މާމެންދޫގެ ނަރުދަމާގެ މައްސަލަ ހައްލުކޮށްދެއްވުމަށް ރައީސުލްޖުމްހޫރިއްޔާ ވަޢުދުވެވަޑައިގެންފި

ހުވަދުއަތޮޅު އުތުރުބުރީ މާމެންދޫގެ ނަރުދަމާގެ މައްސަލަ ހައްލުކުރުމަށްޓަކައި، އެ މަސައްކަތް ލަސްތަކެއް ނުވެ ފަށާ، ބާރު ސްޕީޑުގައި ގެންގޮސް، އަވަހަށް ނިންމަވައި ދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ ރަށުގެ ރައްޔިތުންނަށް ދެއްވައިފިއެވެ.

އެ މަނިކުފާނު އެ ރަށުގެ ރައްޔިތުންނަށް މި ޔަޤީންކަން ދެއްވީ، މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި އެ ރަށަށް ވަޑައިގެން ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.

މިއާއެކު، ދެން އެ ރަށަށް ބޭނުންވާ މަގުހެދުމުގެ މަސައްކަތް ވެސް ފައްޓަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ. އެގޮތުން، މަގުހެދުމުގެ މަސައްކަތް ފެށޭނީ ނަރުދަމާ އެޅުމަށްފަހުކަމަށާއި، އެ ހަވާލުކޮށް އެއްބަސްވުމުގައި ސޮއިކޮށްފައިވާކަމަށް ވެސް އެ މަނިކުފާނު ވަނީ ވިދާޅުވެފައެވެ.

މީގެ އިތުރުން، އެރަށު ކައުންސިލާއެކު އޮތް ބައްދަލުކުރެއްވުމުގައި ފާހަގަކުރެއްވި އެންމެ ބޮޑު އެއް މައްސަލަ ކަމުގައިވާ، ރަށް ގިރާ މައްސަލަ ޙައްލުކުރުމަށް މިހާރުން މިހާރަށް މަސައްކަތް ފައްޓަވާނެކަމަށް ވަނީ ވިދާޅުވެފައެވެ. އެގޮތުން، މި މައްސަލައަށް ކައުންސިލުން ހުށަހަޅާފައިވާ ޙައްލު ރަގަޅު ކަމަށާއި، އެ މައްސަލައަށް ދާއިމީ ޙައްލެއް ހޯދައިދެވެންދެން ކައުންސިލާ ގުޅިގެން ކޮންސްޓްރަކަޝަން މިނިސްޓްރީން ކުރިއަށް މިއޮތް ދުވަސްތަކުގައި ވަގުތީ ހައްލެއްގެ މަސައްކަތް ކުރިޔަށް ގެންދަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

އެހެންކަމުން މާމެންދޫ ރައްޔިތުން އެންމެ ކަންބޮޑުވާ ނަރުދަމާގެ މައްސަލައާއި ރަށް ގިރުމުގެ މައްސަލައަށް ސަމާލުކަން ދެއްވައި، މި މައްސަލަތަކަށް ހައްލު ހޯދުމަށް ސަރުކާރުން ފުރިހަމަ އެއްބާލުން ދެއްވާނެކަމަށް ވެސް އެ މަނިކުފާނު ވަނީ ވިދާޅުވެފައެވެ. 

އަދި މީގެ އިތުރުން، އެ ރަށުގެ ސިއްޙީ މަރުކަޒުގެ ފެންވަރު ރަގަޅުކޮށް، އެ ތަނަކީ 24 ގަޑިއިރު ޙިދުމަތްދޭނެ ތަނަކަށް ހައްދަވާނެކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން ސްކޫލްގެ މަލްޓިޕާޕަސް ހޯލުގެ މަސައްކަތާއި، ޒުވާނުންގެ ވޮލީ ކޯޓުގެ މަސައްކަތް އަލުން ފަށައި ނިންމަދިނުމާއި، ފުޓްސަލް ދަނޑުގެ މަރާމާތުގެ މަސައްކަތް ކުރުމާއި، ފުޓްބޯޅަ ދަނޑުގައި ޓަރފް އެޅުންފަދަ ކަންކަން މި އަހަރު ތެރޭގައި ކަމާބެހޭ ވުޒާރާ މެދުވެރިކޮށް ފަށްޓަވައިދެއްވާ ކުރިއަށްގެންދަވާނެ ކަމުގައި ވެސް އެ މަނިކުފާނު ވިދާޅުވިއެވެ.