ކައުންސިލްތަކުގައި ފުލްޓައިމްކޮށް ތިބޭނެ ބަޔަކީ ރައީސް އާއި ނައިބް ރައީސްކަމަށް ހެދުމާ ގުޅޭ ޚިޔާލަށް ރައީސުލްޖުމްހޫރިއްޔާ ހުޅުވާލައްވައިފި

ކައުންސިލްތަކުގެ އިދާރީ ހިންގުމަށް ކުރެވޭ ޚަރަދު ކުޑަކުރުމުގެ ގޮތުން، ކައުންސިލްތަކުގައި ފުލްޓައިމްކޮށް ތިބޭނެ ބަޔަކީ ރައީސްއާއި ނައިބް ރައީސްކަމަށް ހަދައި، ދެން ތިބޭ ކައުންސިލަރުންނަށް ކޮންމެ ޖަލްސާއަކަށް އެލަވެންސް އެއް ލިބޭގޮތަށް ހެދުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއަށް ފެނިވަޑައިގަންނަވާކަމުގައި ވިދާޅުވެ، އެކަމުގައި އާންމުންގެ މެދުގައި މަޝްވަރާކޮށް ޚިޔާލު ހުށަހެޅުމަށް ހުޅުވާލައްވައިފިއެވެ. 

އަންގާރަ ދުވަހުގެރޭ ގދ. ފިޔޯރީގެ ރައްޔިތުންނާ ވާހަކަފުޅު ދައްކަވަމުން އެ މަނިކުފާނު ވިދާޅުވީ، ކުރިން ކައުންސިލްތަކުގެ އަދަދު މަދުކުރުމުގެ ޚިޔާލު ފާޅުކޮށްފައިވީނަމަވެސް، އެ ކަމުގައި އޮތް އެއް ކަންބޮޑުވުމަކަށްވީ ކައުންސިލަރުންގެ އަދަދު މަދުކޮށްފިނަމަ ޑިމޮކްރެޓިކް ރިޕްރެޒެންޓޭޝަނަށް އަސަރު ކޮށްފާނޭކަމުގެ ކަންބޮޑުވުމެވެ. އެހެންކަމުން، ފުލްޓައިމްކޮށް މަސައްކަތް ކުރާނެ ބަޔަކީ ކައުންސިލްގެ ރައީސްއާއި ނައިބް ރައީސް ކަމުގައި ހަދައި، އަދި ހަމަ މިހާރުވެސް ތިބޭ އަދަދަށް ކައުންސިލަރުން އިންތިޚާބުކޮށްފިނަމަ، ޑިމޮކްރެޓިކް ރިޕްރެޒެންޓޭޝަނަށް އަސަރު ކުރާނެ ފުރުސަތެއް ނޯންނާނެކަމަށް އެ މަނިކުފާނު ވިދާޅުވިއެވެ.

އަދި މިކަން މިގޮތަށް ކުރުމަށް، ރައީސް ކަމަށް ކުރިމަތިލާފައިތިބޭ މީހުންގެ ގޮތުގައި ރަނިންގ މޭޓެއް ކުރިމަތިލައިގެން އެމީހާއާ އެކުގައި ވޯޓުލައިގެންވެސް ކުރިއަށް ގެންދެވިދާނެކަމަށާއި،  އޭރުން އެއް ޚިޔާލެއްގެ އަދި އެއް ސިޔާސީ ފިކުރެއްގެ ދެމީހުން އައުމުގެ ފުރުސަތުވެސް ލިބޭނެކަމުގައި އެމަނިކުފާނު ފާހަގަކުރެއްވިއެވެ. 

ކައުންސިލަރުންނެކޭ އެއްގޮތަށް، ރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީވެސް ބަދަލުކުރެވިދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން އެ ކޮމެޓީތަކުގެ ރައީސާ އާއި ނައިބު ރައީސާ އެއީ ފުލްޓައިމްކޮށް މަސައްކަތްކުރާ ދެ މީހުންނަށް ހަދައި، ދެންތިބި މެންބަރުންނަކީ ބައްދަލުވުމުގައި ބައިވެރިވާ ދުވަސްތަކަށް އެލަވެންސް ލިބޭ ފަރާތްތަކަށް ހެދިދާނެކަމުގައި އެމަނިކުފާނު ވިދާޅުވިއެވެ.

މިގޮތަށް މިކަން ބަދަލުކޮށްފިނަމަ ދެން އޮވެދާނެ ކަންބޮޑުވުމަށް ވެސް އެ މަނިކުފާނު ވަނީ ހައްލެއް ހުށަހަޅުއްވާފައެވެ. އެގޮތުން އ.ތ.މ ކޮމިޓީތަކަށް ގެންނަން ނިންމާފައިވާ ޤާނޫނީ އިސްލާހުތަކާ އެއްގޮތަށް، ޕާޓްޓައިމްކޮށް މަސައްކަތްކުރާ ކައުންސިލަރުންނަށް އެ ލިބޭ އެލަވެންސަކީ ވެސް ހަމަ މުސާރައިގެ ސްޓޭޓަސް އޮންނަ އެލަވެންސަކަށް ޤާނޫނުގައި ހެދުމުން އެ ލިބެންޖެހޭ އިނާޔަތްތައް ލިބޭނޭކަމުގައި އެމަނިކުފާނު ވިދާޅުވިއެވެ. 

މި ޚިޔާލު ރައީސުލްޖުމްހޫރިއްޔާ ހުށަހެޅުއްވީ ސިޓީ ކައުންސިލްތައް ވެސް ހިމެނޭ ހެންނެވެ. 

މި ކަމުގައި ރައްޔިތުންނަށް ފެންނަ ޚިޔާލެއް ހުށަހެޅުއްވުމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ.