3000 ޓަނުގެ ކޯލްޑް ސްޓޯރޭޖާއެކު ފިޔޯރީގައި މަސް ފެކްޓްރީއެއް އެޅުމަށް ފެބުރުއަރީ މަހު ޗައިނާގެ ކުންފުންޏަކާ ހަވާލުކުރަނީ

މަސްވެރި ރަށެއްކަމުގައިވާ ފިޔޯރީގެ ރައްޔިތުން ކޫއްޑޫއަށް މަސްކިރުމަށް ކުރަންޖެހޭ އުނދަގޫ ދަތުރަށް އިޝާރާތްކުރައްވައި އެ ރަށުގައި 3000 ޓަނުގެ ކޯލްޑް ސްޓޯރޭޖާއެކު، މަސް ފެކްޓްރީއެއް އެޅުމަށް އަންނަ ފެބުރުއަރީ މަހު ޗައިނާގެ ކުންފުންޏަކާއި ހަވާލުކުރައްވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، އެ މަނިކުފާނު އިއްޔެ ހުވަދު އަތޮޅަށް ފެއްޓެވި ދަތުރުފުޅުގައި ފިޔޯރީއަށް ވަޑައިގެން އެ ރަށުގެ ރައްޔިތުންނާ މުޙާތަބުކުރައްވައި ދެއްކެވި ވާހަކަ ފުޅުގައެވެ.

އެގޮތުން، ފެބުރުއަރީ މަހުގައި މި ފެކްޓްރީ ޤާއިމްކުރުމުގެ އެއްބަސްވުމުގައި ސޮއިކުރެވިގެންދާއިރު، އެ މަޝްރޫޢުގެ އަމަލީ މަސައްކަތް ސޮއިކުރާތާ ދެ ހަފްތާގެ ތެރޭގައި ފެށިގެން ދާނެކަަމުގެ ޔަޤީންކަން ވަނީ ރައީސުލްޖުމްހޫރިއްޔާ ދެއްވާފައެވެ. މި ޔަޤީންކަން ދެއްވަމުން އެ މަނިކުފާނު ވިދާޅުވީ، ފުއްދަވައިދެއްވޭނޭކަމުގެ ޔަޤީންކަން އޮވެގެން މެނުވީ އެ މަނިކުފާނު ވަޢުދެއް ވެވަޑައިނުގަންނަވާނޭކަމަށެވެ.

ފިޔޯރީގައި ބިނާކުރުމަށް ނިންމާފައިމިވާ މަސްފެކްޓްރީގައި އެއްފަހަރާ 3000 ޓަނުގެ މަސް ރައްކާ ކުރެވޭއިރު، އެ ފެކްޓްރީގައި ދުވާލަކު 100 ޓަނުގެ ދަޅުމަސް ބަންދުކުރެވޭނެއެވެ. މީގެ އިތުރުން އެ ތާންގައި 50 ޓަނުގެ އައިސްޕްލާންޓެއް ހިމެނޭނެކަމަށް ވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. 

މި ކަމުގެ އިތުރުން ރައްޔިތުންގެ ހުރި ކަންބޮޑުވުންތަކަށް އިޝާރާތްކުރައްވައި އެ މަނިކުފާނު ވިދާޅުވީ، އެ ރަށު ސްކޫލްގައި މަލްޓިޕާޕަސް ހޯލަކާއި، ކްލާސް ރޫމާއި އަދި ލެބޯޓްރީއެއް ޤާއިމްކުރައްވާނެ ކަމަށެވެ. އަދި އެ ރަށުގެ ކުނި ނައްތާލުމުގެ މަސައްކަތާއި އޭ.ޓީ.އެމްއެއް ބެހެއްޓުމުގެ މަސައްކަތް ވެސް ކުރިޔަށް ގެންދަވާނެކަމަށް ވަނީ ވިދާޅުވެފައެވެ.