ރަށްރަށުގެ މަޝްރޫޢުތައް އަވަސްކުރުމަށް ބޮޑު ހިލަ ބަލްކުކޮށް ގެނައުމަށް ރައީސް ނިންމަވައިފި

ރާއްޖޭގެ ރަށްރަށުގައި ހުއްޓިފައިވާ ތަރައްޤީގެ މަޝްރޫޢުތައް އަވަހަށް ކުރިއަށް ގެންދިޔުމަށްޓަކައި، ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެ ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. މި ނިންމެވުން ރައީސް ހާމަކުރެއްވީ މިއަދު ގދ. ރަތަފަންދޫއަށް ކުރެއްވި ދަތުރުފުޅެއްގައި އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް މުޢިއްޒު ވިދާޅުވި ގޮތުގައި، ރަށްރަށުގެ ބިން ހިއްކުމާއި ބަނދަރު ހެދުމުގެ މަސައްކަތްތައް ހުއްޓިފައިވާ އެންމެ ބޮޑު އެއް ސަބަބަކީ ބޮޑު ހިލަ ނުލިބުމެވެ. މި މައްސަލަ ހައްލުކުރުމަށްޓަކައި، ބަލްކުކޮށް ބޮޑު ހިލަ ގެނައުމަށް ނިންމަވާފައިވާ ކަމަށް ރައީސް ހާމަކުރެއްވިއެވެ. އަދި މިކަމާ ގުޅޭގޮތުން ކުންފުނިތަކާއި، މާލީ ވަޒީރާއި، އިމާރާތްކުރުމާ ބެހޭ ވަޒީރާ އެކު މަޝްވަރާކުރައްވާފައިވާ ކަމަށްވެސް ވިދާޅުވިއެވެ.

ބަނދަރުތަކާއި ރަށްގިރުމުގެ މައްސަލައާއި ބިންހިކުމާއި ތޮށިލުމާއި މިހެން ހުރި ކަންކަމަށް ބޭނުންވާ ހިލަ ނުލިބުމުން މަސައްކަތް ހުއްޓިފައި ހުރޭ. އެހެންކަމުން ބޮޑު ހިލަ ގެނައުމަށް އެކަން ކުރާނެ ގޮތްތަކެއް ވަނީ ރާވާފައި. ފައިސާވެސް ވަނީ ހަމަޖައްސާދީފައި

ރައީސް މުޢިއްޒު 

ރާއްޖޭގެ އެކި ސަރަހައްދުތަކުގައި ތަރައްޤީގެ ގިނަ މަޝްރޫޢުތަކެއް ފަށާފައިވާއިރު، މީގެ ތެރޭގައި ބަނދަރު ހެދުމާއި، ހިއްކި ސަރަހައްދު ހިމާޔަތްކުރުމާއި، ގޮނޑުދޮށް ހިމާޔަތްކުރުމުގެ މަސައްކަތްތައް ހިމެނެއެވެ. ނަމަވެސް، މި މަޝްރޫޢުތަކުގެ ތެރެއިން ބައެއް މަޝްރޫޢުތައް ހުއްޓިފައިވަނީ ރާއްޖެއިން ބޭރުން ގެންނަންޖެހޭ ސާމާނު ލިބުން ލަސްވުމާއި ނުލިބުމުގެ ސަބަބުންނެވެ.