އެސްޓޯނިއާގެ މިނިސްޓަރ އޮފް އެޑިއުކޭޝަން އެންޑް ރީސަރޗް، ރައީސުލްޖުމްހޫރިއްޔާގެ އަރިހަށް އިޙްތިރާމުގެ ޒިޔާރަތެއް ކުރައްވައިފި

އެސްޓޯނިއާގެ މިނިސްޓަރ އޮފް އެޑިއުކޭޝަން އެންޑް ރީސަރޗް، ކްރިސްޓީނާ ކެލަސް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އަރިހަށް އިޙްތިރާމުގެ ޒިޔާރަތެއް ކުރައްވައިފިއެވެ. އެސްޓޯނިޔާގެ މިނިސްޓްރީ އޮފް އެޑިއުކޭޝަން އެންޑް ރީސަރޗްގައި ކުރިއަށްދިޔަ މި ބައްދަލުކުރެއްވުމުގައި ދެ ޤައުމުގެ ތަޢުލީމީ ދާއިރާގެ ގުޅުން ބަދަހިކުރުމަށް މަޝްވަރާކުރެވުނެވެ.

ބައްދަލުވުމުގައި ރައީސް މުޢިއްޒު ވަނީ އެސްޓޯނިއާގެ ފެންވަރު ރަނގަޅު ތަޢުލީމީ ނިޒާމާއި، އުނގެނުމުގައި ގެންގުޅޭ އީޖާދީ އުކުޅުތަކަށް ތަޢުރީފުކުރައްވާފައެވެ. އަދި އެ ޤައުމުގެ ކާމިޔާބީން ހިތްވަރު ހޯއްދަވައިގެން، ދިވެހިރާއްޖޭގެ ތަޢުލީމީ ނިޒާމު ފުޅާކުރެއްވުމަށް ޝައުޤުވެރިކަން ފާޅުކުރެއްވިއެވެ.

މިނިސްޓަރ ކެލަސް ވަނީ އެސްޓޯނިއާގެ ތަޢުލީމީ ނިޒާމާ ގުޅޭ ތަފްޞީލީ ޕްރެސެންޓޭޝަނެއް ހުށަހަޅުއްވައި، އެ ނިޒާމުގެ މުހިންމު ސިފަތަކާއި، ބަދަލުގެނުވަނިވި އާދަކާދަތައް ހިއްސާކުރައްވާފައެވެ. އަދި އެސްޓޯނިއާގެ ތަޢުލީމީ އިސްތިރާޖުތަކާ ގުޅޭ މުހިންމު މަޢުލޫމާތުތަކެއްވެސް ދެއްވިއެވެ.

ރައީސް މުޢިއްޒު ވަނީ ދިވެހި ޒުވާނުންނަށް ހުރި ތަޢުލީމީ ފުރުޞަތުތައް ފުޅާކުރުމުގެ މުހިންމުކަން ފާހަގަކުރައްވާފައެވެ. މި ގޮތުން، އެސްޓޯނިއާގައި ދިވެހި ދަރިވަރުންނަށް ހުރި ސްކޮލަޝިޕްގެ ފުރުސަތުތަކާއި، އެހެނިހެން އެހީތެރިކަމާ ބެހޭގޮތުން މަޝްވަރާކުރެވުނެވެ.

ދެ ޤައުމުގެ މެދުގައި ޢިލްމީ ކުރިއެރުންތައް ހިއްސާކުރުމާއި، ޤާބިލްކަން އިތުރުކުރުމާއި، އަދި ތަޢުލީމީ ދާއިރާއިން ގުޅުން ޤާއިމުކުރުމުގެ މުހިންމުކަމަށް ދެ ފަރާތުންވެސް އަލިއަޅުވާލެވުނެވެ. އަދި އިޖާދީ އުފެއްދުންތެރިކަމާއި ތަޢުލީމު މެދުވެރިކޮށް، ދެ ޤައުމުގެ ގުޅުން ހަރުދަނާ ކުރުމަށް އެއްބަސްވެވުނެވެ.

މި ބައްދަލުވުމަކީ މުސްތަޤުބަލުގައި ދެ ޤައުމުގެ މެދުގައި ތަޢުލީމީ ދާއިރާއިން އިތުރު އެއްބާރުލުން ހޯދުމަށް މަގުފަހިކޮށްދޭނެ ފުރުޞަތެއްކަމަށް ދެ ފަރާތުންވެސް ދެކެވަޑައިގަންނަވައެވެ.