ރައީސް މުޢިއްޒު ކަނޑުހުޅުދޫއަށް: ރަށުގެ ރައްޔިތުން ހޫނު މަރުޙަބާއެއް ދެއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު އެއަތޮޅު އުތުރުބުރީ ކަނޑުހުޅުދޫއަށް ވަޑައިގެންފިއެވެ. ރައީސް ކަނޑުހުޅުދޫއަށް ވަޑައިގަތުމުން އެ ރަށުގެ ރައްޔިތުން ވަނީ އެމަނިކުފާނަށް ހޫނު މަރުޙަބާއެއް ކިޔާފައެވެ.

ރައީސް މުޢިއްޒުގެ މި ދަތުރުފުޅަކީ އިއްޔެ ފެށިގެން ކުރިއަށްދާ ދަތުރުފުޅެކެވެ. މި ދަތުރުފުޅުގައި ހުވަދުއަތޮޅުގެ 9 ރަށަކަށް ވަޑައިގަންނަވާއިރު، ކަނޑުހުޅުދޫއަކީ ރައީސް ވަޑައިގަންނަވާ 6 ވަނަ ރަށެވެ. އިއްޔެ ރައީސް ވަނީ ހުވަދުއަތޮޅު ދެކުނުބުރީގެ ހޯނޑެއްދޫ، ނަޑެއްލާ، ވާދޫ އަދި ފިޔޯރީއަށް ވަޑައިގެންފައެވެ. އަދި މިއަދު ރަތަފަންދޫއަށްވެސް ވަނީ ވަޑައިގެންފައެވެ.

ކަނޑުހުޅުދޫގައި ރައީސް މުޢިއްޒު ވަނީ އެރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިތުރުން ރަށުގެ ރައްޔިތުންނާ ބައްދަލުކުރައްވާނެ ކަމަށް ހަމަޖެހިފައެވެ. މީގެ އިތުރުން، އެ ރަށުގައި ބީއެމްއެލް އޭޓީއެމް ގާއިމްކުރުމުގެ އެއްބަސްވުމުގައި ސޮއިކުރެއްވުމަށްވެސް ވަނީ ހަމަޖެހިފައެވެ.

ރައީސް މުޢިއްޒުގެ މި ދަތުރުފުޅުގައި ކަނޑުހުޅުދޫގެ އިތުރުން ހުވަދުއަތޮޅު އުތުރުބުރީގެ ނިލަންދޫ، މާމެންދޫ އަދި ދެއްވަދޫއަށްވެސް ވަޑައިގަންނަވާނެ ކަމަށް ވަނީ ހާް ވަނީ ހާމަކުރައްވާފައެވެ. މި ދަތުރުފުޅުގެ މައިގަނޑު މަޤްޞަދަކީ ރަށްރަށުގެ ރައްޔިތުންނާ ބައްދަލުކުރައްވައި، އެ ރަށްރަށުގެ ތަރައްޤީއާ ގުޅޭ ކަންކަމާ ބެހޭގޮތުން މަޝްވަރާކުރެއްވުމެވެ.