ރައްޔިތުންނަށް އިތުރަށް ލުއިފަސޭހަ ކޮށްދެއްވުމަށް ޙައްޖަށް މީހުން ގެންދިޔުމާއިބެހޭ އުސޫލަށް ރައީސުލްޖުމްހޫރިއްޔާ ބަދަލުގެންނަވައިފި

މިނިސްޓްރީ އޮފް އިސްލާމިކް އެފެއާޒުން ހުށަހެޅި ކަރުދާހަކާ ގުޅިގެން، ދިވެހިރާއްޖެއިން ޙައްޖަށް މީހުން ގެންދިޔުމާބެހޭ އުސޫލަށް މުހިންމު ބަދަލުތަކެއް ގެނައުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ނިންމަވައިފިއެވެ. މި ބަދަލުތައް ގެނެވުނީ މޯލްޑިވްސް ޙައްޖު ކޯޕަރޭޝަން ލިމިޓެޑަށް ފައިސާ ދެއްކުމަށްފަހު، ފަރުޟު ޙައްޖު އަދާކުރުމަށް ދިގު އިންތިޒާރެއްގައި ތިބި ރައްޔިތުންނަށް ޙައްލެއް ހޯދައިދިނުމުގެ މަޤްޞަދުގައެވެ.

މި އައު އުސޫލުގެ ދަށުން، އަލަށް ޙައްޖުގެ އަޅުކަން އަދާކުރަން އެދޭ ފަރާތްތަކަށް އިސްކަންދެވޭނެއެވެ. އަދި ޢުމުރުން 65 އަހަރުން މަތީގެ، ކުރިން ޙައްޖު ނުވެވާ ފަރާތްތަކަށް ވަކި އިންސައްތައެއް ޚާއްޞަކުރެވޭނެއެވެ. މީގެ އިތުރުން، 75 އަހަރުން މަތީގެ ބައެއް ފަރާތްތަކަށް އެހީތެރިއަކާއެކު ޙައްޖަށް ދިއުމުގެ ފުރުޞަތު ލިބިގެންދާނެއެވެ.

ކުރިން ޙައްޖުވެފައިވާ ފަރާތްތަކަށް އަލުން ފުރުޞަތު ދެވޭނީ އެންމެ ފަހުން ޙައްޖުވިތާ ހިޖުރީ ސަނަތުން 5 އަހަރު ފުރުމުންނެވެ. ނަމަވެސް، މޯލްޑިވްސް ޙައްޖު ކޯޕަރޭޝަނުގެ ޚިދުމަތްތެރިން މި ޤަވާޢިދުން އިސްތިސްނާވާނެއެވެ.

މި ބަދަލުތައް ގެނެވުނު ނަމަވެސް، ރާއްޖެއަށް ލިބޭ ރަސްމީ ޙައްޖު ކޯޓާ އިތުރުކުރުމަށް ސަރުކާރުން ދަނީ މަސައްކަތްކުރަމުންނެވެ. މި ބަދަލުތަކުގެ ސަބަބުން ގިނަ ރައްޔިތުންނަށް ޙައްޖުގެ އަޅުކަން އަދާކުރުމުގެ ފުރުޞަތު އަވަސްވެގެންދާނެ ކަމަށް އުންމީދުކުރެވެއެވެ.