ހުވަދު އަތޮޅުގެ 9 ރަށަކަށް ކުރެއްވެވި ދަތުރު ނިންމަވާލެއްވުމަށްފަހު ރައީސުލްޖުމްހޫރިއްޔާ މާލެ ވަޑައިގެންފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހުވަދު އަތޮޅުގެ 9 ރަށަކަށް ކުރެއްވެވި ދަތުރުފުޅު ނިންމަވާލެއްވުމަށްފަހު މިއަދު ހަވީރު މާލެ ވަޑައިގެންފިއެވެ.

މި ދަތުރުފުޅުގައި ރައީސުލްޖުމްހޫރިއްޔާ ވަނީ ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ޒިޔާރަތްކުރައްވާފައެވެ.

އެގޮތުން އެ މަނިކުފާނުވަނީ އެ ރަށްރަށުގެ ރައްޔިތުންނާ ބައްދަލުކުރައްވައި، އެ ރަށްރަށުގައި ހުރި ކަންބޮޑުވުންތަކަށް ހައްލު ހޯއްދެވުމަށް ކުރައްވަމުން ގެންދަވާ މަސައްކަތްތައް ޙިއްސާކުރައްވާފައެވެ. އަދި ރަށްރަށުގެ ތަރައްޤީއަށް ސަރުކާރުން ކުރައްވަމުން ގެންދަވާ މަސައްކަތްތަކުގެ އަދާހަމަ މައުލޫމާތުވެސް ޙިއްސާކޮށްފައިވެއެވެ.

މީގެ އިތުރުން ހޯނޑެއްދޫގައި ކުރިއަށްގެންދިޔަ ފެނާއި ނަރުދަމާގެ ޚިދުމަތް އިފްތިތާޙްކޮށްދީ، ހޯނޑެއްދޫ، ނަޑެއްލާ އަދި ކަނޑުހުޅުދޫގައި ބޭންކް އޮފް މޯލްޑިވްސްގެ އޭޓީއެމް ބެހެއްޓުމަށްޓަކާ، އެ ރަށްރަށުގެ ކައުންސިލްތަކާއި ބީއެމްއެލްއާ ދެމެދު ވެވުނު އެއްބަސްވުމުގައި ސޮއިކުރުމުގެ ރަސްމިއްޔާތުތައް ވެސް ޝަރަފުވެރިކޮށްދެއްވާފައިވެއެވެ.

އަދި ހުވަދު އަތޮޅަކީ މަސްވެރި އަތޮޅެއްކަމުން، މަސްވެރިކަމުގެ ދާއިރާއިން އެމަނިކުފާނު ވެވަޑައިގެންފައިވާ ވަޢުފުދުޅުތައް ފުއްދަވައިދެއްވާ، މަސްވެރިންގެ އަޑު އަހައި، ކަންބޮޑުވުންތަކަށް ހައްލު ހޯއްދަވައިދެއްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.