މި އަހަރަކީ ރައްޔިތުން ބާރުވެރި ކުރުމާއި ގައުމުގެ ސިޔާދަތީ ބާރު ހިމާޔަތްކުރެވުނު އަހަރެއް: ރައީސުލްޖުމްހޫރިއްޔާ

ނިމިގެންމިދާ 2024 ވަނަ އަހަރަކީ ރައްޔިތުން ބާރުވެރި ކުރުވައި ރާއްޖޭގެ ސިޔާދަތީ ބާރު ހިމާޔަތް ކުރެވުނު އަހަރެއްކަމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިހެން ވިދާޅުވީ، އެ މަނިކުފާނުގެ ރަސްމީ ފޭސްބުކް އެކައުންޓުން ކުރެއްވި ޕޯސްޓަކުންނެވެ.

އެ މަނިކުފާނު އިތުރަށް ވިދާޅުވީ، 2024 ވަނަ އަހަރުގައި ގެނެވުނު ދުސްތޫރީ އިސްލާހުތަކުގެ ސަބަބުން، މުހިންމު ކަންކަމުގައި ރައްޔިތުންގެ އަޑު އުފުލުމަށް ފުރުސަތު ހޯދާދެވިއްޖެ ކަމަށާއި، އެހެންކަމުން ރައްޔިތުންގެ ވެރިކަން އަނބުރާ ރައްޔިތުންނަށް ހޯދައި ދެވިއްޖެ ކަމަށެވެ.

މީގެ އިތުރުން، 2024 ވަނަ އަހަރު ރައީސުލްޖުމްހޫރިއްޔާ ތަސްދީގު ކުރެއްވި މުހިންމު ގާނޫނުތަކަށް ވެސް އެމަނިކުފާނުގެ ޕޯސްޓުގައި އަލިއަޅުއްވާލެއްވިއެވެ.

އެގޮތުން ރައްޔިތުންނާ ގުޅުންހުރި މުހިންމު ގާނޫނުތަކުގެ ތެރޭގައި ރާއްޖޭގެ އެކްސްކްލޫސިވް އެކޮނޮމިކް ޒޯން (އީއީޒެޑު) އާ ގުޅޭ ގާނޫނަށް އިސްލާހު ގެނައުން ހިމެނެއެވެ. އަދި ރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުންކަން އެ ގާނޫނުގައި ވެއެވެ. އަދި މިކަމާ ގުޅޭ ނިންމުންތަކުގައި ރައްޔިތުންނަށް ފެންނަ ނުފެންނަ ވޯޓެއް ވެސް ނަގަން ޖެހެއެވެ.

މީގެއިތުރުން، ރާއްޖޭގެ ސަރަޙައްދުގެ އެއްވެސް ބައެއް އަސްކަރީ ބޭނުމަކަށް ރާއްޖެއިން ބޭރުގެ ފަރާތަކަށް ދިނުމުގެ ހުއްދަ ، އެއްބަސްވުމެއްގެ ދަށުން ނުވަތަ އެނޫންވެސް ގޮތަކަށް ދެވޭ އުސޫލު ވެސް ވަނީ ޤާނޫނުއަސާސީން އިސްލާހުކުރައްވާފައެވެ. 

މި އިސްލާހުތަކުގެ ސަބަބުން، ކުރިޔަށްވުރެން ބޮޑަށް ގައުމީ މުހިންމު މައްސަލަތަކުގައި ރައްޔިތުން ބާރުވެރިކަން ޔަގީންކުރެވިފައިވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި މިހާރު ރައްޔިތުންގެ ޙައްގުތައް، ރައްޔިތުން ބޭނުންވާގޮތަށް ރައްޔިތުންގެ އަތްމައްޗަށް ލިބިފައިވާކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.