އެސްޓޯނިއާ ސަރުކާރުން ރައީސުލްޖުމްހޫރިއްޔާއަށް ދެއްވި ހޫނު މަރުޙަބާއާއި މެހެމާންދާރީއަށް ޝުކުރު އަދާކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެސްޓޯނިއާއަށް ކުރައްވަމުންދާ ތާރީޚީ ދަތުރުފުޅުގައި، އެޤައުމުގެ ސަރުކާރުން ދެއްވި ހޫނު މަރުޙަބާއާއި މެހެމާންދާރީއަށް ޝުކުރު އަދާކުރައްވައިފިއެވެ. މީސްމީޑިއާގައި ކުރެއްވި ޕޯސްޓެއްގައި އެމަނިކްފާން ވަނީ މިކަން ހާމަކުރައްވާފައެވެ.

ރައީސް މުޢިއްޒު ވިދާޅުވި ގޮތުގައި، އެސްޓޯނިއާގެ ރައީސް އަލަރ ކާރިސްއާއި އެކު ބޭއްވެވި ބައްދަލުވުމުގައި ދެޤައުމުގެ ދެމެދުގައި އޮތް ގުޅުން އިތުރަށް ހަރުދަނާކުރުމާ ގުޅޭގޮތުން މަޝްވަރާކުރެވުނެވެ. މީގެ އިތުރުން، ޑިޖިޓަލް ޓްރާންސްފޯމޭޝަން، ސައިބަރ ސެކިއުރިޓީ، މޫސުމަށް އަންނަ ބަދަލުތަކާއި ތަޢުލީމީ ދާއިރާއާ ގުޅޭގޮތުން ވެސް ވާހަކަދެކެވުނު ކަމަށް ރައީސް ފާހަގަކުރެއްވިއެވެ.

ދިވެހިރާއްޖެ އާއި އެސްޓޯނިއާ ފަދަ ކުދި ޤައުމުތަކުގެ މެދުގައި އެއްބައިވަންތަކަން އޮތުމަކީ، އެޤައުމުތަކުގެ ސަލާމަތާއި މިނިވަންކަން ދެމެހެއްޓުމަށް މުހިންމު ކަމެއްކަމަށް ރައީސް މުޢިއްޒު ވިދާޅުވިއެވެ. އަދި މިކަމަކީ ދުނިޔޭގެ ސުލްޙައާއި ދެމެހެއްޓެނިވި ތަރައްޤީއަށް ވެސް މުހިންމު ކަމެއްކަމަށް ރައީސް ފާހަގަކުރެއްވިއެވެ.

Thank you, President @AlarKaris and the Government of Estonia, for the kind invitation to me to undertake this historic visit to your beautiful country. The warm hospitality and heartfelt welcome I received since my arrival have been excellent. It is indeed an honor to be here.… pic.twitter.com/ERqJvI1t9t

— Dr Mohamed Muizzu (@MMuizzu) January 14, 2025

މި ދަތުރުފުޅަކީ ދިވެހި ރައީސަކު އެސްޓޯނިއާއަށް ކުރައްވާ ފުރަތަމަ ދަތުރުފުޅު ކަމަށްވާތީ، މިއީ ތާރީޚީ ދަތުރުފުޅެއް ކަމުގައި ރައީސް މުޢިއްޒު ސިފަކުރެއްވިއެވެ. އަދި ކުރިއަށް އޮތް ތަނުގައި ދެޤައުމުގެ މެދުގައި އިތުރު ގުޅުންތައް ޤާއިމުކުރެވި، އެކުގައި ކުރިއަށް ދިއުމަށް މަގުފަހިވާނެ ކަމުގެ އުންމީދު ފާޅުކުރެއްވިއެވެ.