ސިޔާސީ ވާދަވެރިކަމުގެ ތެރެއިން ބަޔަކު ހައްޔަރުކުރުމަކީ ޤަބޫލުކުރާކަމެއް ނޫން: ރައީސުލްޖުމްހޫރިއްޔާ

ސިޔާސީ ވާދަވެރިކަމުގެ ތެރެއިން ބަޔަކު ހައްޔަރުކުރުމަކީ ޤަބޫލުފުޅުކުރައްވާކަމެއް ނޫން ކަމަށާއި ކުރިއަށް އޮތް ތަނުގައިވެސް ބަޔަކަށް ސިޔާސީ އަނިޔާއެއް ނުދެއްވާނެ ކަމަށާ، ބަދަލު ހިއްޕެވުމެއްވެސް ނޯންނާނެ ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި ގއ. މާމެންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.

ޤައުމުގެ ހަމަޖެހުން ޤާއިމްކުރައްވަން ރައީސުލްޖުމްހޫރިއްޔާ އަހައްމިއްޔަތުކަން ދެއްވާ މިންވަރު ހާމަކުރައްވަމުން ވިދާޅުވީ، މިދިޔަ 14 ވަރަކަށް މަސްދުވަހަށް ބަލާއިރު މި ދިވެހިރާއްޖޭގައިވެސް އެ ހަމަޖެހުން ޤާއިމު ކުރެވިފައިވާކަމަށާ، އެކަން އެގޮތުގައި މިއޮތީ ބަދަލުހިފުމުގެ ރޫޙުގައި އެއްވެސް ކަމެއް ހިންގާފައި ނުވާތީކަމަށެވެ.

އަދި ކުރިއަށް އޮތް ދުވަސްތަކުގައިވެސް ބަޔަކަށް ސިޔާސީ އަނިޔާއެއް ނުދެއްވާނެ ކަމަށާ، ބަދަލު ހިއްޕެވުމެއްވެސް ނޯންނާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. އެކަމުގެ ބޭނުމަކީ ޤައުމުގައި ހަމަޖެހުން ދެމެހެއްޓުން ކަމުގައި ވަނީ ވިދާޅުވެފައެވެ.

އަޅުގަނޑުމެން ނުހިންގާނަން ބަދަލުހިފާކަށް އެއްވެސް ކަމެއް. ސިޔާސީ ވާދަވެރިކަމުގެ ތެރެއިން އެއްބަޔަކަށް އަނިޔާކޮށް، ސިޔާސީ ވިސްނުމުގެ ތެރެއިން ގެންގޮސް ހައްޔަރުކޮށް ޖަލަށްލާ، އުނދަގޫކޮށް ހެދުމަކީ އަޅުގަނޑު ޤަބޫލުކުރާ ކަމެއް ނޫން.

ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން ޤައުމަށް ތަރައްޤީ ގެނައި ނަމަވެސް ޤައުމުގައި ހަމަޖެހުން ނެތްނަމަ ވާނެ ފައިދާއެއް ނޯންނާނެކަން ފާހަގަކުރައްވަމުން އެ މަނިކުފާނު އެދިލެއްވީ ޤައުމުގައި ހަމަޖެހުން ޤާއިމުކޮށް، ޤައުމު ކުރިއަށް ގެންދިއުމުގައި ހުރިހާ ރައްޔިތުން އެއްބާރުލުން ދެއްވުމަށެވެ.

އަދި ވަށާޖެހޭ ތަރައްޤީއެއް ގެނެސްދެވެން އޮތީ އެ ހަމަޖެހުން ޤައުމުގައި ދެމިއޮވެގެން ކަމަށާއި، އެކަން ވާންއޮތީ ޢުމްރާނީ ތަރައްޤީއާއެކު ވިސްނުމާއި، އަޚުލާޤާއި، މުޖުތަމަޢުގެ އުޅުމާއި ގުޅުންތައް ހެޔޮ މަގުން ތަރައްޤީވެގެން ކަމުގައި ރައީސުލްޖުމްހޫރިއްޔާ ވިދާޅުވިއެވެ. 

އަދި ސިޔާސީ ފަރާތަކުން ކަމުގައިވިޔަސް، ނުވަތަ އެހެން ފަރާތަކުންވިޔަސް މި ހަމަޖެހުން ނަގާލުމުގެ ފުރުޞަތު ނުދެއްވާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އެފަދަ ކަމެއް ކުރުމަށް ބަޔަކު މަސައްކަތްކޮށްފިނަމަ، ޤައުމީ ވިސްނުންފުޅެއްގައި އެކަމެއް ހުއްޓުވައި ޤައުމުގައި ހަމަޖެހުން ޤާއިމުކުރައްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދިވެހި ރައްޔިތުންނަށް ދެއްވާފައެވެ.