ބޯހިޔާވަހިކަމުގެ މަޝްރޫޢުތަކުގެ އަމަލީ މަސައްކަތް ފެށުމަށް މިމަހު އިޢުލާންކުރައްވާނެކަމަށް ރައީސް މުޢިއްޒު ވިދާޅުވެއްޖެ

ކ. ގުޅީގައި ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން، ސަރުކާރުން ހިންގެވުމަށް ކަނޑައަޅުއްވާފައިވާ ބޯހިޔާވަހިކަމުގެ ހުރިހާ މަޝްރޫޢެއްގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދަން މިމަހު އިޢުލާންކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު ވިދާޅުވީ މިއަހަރަކީ ތަރައްޤީގެ މަސައްކަތާއެކު، މުއްސަނދިކަން ރައްޔިތުންނަށް އިހްސާސްކޮށްދިނުމުގެ އަމަލީ މަސައްކަތް ފެށިގެންދާނެ އަހަރެއްކަމަށެވެ. އަދި މިއަހަރު އެކި ދާއިރާތަކުން ޢުމްރާނީ ތަރައްޤީގެ ގިނަ މަޝްރޫޢުތަކެއްގެ ޢަމަލީ މަސައްކަތް ފެށިގެންދާނެކަމަށާއި، އޭގެ ތެރެއިން އެންމެ ބޮޑު އިސްކަމެއް ދެއްވާނީ ގޯތިގެދޮރު ބިނާކުރުމާއި ބޯހިޔާވަހިކަމާ ގުޅޭ މަޝްރޫޢުތަކަށްކަމަށް ވިދާޅުވިއެވެ.

ރައީސް މުޢިއްޒުގެ ވަޢުދުތަކުގެ ތެރޭގައި ރާއްޖޭގެ އުތުރުގައި 20,000 ހައުސިން ޔުނިޓް އަދި ދެކުނުގައި 20,000 ހައުސިން ޔުނިޓްގެ މަޝްރޫޢު ހިންގެވުން ހިމެނެއެވެ. މިއަހަރުގެ ބަޖެޓުގައި ބޯހިޔާވަހިކަމާ ގުޅޭ މަސައްކަތްތަކަށް 2.5 ބިލިއަން ރުފިޔާ ހިމަނާފައިވާއިރު، އޭގެ ތެރެއިން 1 ބިލިއަން ރުފިޔާ ހިމަނާފައިވަނީ އުމްރާނީ މަސައްކަތްތަކަށެވެ.

މީގެއިތުރުން، މާލެ ސަރަހައްދުގެ ބޯހިޔާވަހިކަމުގެ މުހިންމު މަޝްރޫޢުތައްވެސް މިއަހަރު ކުރިއަށް ގެންދަވާނެކަމަށް ރައީސް މުޢިއްޒު ވިދާޅުވިއެވެ. "ރަސްމާލެ" މަޝްރޫޢުގެ ބިން ހިއްކުމުގެ މަސައްކަތް އަވަސްކުރުމަށް އިތުރު ކޮންޓްރެކްޓަރުން ހޯދުމުގެ މަސައްކަތް ކުރިއަށްދާކަމަށާއި، މިކަމުގެ ސަބަބުން ބިން ހިއްކުމުގެ މަސައްކަތް 2 ނުވަތަ 3 ގުނައަށް އަވަސްކުރެވޭނެކަމަށް ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ "ހިޔާވަހި" ލުއި ލޯނު ސްކީމްގެ ދަށުން، އަމިއްލައަށް ގެދޮރު އިމާރާތްކުރުމަށް ބޭނުންވާ ފަރާތްތަކަށް މާލީ އެހީ ދިނުމުގެ މަސައްކަތްވެސް މި އަހަރު ފަށާނެކަމަށެވެ. އަދި ސަރުކާރުން އަމިއްލަ ކޮންޓްރެކްޓަރުންނަށް ދޭންޖެހޭ ހުރިހާ ފައިސާއެއް ކުރިއަށް އޮތް ދެމަސްތެރޭ ދައްކާ ޚަލާސްކުރައްވާނެކަމަށާއި، މިކަމުގެ ސަބަބުން ކުންފުނިތަކުގެ މާލީ ޙާލަތު ރަނގަޅުވެ، އަލުން ހިނގައިގަތުމަށް އެހީއަކަށް ވެގެންދާނެކަމަށްވެސް ވިދާޅުވިއެވެ.

ރައްޔިތުންގެ ފަރާތުން މި މަޝްރޫޢުތަކާމެދު ބޮޑު އުންމީދުތަކެއް ކުރެވޭއިރު، ސަރުކާރުން ވަޢުދުވެވަޑައިގެންފައިވާ ގޮތަށް މި މަޝްރޫޢުތައް ކުރިއަށްގެންދެވޭތޯ ގިނަ ފަރާތްތަކުން ބަލަމުންދާނެކަން ޔަޤީނެވެ. އަދި މި މަޝްރޫޢުތަކުގެ ސަބަބުން ރާއްޖޭގެ ބޯހިޔާވަހިކަމުގެ ދަތިކަމަށް ދާއިމީ ޙައްލެއް ލިބިގެންދާނެކަމަށް ގިނަ ބަޔަކު އުންމީދުކުރާކަންވެސް ފާހަގަކުރެވެއެވެ.