Ads by Exprox

ޚަބަރު

ގޮންޖެހުންތަކާ ކުރިމަތިލާންޖެހުނު ނަމަވެސް ފިކުރީ ތަރައްޤީ ގެނައުމަށް ހިއްވަރާއެކު މަސައްކަތްކުރާނަން: ރައީސުލްޖުމްހޫރިއްޔާ

ގޮންޖެހުންތަކާ ކުރިމަތިލާންޖެހުނު ނަމަވެސް ފިކުރީ ތަރައްޤީ ގެނައުމަށް ހިއްވަރާއެކު މަސައްކަތްކުރާނަން: ރައީސުލްޖުމްހޫރިއްޔާ

ހުވަދުއަތޮޅަށް ރައީސުލްޖުމްހޫރިއްޔާ ކުރައްވަމުންގެންދަވާ ދަތުރުފުޅުގެ ތެރެއިން

މިފްތާޙް މުޙައްމަދު

މިފްތާޙް މުޙައްމަދު

08 ޖެނުއަރީ 2025، 10:46

08 ޖެނުއަރީ 2025، 10:46

ހުލާސާ

ވަށާޖެހޭ ތަރައްޤީ ހާސިލްކުރުމަށް މުޅި މުޖުތަމަޢުއެކީ މަސައްކަތް ކުރުމުގެ މުހިންމުކަމަށް އިޝާރާތްކުރައްވައި، އެކަމުގައި އެންމެން އެކައްޗެއް ކިޔުމަށް ވަނީ އެދިވަޑައިގެންފައި.

ވަށާޖެހޭ ތަރައްޤީއަކީ އުމްރާނީ ތަރައްޤީއާ އެކުއެކީ ފިކުރީ ތަރައްޤީ ގެނައުން ކަމަށާއި، މިކަން ތަންފީޒުކުރުމުގައި ގޮންޖެހުންތަކާ ކުރިމަތިލާންޖެހުނު ނަމަވެސް، ހިއްވަރާއެކު އެކަން ހާސިލްކުރުމަށް މަސައްކަތްކުރައްވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ހުވަދު އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އަންގާރަ ދުވަހު ގދ. ވާދޫގެ ރައްޔިތުންނާ މުޙާތަބުކޮށް ވާހަކަފުޅު ދައްކަވަމުން، ވަށާޖެހޭތަރައްޤީގެ ސިފަތަކަށް އަލިއަޅުވާލައްވަމުންނެވެ.

އަޅުގަނޑު އަބަދުވެސް ދަންނަވާ ވާހަކައެއް، ތަރައްޤީއަކީ ވަރަށް ފުޅާ އެއްޗެކޭ. ތަރައްޤީއަކީ ހަމައެކަނި ލޮލަށް ފެންނަ އަތުން ހިފޭ މަޝްރޫޢުތަކެއް އެކަންޏެއް ނޫން. ތަރައްޤީގެ ތެރޭގައި އަޅުގަނޑުމެންގެ ސިކުނޑި ތަރައްޤީކޮށް، އަޅުގަނޑުމެންގެ އަޚްލާޤު ރަގަޅުކޮށް، ދަރިންހެޔޮގޮތުގައި ތަރުބިއްޔަތުކޮށް، އަޅުގަނޑުމެންގެ މުޖުތަމައަކީ ހެޔޮކަންކަމަށް އަމުރުކޮށް ނުބައިކަންކަން ނަހީކުރާ މުޖުތަމައަކަށް ބަދަލުކުރުން ހިމެނޭ.

ވަށާޖެހޭ ތަރައްޤީ ސިފަކުރައްވަމުން ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ވަށާޖެހޭ ތަރައްޤީ ހާސިލްކުރުމަށް މުޅި މުޖުތަމަޢުއެކީ މަސައްކަތް ކުރުމުގެ މުހިންމުކަމަށް އިޝާރާތްކުރައްވައި، އެކަމުގައި އެންމެން އެކައްޗެއް ކިޔުމަށް ވަނީ އެދިވަޑައިގެންފައެވެ. 

މީގެ އިތުރުން، މުޖުތަމަޢުގައި ހުރި ނުރަނގަޅު އާދަތައް ރަގަޅު ކުރުމަކީ ވެސް ތަރައްޤީގެ ބައެއްކަމަށް ރައީސުލްޖުމްހޫރިއްޔާ ވިދާޅުވިއެވެ.

އަޅުގަނޑުމެންގެ ލޯ ކުރިމަތިން ގޯސް ކަމެއް ފެނުނީމަ އެކަމަކަށް ނޫނެކޭ ބުނަން ކެރޭ ބަޔަކަށް ވާންޖެހޭ. ޒަމާންތަކެއް ވަންދެން ވަކިކަމެއް ގޯސްކޮށް ހިނގުމަކީ، ދެން އެކަމެއް ދޫކޮށްލައިގެން ތިބެންޖެހޭނެކަމެއް ނޫންކަމުގައި އަޅުގަނޑުމެންގެ ހިތުގައި ކަނޑައަޅާ، އެކަން އަމަލުން ދައްކަން އެބަޖެހޭ. ސަރުކާރުން މިއޮތީ އެގޮތުގައި ކުރިޔަށްދާން.

ރަގަޅު މުޖުތަމައެއް ބިނާކުރުމަށް އަޒުމް ކަނޑައެޅުމަށް ގޮވާލައްވަމުން ރައީސުލްޖުމްހޫރިއްޔާ ވިދާޅުވިއެވެ.

އަދި ރާއްޖޭގައި ދުންފަތް މަނާކުރުމަށް ކުރައްވާ މަސައްކަތަށް އަލިއަޅުވާލައްވަމުން ރައީސުލްޖުމްހޫރިއްޔާ ވިދާޅުވީ، މިކަމަކީ ރައްޔިތުންނަށް އުނދަގޫ ކުރުމަށް ކުރާކަމެއް ނޫންކަމަށާއި، އެފަދަ ނުބައި ވަބާތަކުން ޤައުމު ސަލާމަތްކުރައްވަން މަސައްކަތްކުރައްވާނެ ކަމަށެވެ.

ވަރަށް އުނދަގޫ ބައެއް ނިންމުންތައް ހަމަ މި ވިސްނުމުގައި، ކުރިޔަށް އޮތް މުސްތަޤްބަލަށްޓަކާ، އަޅުގަނޑުމެންގެ ޖީލުތައް ސަލާމަތްކޮށްދީ، ވަށާޖެހޭ ތަރައްޤީއަކުން ތަރައްޤީ ހާސިލްކޮށްދިނުމަށްޓަކާ، ހަޤީޤީ މާނައިގައި ތަރައްޤީވެފައި އޮތް ދިވެހިރާއްޖެއަކަށް ހަދައިދިނުމަށްޓަކާ، ނިންމަމުން މިދަނީ. އެއީ އެކިއެކި ވަބާތަކުން ޤައުމު ސަލާމަތްކުރުމާއި، އަޅުގަނމެންގެ ތެރޭގައި ދެވިހިފާފައި ހުރި ބައެއް އާދަތަކުން ވެސް އަޅުގަނޑުމެން ހިއްވަރުލާފައި ސަލާމަތްކުރުމުގެ ނިޔަތުގަ ކުރާ ކަންކަން. އެއްގޮތަކަށް ވެސް އެއީ ރައްޔިތުންނަށް އުނދަގޫ ކުރަންކުރާ ކަންކަމެއް ނޫން.

ދުންފަތުން ދުރުކުރުމުގެ މަޤްސަދު ހާމަކުރައްވަމުން ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން މިދާޅުވީ، ވަށާޖެހޭ ތަޢުލީމު ހާސިލްކުރުމަށް އެންމެން އެކުއެކީ މަސައްކަތްކުރުން މުހިންމު ކަމަށާއި، އަދި އެއީ ސަރުކާރުގެ ވިސްނުންފުޅުކަމަށް ވެސް އެ މަނިކުފާނު ވިދާޅުވިއެވެ. 

މި ލިޔުން ކިޔާލުމުން

Ads by MSS