ޚަބަރު
މި އަހަރަކީ ގެދޮރުވެރިކަމުގެ އެންމެ ގިނަ މަޝްރޫޢު ހިންގާނެ އަހަރު: ރައީސުލްޖުމްހުރިއްޔާ

ގުޅީގެ ރައްޔިތުންނާ ބައްދަލުކުރައްވައި ައީސުލްޖުމްހޫރިއްޔާ ވާހަކަފުޅު ދައްކަވަނީ، ފޮޓޯ: ރައީސް އޮފީސް
ހުލާސާ
މާލެ ފިޔަވައި ރާއްޖޭގެ އެހެން ހުރިހައި ސަރަޙައްދެއްގައި ކުރިއަށް ގެންދަވާނެ ކަމަށް ވަޢުދުވެވަޑައިގެންފައިވާ ބޯހިޔާވަހިކަމުގެ ހުރިހައި މަޝްރޫޢުތައް ޢަމަލީ ގޮތުން ހިންގައިދޭނެ ފަރާތްތައް ހޯދުމަށް މި ހިނގާ ޖަނަވަރީ މަހުގެ ތެރޭގައި އިޢުލާން ކުރައްވާނެ ކަމަށް ރައީސުލްޖުމްހޫރިއްޔާ ވިދާޅުވެފައިވޭ.
2025ވަނަ އަހަރަކީ ރާއްޖޭގެ ގެދޮރުވެރިކަމުގެ މައްސަލަ ހައްލު ކުރުމަށް އަމަލީ ގޮތުން އެއް އަހަރެއްގެ ތެރޭގައި އެންމެ ގިނަ މަޝްރޫޢު ހިންގާނެ އަހަރު ކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ.
ރައީސުލްޖުމްހޫރިއްޔާ މި ޔަޤީންކަން ދެއްވީ، އެ މަނިކުފާނު މިއަދު މާލެ އަތޮޅު ގުޅިއަށް ކުރެއްވެވި ދަތުރުފުޅުގައި، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ، މާލެ ފިޔަވައި ރާއްޖޭގެ އެހެން ހުރިހައި ސަރަޙައްދެއްގައި ކުރިއަށް ގެންދަވާނެ ކަމަށް ވަޢުދުވެވަޑައިގެންފައިވާ ބޯހިޔާވަހިކަމުގެ ހުރިހައި މަޝްރޫޢުތައް ޢަމަލީ ގޮތުން ހިންގައިދޭނެ ފަރާތްތައް ހޯދުމަށް މި ހިނގާ ޖަނަވަރީ މަހުގެ ތެރޭގައި އިޢުލާން ކުރައްވާނެ ކަމަށެވެ.
އަދި2025 ވަނަ އަހަރަކީ "ބޯހިޔާވަހިކަމުގެ އަހަރަށް" ހައްދަވާނެ ކަމަށް ވިދާޅުވެ ވާހަކަފުޅު ކުރިޔަށްގެންދަވަމުން ރައީސުލްޖުމްހޫރިއްޔާ ވިދާޅުވީ، ވެރިރަށް މާލެ ސަރަޙައްދުގެ މަޝްރޫޢުތައްވެސް އިޢުލާންކުރައްވާފައިވާ ގޮތަށް ކުރިއަށް ގެންދަވާނެ ކަމަށެވެ.
މީގެ އިތުރުން، މިހާރު ބިން ހިއްކުމުގެ އަމަލީ މަސައްކަތް ކުރިޔަށްދާ "ރަސްމާލެ" މަޝްރޫޢަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އެއް ސަރަޙައްދަކުން އެންމެ ބޮޑު ޙައްލެއް ލިބޭނެ މަޝްރޫޢުކަމުގައި ވިދާޅުވެ، ކުރިޔަށް އޮތް ދުވަސްތަކުގައި އެ މަޝްރޫޢު ފުޅާކޮށް، މަސައްކަތުގެ ދުވެލި ދެތިންގުނައަށް ހަލުވިކުރެވިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ގުޅީގެ ރައްޔިތުންނާ މުޚާޠަބުކުރައްވަމުން ރައީސުލްޖުމްހޫރިއްޔާ އިތުރަށް ވިދާޅުވީ، މި އަހަރަކީ ތަރައްޤީގެ ޢަމަލީ މަސައްކަތާއި މާލީ ތަނަވަސްކަން އިޙްސާސްކޮށްދިނުމަށް ވަރަށް ފުޅާ ދާއިރާއެއްގައި، އެހާމެ ބާރަށް މަސައްކަތްތައް ކުރިޔަށްގެންދާނެ އަހަރެއް ކަމަށެވެ. އަދި ރައްޔިތުން މުސްތަޤްބަލަށް ގެންގުޅުއްވާ ވިސްނުން ބަހައްޓަންވީ، މި ރޫޙާއި އުންމީދުގައި ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
އަދި ނިމިދިޔަ ދައުރުން ވާރުތަވި އިޤްތިޞާދީ ގޮންޖެހުމާއެކު، ނިމިދިޔަ އަހަރަކީ އެންމެ ހިންހަމަޖެހޭ ގޮތަށް ކަންކަން ކުރިޔަށް ގެންދެވުނު އަހަރަކަށް ނުވި ނަމަވެސް، އިޤްތިޞާދީ ގޮތުން އެޅުނު ރަގަޅު ބިންގަލުގެ މަތީގައި ކުރިޔަށް ގޮސް، މި އަހަރު ޤައުމު ބިނާކުރެއްވުމުގައި ގިނަ މަސައްކަތްތަކެއް ކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވެވިއެވެ.
މި މޭރުމުން ވާހަކަފުޅު ކުރިޔަށް ގެންދަވަމުން ރައީސުލްޖުމްހޫރިއްޔާ ވިދާޅުވީ، އެ މަނިކުފާނު އެންމެ އިސްކަންދެއްވާ އެއް ކަމަކީ ރައްޔިތުންގެ ދުޅަހެޔޮކަމާއި، ރައްޔިތުންނަށް ކުރިމަތިވެފައިވާ އެކިއެކި މައްސަލަތަކަށް ދާއިމީ ޙައްލެއް ހޯއްދަވައިދެއްވުން ކަމަށެވެ.
މީގެ އިތުރުން، އުމްރާނީ ތަރައްޤީ އާއި ފިކުރީ އަދި ރޫޙާނީ ތަރައްޤީ ހިމެނޭހެން ވަށާޖެހެނިވި ތަރައްޤީއެއް ގެނެސްދެއްވުމަށް މަސައްކަތްކުރައްވާ ކަމުގައި ވެސް އެ މަނިކުފާނު ވިދާޅުވިއެވެ. އަދި އެންމެން އެކަތިގަނޑެއްގެ ގޮތުގައި މަސައްކަތްކޮށް، ޤައުމަށާއި މުޖުތަމަޢަށް ފައިދާ ލިއްބައިދެނިވި މޭރުމަކުން ކަންކަން ކުރިއަށް ގެންދެވުމަށް ރައީސުލްޖުމްހޫރިއްޔާ ވަނީ ގޮވާލައްވާފައެވެ.