ދެއްވަދޫގެ ތަރައްޤީއަށް މުހިންމު މަޝްރޫޢުތަކެއް މިއަހަރު ފަށަނީ

ގއ. ދެއްވަދޫގެ ބަނދަރާއި، ރަށްގިރުމުގެ މައްސަލައާއި، ކުނި މެނޭޖްކުރުމުގެ މައްސަލައަށް ވަށާޖެހޭ ހައްލެއް މިއަހަރުގެ ބަޖެޓުގެ ތެރެއިން ގެނެސްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ހުވަދު އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ދެއްވަދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް މުޢިއްޒު ވިދާޅުވީ ދެއްވަދޫގެ ރައްޔިތުންގެ އުއްމީދުތަކާއި ގުޅިފައިވާ ކަންކަމަށް ޚާއްސަ އިސްކަމެއް ދެއްވައިގެން ރަށުގައިހުރި މައްސަލަތަކަށް ޙައްލު ހޯއްދަވައިދެއްވުމުގެ މަސައްކަތް ކުރައްވާނެކަމަށެވެ. މިގޮތުން، ރަށްގިރުމުގެ މައްސަލައަށް ބަނދަރު ތަރައްޤީކުރުމުގެ މަޝްރޫޢުގެ ދަށުން ދެމެހެއްޓެނިވި ހައްލެއް ހޯއްދަވައިދެއްވާނެކަމަށް ވިދާޅުވިއެވެ.

އަދި ކުނީގެ މައްސަލަ ހައްލުކުރުމަށްޓަކައި ރަށުގެ ބިން ހިއްކައިގެން، އިތުރުކުރެވޭ ބިމުގައި ދާއިމީ ކުނި ކޮށްޓެއް ތަރައްޤީކުރުމަށް ސަރުކާރުގެ އެއްބާރުލުން ލިބޭނެކަމަށްވެސް ވިދާޅުވިއެވެ.

މީގެއިތުރުން، ރައީސް މުޢިއްޒު ވަނީ ދެއްވަދޫގެ ސިއްޙީ އަދި ތަޢުލީމީ ދާއިރާއަށް މުހިންމު ކަންތައްތަކެއް ކޮށްދެއްވާނެކަންވެސް ފާހަގަކުރައްވާފައެވެ. މިގޮތުން، ސިއްޙީ މަރުކަޒުގައި އިތުރު ވަސީލަތްތައް ޤާއިމުކުރުމާއި، ކުޑަކުދިންގެ ޑޮކްޓަރެއް ހޯދުމާއި، އެކްސްރޭ ޚިދުމަތް ފޯރުކޮށްދިނުން ހިމެނެއެވެ. އަދި ސީ އެމްބިއުލާންސްގެ ޚިދުމަތް މިހާރަށްވުރެ ފުޅާކުރުމަށް މަސައްކަތް ކުރައްވާނެކަމަށްވެސް ވިދާޅުވިއެވެ.

ރައީސް އިތުރަށް ވިދާޅުވީ ދެއްވަދޫ އައިސްޕްލާންޓް މަރާމާތުކޮށް އިތުރު އައިސްޕްލާންޓެއް ޤާއިމުކުރުމުގެ މަސައްކަތް މަސްވެރިކަމާބެހޭ ވުޒާރާއިން ކުރައްވަމުންގެންދަވާކަމަށެވެ. މަސްވެރިކަމުގެ ސިނާޢަތަކީ ރާއްޖޭގެ އިޤްތިސާދުގައި މުހިންމު ސިނާޢަތެއްކަމަށާއި، ކުރިމަގުގައި މިއީ ޤައުމީ އުފެއްދުންތެރިކަމުގެ ނިސްބަތުން ވަރުގަދަ ސިނާޢަތަކަށް ވެގެންދާނެކަމަށް ރައީސް ފާހަގަކުރެއްވިއެވެ.