މަގުތަކުން ފެން ހިންދުން އަވަސްކުރުމަށް، މޯބައިލް ޕަމްޕުތަކެއް ގެނައުމުގެ މަސައްކަތް ސަރުކާރުން ފަށައިފި

ވިއްސާރަވެހުމާ ގުޅިގެން މާލޭގެ މަގުތަކުގައި ފެން ބޮޑުވެ، އެކަމުގެ ސަބަބުން އާންމު ދަތުރު ފަތުރަށާއި، މީހުން ދިރިއުޅޭ ގޭގެ އާއި ވިޔަފާރިތަކަށް ގެއްލުންވަމުން ދިއުމާ ގުޅިގެން، އެ މައްސަލައަށް ވަގުތީ ހައްލެއް ހޯދުމަށްޓަކައި މޯބައިލް ޓްރެއިލާ ޕަމްޕުތަކެއް ގެނައުމުގެ މަސައްކަތް ސަރުކާރުން ކުރަމުން އަންނަ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.

މިކަމާ ގުޅިގެން "މިހާރު" ނޫހަށް މިނިސްޓަރު ދެއްވި އިންޓަވިއުއެއްގައި ވިދާޅުވީ، މާލޭގައި ފެންބޮޑުވުމުގެ މައްސަލައަށް ދާއިމީ ހައްލެއް ހޯދެންދެން، އެކަމަށް ވަގުތީ ހައްލެއް ހޯދަންޖެހިފައިވާ ކަމަށާއި، އެގޮތުން މި ވަގުތަށް އެންމެ ރަގަޅު ގޮތަކީ ފެން ހިންދުމުގެ ކެޕޭސިޓީ އިތުރުކުރުން ކަމަށެވެ. 

އަދި ފެން ހިންދުމަށް ބޭނުންކުރާ މޯބައިލް ޓްރެއިލާ ޕަމްޕުތަކެއް ގެނައުމުގެ މަސައްކަތް ފަށާފައިވާ ކަމަށް މިނިސްޓަރ ވިދާޅުވެފައިވެއެވެ. 

އެއްތަނުން އަނެއްތަނަށް ގެންދެވޭ ގޮތަށް ފަރުމާކޮށްފައިވާ މޯބައިލް ޓްރެއިލާ ޕަމްޕު ބޭނުންކޮށްގެން ގަޑިއަކު 600 ޓަނުގެ ފެން ހިއްކޭނެއެވެ. އަދި އޭގެ ފަހެއް ނޫނީ ހަ ޕަންޕު ބޭނުންކޮށްގެން މާލެއިން ފެން ހިންދުމުގެ މަސައްކަތް އެކަށޭނަ ދުވެއްޔެއްގައި ކުރިޔަށް ގެންދެވޭނެކަމަށް މިނިސްޓަރު ދެކެވަޑައިގަންނަވައެވެ. 

ފެންހިންދުމުގެ މަސައްކަތުގައި މިހާރު ވެސް ސިފައިން އޭގެ އެއް ޕަންޕު ބޭނުންކުރެއެވެ. އޭގެ އިތުރުން ވެސް އާދައިގެ ޕަންޕުތައް ސިފައިން އަންނަނީ ބޭނުންކުރަމުންނެވެ. މި ޕަންޕުތަކުގެ އެހީގައި، މިދިޔަ ހުކުރު ދުވަހުވެހުނު ވާރޭގައި ފެން ބޮޑުވުމުން، އެ ދުވަހު 30،000 ޓަނުގެ ފެން ބޭރުކުރިއެވެ. 

މނިސްޓަރ ވިދާޅުވެފައިވާ ގޮތުގައި، މާލޭގައި ފެން ބޮޑުވުމުގެ މައްސަލައަށް ދާއިމީ ހައްލެއް ގެނެވޭނީ، މާލޭގެ މަގުތައް އަލުން ހަދައިގެންނެވެ. އެގޮތުން މާލެ އާއި ވިލިމާލޭގެ ހުރިހާ މަގެއް އަލުން ހެދުމަށް ޗައިނާ ސަރުކާރުން ވަނީ 100 މިލިއަން ޑޮލަރުގެ ހިލޭ އެހީ ހަމަޖައްސައި ދީފައެވެ.