ގދ. ހޯނޑެއްދޫގައި ފެނާއި ނަރުދަމާގެ ޚިދުމަތް ރައީސް ރަސްމީކޮށް ފައްޓަވައިދެއްވައިފި

ގދ. ހޯނޑެއްދޫގައި ފެނާއި ނަރުދަމާ ނިޒާމުގެ ޚިދުމަތް ރައީސުލްޖުމްހޫރިއްޔާ މިއަދު ރަސްމީކޮށް ފައްޓަވައިދެއްވައިފިއެވެ. މި ޚިދުމަތް ފެށިގެން ދިޔައީ ސަރުކާރުން 34 ރަށެއްގައި ފެނާއި ނަރުދަމާ ނިޒާމް ޤާއިމްކުރުމުގެ މަޝްރޫޢުގެ ތެރެއިންނެވެ.

މި މަޝްރޫޢުގެ ދަށުން ހޯނޑެއްދޫގައި ޤާއިމްކުރެވުނު ނިޒާމުގައި ނަރުދަމާގެ 5 ޕަމްޕް ސްޓޭޝަން އަދި ސީ އައުޓް ފޯލް ހިމެނެއެވެ. އަދި މުޅި ރަށުގައި ފެނާއި ނަރުދަމާ ނިޒާމުގެ ވިޔުގަ އަޅާފައިވާއިރު، ދުވާލަކު 75 ޓަނުގެ ފެން އުފެއްދޭ ވަރުގެ 2 އާރު.އޯ ޕްލާންޓް ވަނީ ބަހައްޓާފައެވެ.

މީގެ އިތުރުން، ފެން ރައްކާކުރުމަށް 2 ޓޭންކް ބެހެއްޓުމާއެކު، ރަށުގެ ހުރިހާ ގޭބިސީތަކަށް ފެނާއި ނަރުދަމާގެ ކަނެކްޝަން ގުޅައިދީފައިވާކަން ފާހަގަކުރެވެއެވެ.