Ads by Exprox

ޚަބަރު

އަމިއްލަ ގޯތީގައި ދިރިއުޅެވޭވަރުގެ ހިޔާވައްސެއް ހެދޭނެކަމުގެ އުއްމީދު ރައީސުލްޖުމްހޫރިއްޔާ ދެއްވައިފި

އަމިއްލަ ގޯތީގައި ދިރިއުޅެވޭވަރުގެ ހިޔާވައްސެއް ހެދޭނެކަމުގެ އުއްމީދު ރައީސުލްޖުމްހޫރިއްޔާ ދެއްވައިފި

ރައީސުލްޖުމްހޫރިއްޔާ މާމެންދޫ ރައްޔިތުންނާ ބައްދަލު ކުރެއްވުން

މިފްތާޙް މުޙައްމަދު

މިފްތާޙް މުޙައްމަދު

09 ޖެނުއަރީ 2025، 03:50

09 ޖެނުއަރީ 2025، 03:50

ހުލާސާ

ފަސް އިންސައްތައަށްވުރެ އިންޓަރެސްޓް ރޭޓު ބޮޑުނުވާގޮތަށް  ގެދޮރުވެރިކަމުގެ ލޯނުތައް ދޫކުރަން ފަށްޓަވާނޭކަން  ރައީސުލްޖުމްހޫރިއްޔާ އިޢުލާންކުރެއްވީ މިދިޔަ އަހަރުގެ މިނިވަންދުވަހު.

ސަރުކާރުގެ އެންމެ އިސް ސިޔާސަތަކީ ރާއްޖޭގެ ބޯހިޔާވަހިކަމުގެ މައްސަލައަށް ހައްލު ހޯދައިދިނުން ކަމަށާއި، އެގޮތުން ރާއްޖޭގެ ކޮންމެ ރަށެއްގައި ހުރި މީހަކު ކަމުގައިވިޔަސް، އެމީހެއްގެ އަމިއްލަ ގޯތި، އުޅެވޭ ވަރުގެ ހިޔާވައްސަކަށް ހެދޭނެކަމުގެ އުންމީދު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ. އެ މަނިކުފާނު މިހެން ވިދާޅުވީ، ހުވަދުއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ގއ. މާމެންދޫ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.

މި މޭރުމުން ވާހަކަފުޅު ކުރިޔަށް ގެންދަވަމުން ރައީސުލްޖުމްހޫރިއްޔާ ވިދާޅުވީ، ބޯހިޔާވަހިކަން ކަށަވަރުކުރުމަށްޓަކައި ސަރުކާރުގެ ހިޔާވެހި ފައިނޭންސް ސްކީމަކީ ރައްޔިތުންނަށް ލިބިފައި އޮތް ރަނުގެ ފުރުޞަތެއްކަމަށެވެ. 

މީގެ އިތުރުން، ރާއްޖޭގެ ބޯހިޔާވަހިކަން ޙައްލު ކުރެވެން ދެން އޮތް ގޮތަކީ ހައުސިންގް މަޝްރޫޢުތައް ހިންގުން ކަމަށާއި، އެގޮތުން ބޯހިޔާވަހިކަމުގެ މަޝްރޫޢުތައް ހިންގުމަށް މި އަހަރުގެ ބަޖެޓުގައި 1.5 ބިލިއަން ރުފިޔާ ހިމަނުއްވާފައި އޮތްކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި މި އަދަދު ކުރިޔަށް އޮތް އަހަރުތަކުގައި އިތުރުކުރައްވައި، އެ މަނިކުފާނުގެ ދައުރުގައި ބޯހިޔާވަހިކަމަށް ޖުމްލަ ހައްލެއް ހޯދައިދެއްވާނެކަމުގައި ވަނީ ވިދާޅުވެފައެވެ. 

މެނިފެސްޓޯގައި ކަނޑައަޅާފައި އޮތްގޮތަށް، ފަސް ޕަސެންޓުގައި، އިކުއިޓީ ބަހައްޓަން ނުޖެހޭ، ވަރަށް ލުއި ލޯން ސްކީމެއް. މި ލޯނު މި ރަށުގެ (މާމެންދޫގެ) ރައްޔިތުންނަށް ވެސް ނެންގެވޭނެ. ނަންގަވައިގެން ތިބޭފުޅުންގެ އަމިއްލަ ގޯތީގައި، އަމިއްލަފުޅަށް ބޭނުންވާ ޑިޒައިނަކަށް އެ ލޯނުގެ ބޭނުންކޮށްގެން ގެ ބިނާކުރެވޭނެ.

ހައުސިން ލޯނަށް އަލިއަޅުވާލައްވައި ރައީސުލްޖުމްހޫރިއްޔާ ވިދާޅުވިއެވެ.

އަދި ހައުސިންގް ޔުނިޓް ނުވަތަ ލޯނު ސްކީމާއި އެނޫންވެސް އެފަދަ މަޝްރޫޢުތަކުގެ ތެރެއިން ކޮންމެ ދިވެހި ރައްޔިތަކީވެސް އެމީހެއްގެ  ފުރަތަމަ ބޯހިޔާވައްސަށް ފުރުޞަތު ލިބިފައި އޮތް ރައްޔިތެއް ކަމުގައި ހެއްދެވުމަށް ވެވަޑައިގެންނެވި ވަޢުދު ފުއްދަވަމުން ގެންދަވާނެ ކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. 

ފަސް އިންސައްތައަށްވުރެ އިންޓަރެސްޓް ރޭޓު ބޮޑުނުވާގޮތަށް  ގެދޮރުވެރިކަމުގެ ލޯނުތައް ދޫކުރަން ފަށްޓަވާނޭކަން  ރައީސުލްޖުމްހޫރިއްޔާ އިޢުލާންކުރެއްވީ މިދިޔަ އަހަރުގެ މިނިވަންދުވަހުއެވެ. އަދި އޭގެ ފަހުން ނޮވެމްބަރު މަހުގައި ވަނީ "ހިޔާވެހި ފައިނޭންސިންގް ޕްރޮގްރާމް" އިފްތިތާޙުކޮށްދެއްވާފައެވެ.

މި ލިޔުން ކިޔާލުމުން

Ads by MSS