ޚަބަރު
އިދިކޮޅު ފަރާތްތަކުން ރައީސް މުޢިއްޒުގެ ވެރިކަން ވައްޓާލުމަށް 92.5 މިލިއަން ރުފިޔާގެ ރޭވުމެއް ރޭވި

ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު

ފަރުދުން
30 ޑިސެމްބަރު 2024، 10:46
30 ޑިސެމްބަރު 2024، 10:46
ހުލާސާ
މިކަމުގެ މަޝްވަރާތަކުގައި އިދިކޮޅު ފަރާތްތަކުން އިންޑިއާގެ ޖޫސީސީ އިދާރާ، ރޯގެ ބައެއް އެޖެންޓުންނާއި މަޝްވަރާކޮށްފައިވާކަމަށް ވެސް އެ ރިޕޯޓުގައި ބުނެފައިވޭ.
ރާއިސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމަށް ވަޑައިގެންނެވި ފަހުން، ރާއްޖެ އާއި އިންޑިއާގެ ހާރިޖީ ގުޅުން އެންމެ ގޯސްވި ދުވަސްވަރު، "ޑިމޮކްރެޓިކް ރިނިޔުވަލް އިނީޝިއަޓިވް" ނަމުގައި ކަރުދާހެއް ތައްޔާރުކޮށް، 92.5 މިލިއަން ރުފިޔާ ބޭނުންކޮށްގެން އެ މަނިކުފާނުގެ ވެރިކަން ވައްޓާލުމަށް ރޭވި ކަމަށް، އެމެރިކާގެ މަޝްހޫރު ދުވަހު ނޫސް، ވޮޝިންގްޓަން ޕޯސްޓުން ޝާއިއުކުރި ރިޕޯޓެއްގައި ބުނެފިއެވެ.
މިކަމުގެ މަޝްވަރާތަކުގައި އިދިކޮޅު ފަރާތްތަކުން އިންޑިއާގެ ޖޫސީސީ އިދާރާ، ރޯގެ ބައެއް އެޖެންޓުންނާއި މަޝްވަރާކޮށްފައިވާކަމަށް ވެސް އެ ރިޕޯޓުގައި ބުނެފައި ވެއެވެ.
ވޮޝިންޓަން ޕޯސްޓުން ރިޕޯޓުކޮށްފައިވާ ގޮތުގައި، މި ކަރުދާހުގައި އޮތީ މަޖިލީސް މެންބަރުންނާއި، ސިފައިންނާއި ޕޮލިހުންނަށް ރިޝްވަތު ދީގެން ރައީސުލްޖުމްހޫރިއްޔާގެ ވެރިކަން ވައްޓާލާނެ ގޮތެވެ.
އެގޮތުން، ޕީއެންސީ މެމްބަރުން ހިމެނޭ ގޮތަށް ރައްޔިތުންގެ މަޖިލީހުގެ 40 މެމްބަރަކަށް ރިޝްވަތު ދީގެން، ރައީސް މުޢިއްޒުގެ އިތުބާރު ނެތްކަމަށް މަޖިލީހުން ފާސްކުރަން އެޅުނުކަމަށް އެ ކަރުދާހުގައި ހިމެނޭކަމަށް ބުނެއެވެ.
އަދި މީގެ އިތުރުން، ދިވެހި ފުލުހުންނާއި ދިވެހި ސިފައިންގެ 10 އިސް އޮފިސަރުންނާއި، ރާއްޖޭގައި ހަރަކާތްތެރިވާ ބާރުގަދަ ތިން ގޭންގަކަށް ފައިސާ ދޭން ރާވައި، ޖުމްލަ ހަ މިލިއަން ޑޮލަރު، ދިވެހި ރުފިޔާއިން ނަމަ ގާތްގަނޑަކަށް 92.5 މިލިއަން ކަނޑައަޅައި، އެ ފައިސާ އިންޑިއާއިން ހޯދުމަށް މަސައްކަތްކޮށްފައިވާކަމަށް، ވޮޝިންގްޓަން ޕޯސްޓުގައި ބުނެފައިވެއެވެ.
އަދި މި ވަރުގަދަ ރޭވުން ބޭކާރުވީ، ބޭނުންވާ މިންވަރަށް ރިޝްވަތު ހިފާނެ މެންބަރުން ނުވުމުންކަމަށް ވެސް އެ ރިޕޯޓުގައި ބުނެއެވެ.
މި ރޭވުން ތަންފީޒުކުރުމަށް ތައްޔާރުވުމަށް އިންޑިއާއިން އެންމެ އިސްކޮށް މަސައްކަތްކުރީ ޝިރީޝް ތޮރާތު ނަމަކަށް ކިޔާ ކުރީގެ ފުލުހަކާއި އިންޑިއާގެ ވެރިކަންކުރާ ޕާޓީ، ބީޖޭޕީގެ ކުރީގެ ތަރުޖަމާނެއް ކަމަށްވާ ސަވިއޯ ރޮޑްރީގްސް ކަމަށް ވެސް، އެ ރޭވުމާ ހަވާލާދީ ވޮޝިންޓަން ޕޯސްޓުގައި ވެއެވެ.
މީގެ އިތުރުން، ރައީސް މުޢިއްޒުގެ ވެރިކަން ވައްޓާލުމަށް ޝިރީޝް އާއި ތޮރާތު މަސައްކަތް ކުރިކަމަށް އެ މީހުން ވޮޝިންޓަން ޕޯސްޓަށް ޔަގީންކޮށްދީފައިވީ ނަމަވެސް، އެ މީހުން މަސައްކަތް ކުރީ ރަސްމީކޮށް އިންޑިއާ ސަރުކާރުގެ ފަރާތުން ކަމެއް ހާމަކޮށްފައެއް ނުވެއެވެ.
ނަމަވެސް، ރާއްޖޭގައި ހުންނަ އިންޑިއާ ހައިކޮމިޝަންގައި މަސައްކަތްކުރާ އިންޑިއާގެ ރޯ އެޖެންޓު މިކަން ދޮގުކޮށް، ރައީސް މުޢިއްޒުގެ ވެރިކަމުގެ އެހާ ކުރީކޮޅު، ވެރިކަން ވައްޓާލުމާ ދެކޮޅު ހެދި ކަމަށް ބުނެފައިވެއެވެ.
މީގެ އިތުރުން، މަޖިލިސް އިންތިހާބުގެ ކުރިން އެމްޑީޕީއަށް ނިސްބަތްވާ 11 މެންބަރަކު ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ބަދަލުކުރީ އެ ރޭވުމަށް ހުރަސް އެޅުމަށް ކަމަށް ވެސް، ވޮޝިންގްޓަން ޕޯސްޓުގައި ބެނެފައިވެއެވެ.