އެސްޓޯނިއާގައި ދިވެހި ދަރިވަރުންނަށް ހުރި ސްކޮލަޝިޕްގެ ފުރުޞަތުތަކާ ގުޅޭގޮތުން ރައީސް މުޢިއްޒު މަޝްވަރާކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު އެސްޓޯނިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން، އެ ޤައުމުގެ މިނިސްޓަރ އޮފް އެޑިއުކޭޝަން އެންޑް ރީސަރޗް، ކްރިސްޓީނާ ކެލަސްއާ ބައްދަލުކުރައްވައި، އެސްޓޯނިއާގައި ދިވެހި ދަރިވަރުންނަށް ހުރި ސްކޮލަޝިޕްގެ ފުރުޞަތުތަކާ ގުޅޭގޮތުން މަޝްވަރާކުރައްވައިފިއެވެ.

އެސްޓޯނިޔާގެ މިނިސްޓްރީ އޮފް އެޑިއުކޭޝަން އެންޑް ރީސަރޗްގައި އިއްޔެ ކުރިއަށްދިޔަ މި ބައްދަލުކުރެއްވުމުގައި ރައީސް މުޢިއްޒު ވަނީ، އެސްޓޯނިއާގެ ފެންވަރު ރަނގަޅު ތަޢުލީމީ ނިޒާމާއި، އުނގެނުމުގައި ގެންގުޅޭ އީޖާދީ އުކުޅުތަކަށް ތަޢުރީފުކުރައްވާފައެވެ. އަދި އެސްޓޯނިއާގެ ކާމިޔާބީން ހިތްވަރު ހޯއްދަވައިގެން، ރާއްޖޭގެ ތަޢުލީމީ ނިޒާމު ފުޅާކުރެއްވުމަށް އެމަނިކުފާނު ޝައުޤުވެރިކަން ފާޅުކުރެއްވިއެވެ.

މި ބައްދަލުކުރެއްވުމުގައި މިނިސްޓަރ ކެލަސް ވަނީ، އެސްޓޯނިއާގެ ތަޢުލީމީ ނިޒާމާ ގުޅުންހުރި ތަފްސީލީ ޕްރެސެންޓޭޝަނެއް ހުށަހަޅުއްވައި، އެ ނިޒާމުގެ މުހިންމު ސިފަތަކާއި، ބަދަލުގެނުވަނިވި އާދަކާދަތައް ހިއްސާކުރައްވާފައެވެ. އަދި އެސްޓޯނިއާގެ ތަޢުލީމީ އިސްތިރާޖުތަކާ ގުޅުންހުރި މުހިންމު މަޢުލޫމާތުތަކެއްވެސް ދެއްވާފައިވެއެވެ.

ރައީސް މުޢިއްޒު ވަނީ، ދިވެހި ޒުވާނުންނަށް ހުރި ތަޢުލީމީ ފުރުޞަތުތައް ފުޅާކުރުމުގެ މުހިންމުކަން މި ބައްދަލުކުރެއްވުމުގައި ފާޅުކުރައްވާފައެވެ. އެގޮތުން، އެސްޓޯނިއާގައި ދިވެހި ދަރިވަރުންނަށް ހުރި ސްކޮލަޝިޕްގެ ފުރުސަތުތަކާއި، އެނޫންވެސް، ކަންކަމުގައި އެއްބާރުލެއްވުން ދެއްވުމާމެދު މަޝްވަރާކުރައްވާފައިވެއެވެ.

މީގެއިތުރުން، ދެ ޤައުމުން ޢިލްމީ ކުރިއެރުންތައް ހިއްސާކުރުމާއި، ޤާބިލްކަން އިތުރުކުރުމާއި، އެ ނޫންވެސް ތައުލީމީ ދާއިރާއިން ގުޅުން ޤާއިމުކުރުމުގެ މައްޗަށް ދެ ބޭފުޅުން ވަނީ އަލިއަޅުއްވާލައްވާފައެވެ. އަދި އިޖާދީ އުފެއްދުންތެރިކަމާއި ތަޢުލީމު މެދުވެރިކޮށް، ދެ ޤައުމުގެ ގުޅުން ހަރުދަނާ ކުރައްވާނޭކަމުގެ ޔަޤީންކަން ދެއްވާފައިވެއެވެ.

މި ބައްދަލުކުރެއްވުމަކީ މުސްތަޤުބަލުގައި ދެ ޤައުމުގެ މެދުގައި ތަޢުލީމީ ދާއިރާއިން ކުރެވިދާނޭ މަސައްކަތްތަކުގެ ބިންގާކަމުގައި ދެބޭފުޅުންވެސް އެއްބަސްވެވަޑައިގެންނެވިއެވެ.

މި ބައްދަލުވުމުގައި ރައީސް މުޢިއްޒު ވަނީ، ދިވެހިރާއްޖޭގެ ތަޢުލީމީ ނިޒާމު ތަރައްޤީކުރުމުގައި އެސްޓޯނިއާގެ ތަޖުރިބާއިން އެހީތެރިކަން ހޯދުމަށް ޝައުޤުވެރިކަން ފާޅުކުރައްވާފައެވެ. ޚާއްޞަކޮށް، ޑިޖިޓަލް ޓެކްނޮލޮޖީ ބޭނުންކޮށްގެން ތަޢުލީމު ދިނުމުގައި އެސްޓޯނިއާއިން ހޯދާފައިވާ ކާމިޔާބީތަކުގެ މައްޗަށް އަލިއަޅުވާލައްވާފައިވެއެވެ.

މިނިސްޓަރ ކެލަސް ވަނީ، އެސްޓޯނިއާގެ ތަޢުލީމީ ނިޒާމުގެ މައިގަނޑު ސިފަތަކުގެ ތެރޭގައި ހިމެނޭ ހަމަހަމަކަމާއި، އުފެއްދުންތެރިކަމާއި، އަދި ދަރިވަރު-މައްޗަށް އަމާޒުކުރެވިފައިވާ އުނގެނުމުގެ މުހިންމުކަން ފާހަގަކުރައްވާފައެވެ. އަދި މި ކަންކަމަކީ ދިވެހިރާއްޖޭގެ ތަޢުލީމީ ނިޒާމަށްވެސް ފައިދާހުރި ކަންކަން ކަމުަންކަން ކަމުގައި ވިދާޅުވެފައިވެއެވެ.

ދެ ޤައުމުގެ މެދުގައި ތަޢުލީމީ ދާއިރާއިން އިތުރު ގުޅުން ބަދަހިކުރުމަށްޓަކައި، ދަރިވަރުންނާއި މުދައްރިސުން ބަދަލުކުރުމުގެ ޕްރޮގްރާމްތައް ހިންގުމާއި، ސައިންސާއި ޓެކްނޮލޮޖީގެ ދާއިރާއިން ގުޅިގެން ދިރާސާތައް ކުރިއަށް ގެންދިއުމާ ގުޅޭގޮތުން ވެސް މި ބައްދަލުވުމުގައި މަޝްވަރާކުރެވުނެވެ.

ރައީސް މުޢިއްޒު ވަނީ، އެސްޓޯނިއާގެ މަތީ ތަޢުލީމުގެ މުއައްސަސާތަކުގައި ދިވެހި ދަރިވަރުންނަށް ކިޔެވުމުގެ ފުރުޞަތު ހޯދައިދިނުމަށް އެދިވަޑައިގެންފައެވެ. އަދި މިކަމަށް މިނިސްޓަރ ކެލަސް ވަނީ އެއްބާރުލުން ދެއްވާނެކަމުގެ ޔަޤީންކަން ދެއްވާފައެވެ.

މި ބައްދަލުވުމުގެ ނިމުމުގައި، ދެ ޤައުމުގެ މެދުގައި ތަޢުލީމީ ދާއިރާއިން އެއްބާރުލުން އިތުރުކުރުމަށް މަގުފަހިކުރާނެ އެއްބަސްވުމެއްގައި ސޮއިކުރުމަށް ދެ ފަރާތުންވެސް އެއްބަސްވެވަޑައިގެންނެވިއެވެ. މި އެއްބަސްވުމުގެ ދަށުން، ސްކޮލަޝިޕްތަކާއި، ތަމްރީނު ޕްރޮގްރާމްތަކާއި، އަދި ޓެކްނިކަލް އެހީތެރިކަން ފޯރުކޮށްދިނުމުގެ ކަންކަން ހިމެނޭނެއެވެ.

ރައީސް މުޢިއްޒުގެ މި ދަތުރުފުޅަކީ،  ދިވެހިރާއްޖޭގެ ތަޢުލީމީ ނިޒާމު ހަރުދަނާކުރުމަށާއި، ބައިނަލްއަޤްވާމީ ފެންވަރުގައި ރާއްޖޭގެ ދަރިވަރުންނަށް އިތުރު ފުރުޞަތުތައް ހޯދައިދިނުމަށް އެޅޭ މުހިންމު ފިޔަވަޅެކެވެ. މި ބައްދަލުވުމުގެ ނަތީޖާއެއްގެ ގޮތުން، ކުރިއަށް އޮތް ތަނުގައި ދިވެހި ދަރިވަރުންނަށް އެސްޓޯނިއާގައި މަތީ ތަޢުލީމު ހާސިލުކުރުމުގެ އިތުރު ފުރުޞަތުތަކެއް ލިބިގެންދާނެ ކަމަށް އުންމީދުކުރެވެއެވެ.