ރައީސުލްޖުމްހޫރިއްޔާގެ ޝަރަފުގައި އެސްޓޯނިއާގެ ރައީސް ރަސްމީ ފަރިއްކޮޅެއް ބާއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިއްޔެ ރޭ އެސްޓޯނިއާގެ ރައީސް ޑޮކްޓަރ އަލާރް ކަރިސް ދެއްވި ރަސްމީ ފަރިއްކޮޅުގައި ބައިވެރިވެވަޑައިގެންފިއެވެ. މި ފަރިއްކޮޅު ބޭއްވުނީ ނައިޓްހުޑް ހައުސްގައެވެ.

ފަރިއްކޮޅަށް ވަޑައިގެންނެވުމުން ރައީސް މުޢިއްޒަށް މަރުޙަބާ ދެންނެވީ އެސްޓޯނިއާގެ ރައީސް ޑޮކްޓަރ ކަރިސްއެވެ. ފަރިއްކޮޅު ފެށުމުގެ ކުރިން ދެ ޤައުމުގެ ލީޑަރުން ވަނީ މި ދަތުރުފުޅުގެ މުހިންމުކަމާއި، މުސްތަޤުބަލުގައި ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމުގެ އުންމީދު ފާޅުކުރައްވާފައެވެ.

ރައީސް މުޢިއްޒު ދެއްކެވި ވާހަކަފުޅުގައި، މި ދަތުރުފުޅަކީ ދިވެހިރާއްޖޭގެ އެންމެ މަތީ ވެރިޔަކު އެސްޓޯނިއާއަށް ކުރައްވާ ތާރީޚީ އެންމެ ފުރަތަމަ ދަތުރުފުޅުކަން ފާހަގަކުރެއްވިއެވެ. އަދި މި ދަތުރުފުޅުން ރަމްޒުކޮށްދެނީ ދެ ޤައުމުގެ ގުޅުން އިތުރަށް ބަދަހިކުރުމަށް އޮތް އެއްގޮތް ވިސްނުމާއި ސަމާލުކަން ކަމުގައި ވިދާޅުވިއެވެ.

ރައީސް މުޢިއްޒު އެސްޓޯނިއާގެ ޑިޖިޓަލް ޓްރާންސްފޮމޭޝަނާއި އިނޮވޭޝަންގެ ދާއިރާއިން ހޯދާފައިވާ ކުރިއެރުންތައް ތަޢުރީފުކުރެއްވިއެވެ. އަދި އެސްޓޯނިއާގެ ތަޖުރިބާއިން އިބުރަތް ލިބިގަތުމަށް ޝައުޤުވެރިކަން ފާޅުކުރެއްވިއެވެ.

ރައީސް މުޢިއްޒު ވާހަކަފުޅު ނިންމަވާލެއްވީ ދިވެހިރާއްޖެއާއި އެސްޓޯނިއާއާ ދެމެދު ގުޅުން އިތުރަށް ބަދަހިކުރުމުގެ އަޒުމު އައުކުރައްވަމުންނެވެ. އަދި ދެ ޤައުމު އޮތީ އެކުގައި މަސައްކަތްކުރުމުގެ އައު ބާބެއްގެ ފެށުމުގައި ކަމަށާއި، މި ގުޅުމަކީ އެއްބައިވަންތަކަމުގެ އަސާސްތަކެއްގެ މައްޗަށް ބިނާވެފައިވާ، ދެމެހެއްޓެނިވި އުޖާލާ މުސްތަޤުބަލަކަށް މަގުފަހިކުރާނެ ގުޅުމެއް ކަމުގައި ވިދާޅުވިއެވެ.