Ads by Exprox

ޚަބަރު

ރައީސް ދެއްވީ ރޯދައިގެ ކުރިން ފްލެޓް ލިސްޓު އިޢުލާން ކުރެއްވުމަށް މަަސައްކަތް ކުރައްވާނެ ކަމުގެ ޔަޤީންކަން

ރައީސް ދެއްވީ ރޯދައިގެ ކުރިން ފްލެޓް ލިސްޓު އިޢުލާން ކުރެއްވުމަށް މަަސައްކަތް ކުރައްވާނެ ކަމުގެ ޔަޤީންކަން

ސަރުކާރުން ހުޅުމާލެ ދެވަނަ ފިޔަވަހީގައި ބިނާކުރަމުން ގެންދާ ބައެއް ފްލެޓް ފޮޓޯ:މޯލްޑިވިއަން ޖަރނަލް

އާމިނަތު ޔުމްނާ

އާމިނަތު ޔުމްނާ

09 ޖެނުއަރީ 2025، 02:43

09 ޖެނުއަރީ 2025، 02:43

ގެދޮރުވެރިޔާ ސްކީމުގެ ދަށުން ހުޅުމާލޭގައި އިމާރާތްކުރަމުން އަންނަ 4،000 ފްލެޓަށް ޝަރުތު ހަމަވާ މީހުންގެ ލިސްޓު ކުރިއަށް އޮތް ރޯދަމަހުގެ ކުރިން އާންމުކުރައްވަން މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. މި މަޢުލޫމާތު ރައީސް ދެއްވާފައިވަނީ ހުވަދުއަތޮޅަށް ކުރެއްވި ދަތުރުފުޅުގެ ތެރެއިން ނޫސްވެރިންނަށް ދެއްވި އިންޓަވިއުއެއްގައެވެ.

ރައީސް މުއިއްޒު ވިދާޅުވި ގޮތުގައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މި 4000 ހައުސިންގ ޔުނިޓު ދޫކުރުމުގެ މަސައްކަތް ކުރައްވަމުން ގެންދަވައެވެ. އަދި މިވީ އަހަރެއްހާ ދުވަހުގެ ތެރޭގައި ކުރެވުނު މަސައްކަތް ރިވިއުކުރުމުގެ މަސައްކަތްވެސް ކުރިއަށްދާ ކަމަށް އެމަނިކުފާނު ވިދާޅުވިއެވެ.

މި މަޝްރޫޢުގެ ދަށުން ގޯއްޗާއި ފްލެޓު ޙައްގުގޮތުގައި ލިބިފައިވާ އެއްވެސް ފަރާތެއްގެ އަތުން ގޯއްޗާއި ފްލެޓު އަތުނުލައްވާނެކަމަށް ރައީސް މުއިއްޒު ވަނީ ތަކުރާރުކޮށް ވިދާޅުވެފައެވެ. ނަމަވެސް މަކަރާއި ހީލަތުން އަދި ފޯޖް ޑޮކިއުމަންޓްތަކުގެ ބޭނުންކޮށްގެން ހޯދާފައިވާ ފްލެޓުތަކާއި ގޯތި، އަދި އޭސީސީގެ ތަޙުގީގަށް ހާމަވެފައިވާ ކޮރަޕްޝަންގެ ތެރެއިން ލިބިފައިވާ ގޯއްޗާއި ފްލެޓު މީގެ ތެރެއިން އިސްތިސްނާވާނެ ކަމަށް އެމަނިކުފާނު ވިދާޅުވިއެވެ.

ބޯހިޔާވަހިކަމުގެ މައްސަލައަކީ ރާއްޖޭގައި އޮތް އެންމެ ބޮޑު އިޖުތިމާޢީ މައްސަލަކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ، އެމަނިކުފާނުގެ ބޯހިޔާވަހިކަމުގެ މުހިންމު ހުރިހާ މަޝްރޫޢެއް މިމަހުގެ ތެރޭގައި ޢިއުލާންކުރައްވާ ކޮންޓްރެކްޓަރުން ހޯދުމުގެ މަސައްކަތް ފައްޓަވާނެކަމަށެވެ. މި މަޝްރޫޢުތައް ބޮޑަށް ބައްޓަންކުރައްވާނީ ސަރަޙައްދީ އުސޫލުންކަމަށާއި، މިގޮތަށް ކުރުމުން ޚަރަދު ކުޑަކުރެވޭނެ ކަމަށްވެސް އެމަނިކުފާނު ވިދާޅުވިއެވެ.

ސަރުކާރުންވަނީ ބޯހިޔާވަހިކަމުގެ އެކި މަޝްރޫޢުތަކަށް 1.5 ބިލިއަން ރުފިޔާ ބަޖެޓުގައި ހިމަނާފައެވެ. އަދި އަމިއްލައަށް ގެދޮރު ބިނާކުރުމަށް ބޭނުންވާ ފަރާތްތަކަށް އެހީވުމަށްޓަކައި 1 ބިލިއަން ރުފިޔާގެ ލޯން ސްކީމްތަކެއްވެސް ވަނީ ތަޢާރަފްކުރައްވާފައެވެ.
                    

މި ލިޔުން ކިޔާލުމުން

Ads by MSS