ވިދާޅުވިއެވެ.

މިމައްސަލާގައި ޝާމިލްވާ ގިނަ ބަޔަކު އެމީހުން ތިބި މަޤާމުތަކުން ދުރުކޮށްފައިވާއިރު މައްސަލާގައި ޝާމިލްވާކަމަށް ތުހުމަތުކުރެވޭ ގިނަ ބަޔަކު ފުރުން މަނާކުރުމުގެ އަމުރަށްވެސް މިހާރު ފުލުހުން ވަނީ އެދިފައެވެ.