ރައީސް މުޢިއްޒު ހުވަދުއަތޮޅު ދަތުރުފުޅުގައި ވާދޫއަށް ވަޑައިގަތުމުން ހޫނު މަރުޙަބާއެއް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ހުވަދުއަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން މިއަދު ގދ. ވާދޫއަށް ވަޑައިގެންފިއެވެ. މިއީ މިއަދު އެމަނިކުފާނު ވަޑައިގެންނެވި 3 ވަނަ ރަށެވެ.

ރައީސުލްޖުމްހޫރިއްޔާ ވާދޫއަށް ވަޑައިގަތުމުން އެމަނިކުފާނަށް އެރަށުން ހޫނު މަރުހަބާއެއް ދަންނަވައިފިއެވެ. އެމަނިކުފާނަށް މަރުހަބާ ދެންނެވުމަށްޓަކައި ރަށުގެ ގިނަ ބަޔަކު ވަނީ ބަނދަރު ސަރަހައްދަށް އެއްވެފައެވެ.

މިއަދު ހެނދުނު ރައީސް މުޢިއްޒު ވަނީ ގދ. ހޯނޑެއްދޫ އާއި ނަޑެއްލާއަށްވެސް ވަޑައިގެންފައެވެ. ރައީސުލްޖުމްހޫރިއްޔާގެ މި ދަތުރުފުޅުގައި ވާދޫ ރައްޔިތުންނާ ބައްދަލުކުރެއްވުމަށްވަނީ ހަމަޖެހިފައެވެ.

ރައީސްގެ މި ދަތުރުފުޅުގައި ވާދޫ ހިމެނޭހެން ހުވަދު އަތޮޅުގެ 9 ރަށަކަށް ވަޑައިގަންނަވާނެއެވެ. އެގޮތުން ހުވަދުއަތޮޅު ދެކުނުބުރިން ރައީސުލްޖުމްހޫރިއްޔާ ދެން ވަޑައިގެންނެވުމަށް ހަމަޖެހިފައިވަނީ ފިޔޯރީ އަދި ރަތަފަންދޫއަށެވެ. ހުވަދުއަތޮޅު އުތުރުބުރިން އެމަނިކުފާނު ވަޑައިގެންނެވުމަށް ހަމަޖެހިފައިވަނީ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.

މި ދަތުރުފުޅުގައި ރައީސް މުޢިއްޒު ވަޑައިގަންނަވާ ރަށްރަށުގެ ރައްޔިތުންނާ ބައްދަލުކުރައްވައި، އެ ރަށްރަށުގެ ތަރައްޤީގެ މަޝްރޫޢުތަކާ ގުޅޭގޮތުން މަޝްވަރާކުރައްވާނެ ކަމަށް ބެލެވެއެވެ. މީގެ އިތުރުން، ރަށްރަށުގެ ރައްޔިތުންގެ ކަންބޮޑުވުންތަކާއި އެދުންތަކަށް އަޑުއެއްސެވުމަށްވެސް މި ދަތުރުފުޅުގައި ފުރުޞަތު ލިބިވަޑައިގަންނަވާނެއެވެ.