ޚަބަރު
މިއަހަރަކީ ވަޢުދުތައް ފުއްދުމުގެ ޢަމަލީ މަސައްކަތް ކުރެވޭނެ އަހަރެއް : ރައީސް މުޢިއްޒު

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ހޯނޑެއްދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ވިދާޅުވެފައިވަނީ މިއަހަރަކީ ރަށްރަށަށް ވެވަޑައިގެންފައިވާ ވަޢުދުތަކާއި، މެނިފެސްޓޯގައި ހިމަނުއްވާފައިވާ ވަޢުދުތައް ތަރުތީބުން ފުއްދެވުމުގެ ޢަމަލީ މަސައްކަތް ކުރައްވާނެ އަހަރެއް ކަމުގައެވެ.
މި ބައްދަލުވުމުގައި ރައީސް މުޢިއްޒު ވަނީ ހޯނޑެއްދޫއަށް ދިމާވެފައިވާ ރަށްގިރުމާއި އުދައެރުމުގެ މައްސަލައަށް މިއަހަރުގެ ބަޖެޓުން ދާއިމީ ޙައްލެއް ހޯދައިދެއްވާނެކަމަށް ވިދާޅުވެފައެވެ. މީގެއިތުރުން، ތަޢުލީމީ އަދި ޞިއްޙީ ދާއިރާ ކުރިއެރުވުމަށާއި ކުޅިވަރުގެ ވަސީލަތްތައް ޤާއިމުކުރުމަށްވެސް މަސައްކަތްކުރައްވާނެކަމަށް އެމަނިކުފާނު ވިދާޅުވިއެވެ.
ކައުންސިލްތަކަށް އާމްދަނީ ހޯދައިދިނުމަށްޓަކައި، ރަށާ ކައިރި ފަޅުރަށްތަކުގައި އިންޓަގްރޭޓެޑް ޓޫރިޒަމް ހިންގޭނެ ގޮތް ހަމަޖެއްސުމަށް މަސައްކަތްކުރައްވާނެކަމަށްވެސް ރައީސް މުޢިއްޒު ވިދާޅުވިއެވެ.
ހޯނޑެއްދޫގެ އެކިއެކި މައްސަލަތަކަށް ޙައްލު ހޯދައިދެއްވުމަށް ފުރިހަމަ ސަމާލުކަމެއް ދެއްވާނެކަމުގެ ޔަޤީންކަން ރައީސް ދެއްވިއެވެ. އެގޮތުން މިއަހަރުގެ ޕީ.އެސް.އައި.ޕީ މަޝްރޫޢުތަކުގެ ތެރެއިން ގެދޮރުވެރިކަމާއި ތަޢުލީމަށްފަހު މަގުހެދުމަށް އިސްކަންދެއްވާނެކަމަށާއި، ހޯނޑެއްދޫ މަގުހެދުމުގެ ވަޢުދު މިއަހަރާއި މިއަންނަ އަހަރު ފުއްދަވާނެކަމަށް ވިދާޅުވިއެވެ.
މިއަހަރުގެ ބަޖެޓަކީ ގެދޮރުވެރިކަމާއި ހައުސިންގ މަޝްރޫޢުތައް ފެށުމުގެ ބަޖެޓެއްކަން ފާހަގަކުރައްވައި، ހޯނޑެއްދޫގެ ހައުސިންގ މަޝްރޫޢުވެސް ކުރިއަށް ގެންދަވާނެކަމަށް ރައީސް މުޢިއްޒު ވިދާޅުވިއެވެ.
މި ދަތުރުފުޅުގައި ރައީސް މުޢިއްޒު ވަނީ ހޯނޑެއްދޫގެ ފެނާއި ނަރުދަމާ ނިޒާމުގެ މަޝްރޫޢު ރަސްމީކޮށް އިފްތިތާޙުކޮށްދެއްވާފައެވެ. އަދި ބޭންކް އޮފް މޯލްޑިވްސްއިން ހޯނޑެއްދޫގައި އޭ.ޓީ.އެމްއެއް ބެހެއްޓުމަށް އެއްބަސްވުމުގައި ސޮއިކުރެއްވުންވެސް ކުރިއަށް ގެންދެވިއެވެ.