ރައީސްގެ ދެކަނބަލުން އައު އަހަރުގެ ތަހުނިޔާ ބޭރުގެ އިސްވެރިންނަށް ފޮނުއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، 2025 ވަނަ އައު އަހަރުގެ ތަހުނިޔާ، އެކުވެރި ޤައުމުތަކުގެ އިސް ވެރިންނަށާއި، ސަރުކާރުތަކަށް ފޮނުއްވައިފިއެވެ. މިއަދު ރައީސް އޮފީހުން ނެރުނު ނޫސްބަޔާނެއްގައި މިކަން ހާމަކޮށްފައިވެއެވެ.

ރައީސުލްޖުމްހޫރިއްޔާގެ ދެކަނބަލުންގެ ތަހުނިޔާ މެސެޖުގައި މިފެށޭ އައު އަހަރަކީ ތަނަވަސްކަމާއި އުފާފާގަތި ކާމިޔާބު އަހަރަކަށް ވާނެކަމަށް އުންމީދުކުރައްވާކަމަށް ވިދާޅުވިއެވެ. އަދި ބައިނަލްއަޤުވާމީ ޖަމިއްޔާ ޖަމާޢަތްތަކުގެ ވެރިންނަށާއި ރެސިޑެންޓް ޑިޕްލޮމެޓިކް މިޝަންތަކުގެ ވެރިންނަށްވެސް ތަހުނިޔާ ވިދާޅުވިއެވެ.

މި ފެށުނު މީލާދީ އައު އަހަރާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ޚިޠާބުގައި، އައު އަހަރާ ބައްދަލުކުރަނީ އުންމީދުގެ ދަންމަރުތަކާއި ތަރައްޤީގެ ތަޞައްވުރުތަކާއި ދިވެހި އިސްލާމީ އަޚްވަންތަކަމާއެކުކަމަށް ވިދާޅުވިއެވެ. އަދި ވަކި ލަނޑުދަނޑިތަކެއް ހާސިލުކުރުމަށްޓަކައި ދިވެހި ދައުލަތް ކަނޑައެޅިފައިވާ އަމާޒުތަކަކާ ދިމާއަށްކަން ފާހަގަކުރެއްވިއެވެ.

ރައީސްގެ ޚިޠާބުގައި 2025 ވަނަ އަހަރަކީ ތަރައްޤީގެ ވަރަށް ގިނަ މަޝްރޫޢުތަކުގައި ޢަމަލީ ސިފަ ޖެހޭނެ އަހަރެއްކަމަށް ވިދާޅުވިއެވެ. އަދި މިއަހަރު އިޤުތިޞާދީ ފުދުންތެރިކަން އިއާދަވާން ފަށައި، މަސައްކަތްތެރީންނަށް އިތުރު ފުރުޞަތުތައް ހުޅުވޭނެކަންވެސް ފާހަގަކުރެއްވިއެވެ.

ނިމިދިޔަ 2024 ވަނަ އަހަރު ޤައުމުގެ ކުރިއެރުމަށް މުހިންމު ނިންމެވުންތަކެއް ރައީސް މުޢިއްޒުގެ ސަރުކާރުގެ ކެބިނެޓުން ނިންމިކަން ފާހަގަކޮށްލެވެއެވެ. އޭގެ ތެރޭގައި މަސްތުވާތަކެތި ބޭނުންކުރާ ފަރާތްތަކަށް ކޮމިއުނިޓީބޭސްޑް ރިހެބިލިޓޭޝަން ޕްރޮގްރާމް ފެށުމާއި، ރާއްޖޭގެ 3 ސަރަހައްދެއްގައި ރީހެބިލިޓޭޝަން ފަރުވާދޭ މަރުކަޒު ޤާއިމްކުރުމަށް ނިންމުން ހިމެނެއެވެ.

މީގެ އިތުރުން، ރީއެކްސްޕޯޓް ކުރެވޭ ނިޒާމެއްގެ ތެރެއިން އާމްދަނީ އިތުރުކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި ކުންފުންޏެއް އުފެއްދުމަށާއި، ދުންފަތާ ދުރުކުރުމަށް ސިނގިރޭޓުން ނަގާ ޑިޔުޓީ ބޮޑުކޮށް، ރާއްޖޭގައި ވޭޕު ބޭނުންކުރުން މަނާކުރުމަށްވެސް ނިންމާފައިވެއެވެ.