ޚަބަރު
ވަޒީރުންގެ މަޖިލީހުގެ ބަދަލުތަކާއި އެކު ވުޒާރާތަކުގެ މަސައްކަތްތަކަށް ބޮޑެތި ބަދަލުތަކެއް

އައްޔަންކުރެވުނު އައު ވަޒީރުންނަށް މަޤާމުގެ ފަތްކޮޅު އެރުވުމުގެ ރަަސްމިއްޔާތު ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވަޒީރުންގެ މަޖިލީހަށް ގެންނެވި ބަދަލާ ގުޅިގެން، ބައެއް މިނިސްޓްރީތަކުން ކުރައްވަމުން ގެންދަވާ މަސައްކަތްތަކަށް މުހިންމު ބަދަލުތަކެއް ގެންނަވާފައެވެ. މި ބަދަލުތައް ގެންނެވީ ބުރާސްފަތި ދުވަހުއެވެ.
ރައީސް އޮފީހުން ބުނެފައިވާ ގޮތުގައި، އުވާލެވުނު މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން ކުރަމުން ގެންދިޔަ ގިނަ މަސައްކަތްތަކެއް މިހާރު ކުރިއަށް ގެންދާނީ މިނިސްޓްރީ އޮފް ފިނޭންސް އެންޑް ޕްލޭނިންގ އިންނެވެ. މީގެ ތެރޭގައި ރާއްޖޭގެ ބިން ބޭނުންކުރުމާއި، އަރބަން ސަރަހައްދުތައް ތަރައްޤީކުރުމާއި، ޤައުމީ ތަރައްޤީ ރޭވުމާއި، ތަފާސްހިސާބުގެ މަސައްކަތްތައް ހިމެނެއެވެ.
އަދި ރާއްޖޭގެ ހިޔާވަހިކަމުގެ ސިޔާސަތު ކަނޑައެޅުމާއި ސޯޝަލް ހައުސިންގއާ ގުޅޭ މަސައްކަތްތައް މިހާރު ކުރިއަށް ގެންދާނީ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިންނެވެ. މީގެ ކުރިން މި ވުޒާރާ ހިންގަމުން ގެންދިޔައީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ނަމުގައެވެ.
މީގެ އިތުރުން، ކުރިން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ ދަށުން ހިނގަމުންދިޔަ މޯލްޑިވްސް ބިއުރޯ އޮފް ސްޓެޓިސްޓިކްސް މިހާރު ހިނގަމުންދާނީ މިނިސްޓްރީ އޮފް ފިނޭންސް އެންޑް ޕްލޭނިންގގެ ދަށުންނެވެ.
މި ބަދަލުތަކާ ގުޅިގެން، ދައުލަތުގެ އިދާރާތަކުން ލިޔާ ސިޓީތަކުގައި ނަންބަރު ޖެހުމަށްވެސް ބަދަލު ގެނެވިފައިވެއެވެ. މިނިސްޓްރީ އޮފް ފިނޭންސް އެންޑް ޕްލޭނިންގއަށް ލިޔާ ސިޓީތަކުގައި ޖަހާނީ ނަންބަރު 13 އެވެ. އަދި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއަށް ލިޔާ ސިޓީތަކުގައި ޖަހާނީ ނަންބަރު 491 އެވެ.
ވަޒީރުންގެ މަޖިލީހަށް ގެނެވުނު ބަދަލުތަކާ ގުޅިގެން އައްޔަންކުރެވުނު އައު ވަޒީރުންނަށް މަޤާމުގެ ފަތްކޮޅު ދެއްވާފައިވަނީ ރައީސް އޮފީހުގައި ބޭއްވުނު ރަސްމިއްޔާތެއްގައެވެ. ރައީސް މުޢިއްޒު ވަނީ އައު ވަޒީރުންނާ ބައްދަލުކުރައްވައި، މިނިސްޓްރީތަކުގެ އޮނިގަނޑު އެކުލަވާލުމުގައި ބަދަލުވާ މުވައްޒަފުންނަށް ދަތިނުވާނެ ގޮތަށް ކަންކަން ހަމަޖެއްސެވުމަށް އިރުޝާދު ދެއްވާފައެވެ.