ޚަބަރު
ރައީސުލްޖުމްހޫރިއްޔާއަށް އެސްޓޯނިއާގެ ރައީސް މަރުހަބާ ދަންނަވައިފި

ރައީސުލްޖުމްހޫރިއްޔާއަށް ޝަރަފުގެ ގާޑު އެރުވުން، ފޮޓޯ: ރައީސް އޮފީސް
ހުލާސާ
މި ޙާއްސަ ރައްމިއްޔާތު ބާއްވާފައިވަނީ އެ ޤައުމުގެ ރިޔާސީ ގަނޑުވަރުގައި.
އެސްޓޯނިއާގެ ރައީސް ޑޮކްޓަރ އަލާރް ކަރިސްގެ ދަޢުވަތަކަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ ޤައުމަށް މިއަދު ވަޑައިގެންނެވުމުން، އެ މަނިކުފާނަށާއި އެ މަނިކުފާނުގެ ވަފުދަށް އެސްޓޯނިއާގެ ރައީސް މަރުޙަބާ ދަންނަވައިފިއެވެ.
ރައީސުލްޖުމްހޫރިއްޔާއަށް މަރުހަބާ ދެންނެވުމަށް އޮތް ޙާއްސަ ރައްމިއްޔާތު ބާއްވާފައިވަނީ އެ ޤައުމުގެ ރިޔާސީ ގަނޑުވަރުގައެވެ.
މި ރަސްމިއްޔާތުގައި ދެ ޤައުމުގެ ޤައުމީ ސަލާމް ކުޅެފައިވެއެވެ. އަދި ދެ ރައީސުންގެ ޝަރަފުގައި އޮތް ޝަރަފްގެ ގާޑް އިންސްޕެކްޓްކޮށްދެއްވީ އެސްޓޯނިއާގެ ރައީސް ޑޮކްޓަރ ކަރިސްއެވެ.
މި ރަސްމިއްޔާތުގައި އެސްޓޯނިއާގެ އިއްޒަތްތެރިން ވަނީ ރައީސުލްޖުމްހޫރިއްޔާއާއި އެ މަނިކުފާނުގެ ވަފުދަށް މަރުޙަބާ ވިދާޅުވެފައެވެ. އަދި ދެ ރައީސުން އެކުގައި ހަނދާނީ ފޮޓޯފުޅެއް ނެންގެވުމަށްފަހު، ގަނޑުވަރުގެ މެހުމާނުން ސޮއިކުރައްވާ ފޮތުގައި ރައީސުލްޖުމްހޫރިއްޔާ ސޮއިކުރެއްވިއެވެ.
ރައީސުލްޖުމްހޫރިއްޔާގެ މި ދަތުރުފުޅުގެ މައިގަނޑު މަޤްސަދަކީ، އެ މަނިކުފާނުގެ ޑިޖިޓަލް ޓްރާންސްފޮމޭޝަންގެ މަގު އެކަށައެޅުމެވެ. މި ކަމަކީ އެ މަނިކުފާނުގެ ވެރިކަމުގައި ހާސިލްކުރެއްވުމަށް އިސްކަން ދެއްވާ މުހިންމުކަމެއް ވެސް މެއެވެ.
މީގެ އިތުރުން މި ދަތުރުފުޅުގައި، ޑިޖިޓަލް، ސައިބަރ އަދި އީ-ގަވަނަންސް، މޫސުމީ ބަދަލު، ތިމާވެށީގެ މައްސަލަތައް އަދި ސައިންސާއި ތަޢުލީމީ ދާއިރާއިން ދެ ޤައުމުން ގުޅިގެން ކުރެވޭނެކަންކަމާމެދު މަޝްވަރާކުރެއްވުމަށް ވަނީ ހަމަޖެހިފައެވެ.
އެސްޓޯނިއާއަކީ މި ދާއިރާއިން ކުރިއަރާފައި އޮތް ޤައުމެކެވެ. އަދި މިއީ އީ-ގަވަނެންސްގައި މުޅި ދުނިޔެއިން މިސާލަކަށްބަލާ މަދު ޤައުމުތަކުގެ ތެރެއިން އެއް ޤައުމެވެ.