ޚަބަރު
ރައީސް މުޢިއްޒަށް ނަޑެއްލާއިން ހޫނު މަރުހަބާއެއް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ދެވަނަ މަންޒިލް ކަމުގައިވާ ނަޑެއްލާއަށް މިއަދު ވަޑައިގަތުމުން އެމަނިކުފާނަށް އެރަށުން ހޫނު މަރުހަބާއެއް ދަންނަވައިފިއެވެ. ރައީސަށް މަރުހަބާ ދެންނެވުމަށްޓަކައި ރަށުގެ ގިނަ ރައްޔިތުން ބަނދަރު ސަރަހައްދަށް އެއްވެފައިވެއެވެ.
މިއަދު ހެނދުނު ރައީސް މުޢިއްޒު ވަނީ ގދ. ހޯނޑެއްދޫއަށްވެސް ޒިޔާރަތްކުރައްވާފައެވެ. މި ދަތުރުފުޅުގައި ނަޑެއްލާގެ ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފައެވެ. އަދި މި ބައްދަލުވުމުގެ ތެރެއިން ނަޑެއްލާގައި ބޭންކް އޮފް މޯލްޑިވްސްގެ އޭޓީއެމް ބެހެއްޓުމުގެ މަސައްކަތް އެރަށު ކައުންސިލާ ހަވާލުކުރުމުގެ އެއްބަސްވުމުގައި ސޮއިކުރުން އޮންނާނެކަމަށް ވެއެވެ.
ރައީސް މުޢިއްޒުގެ މި ދަތުރުފުޅުގައި ހުވަދު އަތޮޅުގެ 9 ރަށަކަށް ވަޑައިގަންނަވާނެއެވެ. ހުވަދުއަތޮޅު ދެކުނުބުރިން ވާދޫ، ފިޔޯރީ އަދި ރަތަފަންދޫއަށް ވަޑައިގަންނަވާއިރު، ހުވަދުއަތޮޅު އުތުރުބުރިން ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށް ވަޑައިގަންނަވާނެއެވެ.
މި ދަތުރުފުޅަކީ ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި އަތޮޅު، ރަށު އަދި ސިޓީ ކައުންސިލުތަކާ ބައްދަލުކުރެއްވުމަށް މިދިޔަ އަހަރު ފަށްޓަވައިގެން ކުރިއަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނޭ ދަތުރުފުޅެކެވެ. މި ދަތުރުފުޅުތަކުގެ މަޤްޞަދަކީ ރައްޔިތުންގެ ޙާލު ބެއްލެވުމާއި، ރަށްރަށުގެ ތަރައްޤީއަށް ބޭނުންވާ ކަންކަން ދެނެގަތުމެވެ.