އެސްޓޯނިއާގެ ޤާނޫނު ހަދާ މަޖިލީހުގެ ރައީސް ދެއްވެވި ފަރިކޮޅެއްގައި ރައީސުލްޖުމްހޫރިއްޔާ ބައިވެރިވެވަޑައިގެންފި

އެސްޓޯނިއާގެ ޤާނޫނު ހަދާ މަޖިލީހުގެ ރައީސް ލޯރީ ހުއްސާރު ދެއްވެވި ފަރިކޮޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބައިވެރިވެވަޑައިގެންފިއެވެ. 

އެސްޓޯނިއާގެ ޤާނޫނު ހަދާ މަޖިލިސް، ރިގިކޮގޫއަށް ރައީސުލްޖުމްހޫރިއްޔާ ކުރެއްވެވި މި ތާރީޙީ ޒިޔާރަތުގައި އެ މަނިކުފާނު ވަނީ ޤާނޫނު ހަދާ މަޖިލީހުގެ މެހުމާނުން ސޮއިކުރައްވާ ފޮތުގައި ސޮއިކުރައްވާފައެވެ. 

ފަރިއްކޮޅުގައި ދެ ބޭފުޅުން ވަނީ ގިނަ ކަންތައްތަކާ ގުޅޭ ގޮތުން މަޝްވަރާކުރައްވާފައެވެ. އެގޮތުން ދެ ޤައުމުގެ ގުޅުންބަދަހިކުރުމާއި، ދެ ޤައުމުން ގުޅިގެން ކުރެވެންހުރި ކަންކަމަށް އަލިއަޅުވާލެއްވެވިއެވެ.

އަދި މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ އެ މަނިކުފާނު ރާއްޖެ ތަރައްޤީ ކުރެއްވުމަށް ގެންގުޅުއްވާ ތަޞައްވުރު ވެސް ޙިއްސާކޮށްފައެވެ. ރައީސުލްޖުމްހޫރިއްޔާ ވިދާޅުވީ، ރާއްޖޭގެ އާންމު ޚިދުމަތްތައް ހަރުދަނާ ކުރުމަށް އެ މަނިކުފާނު ނުހަނު އިސްކަމެއްދެއްވާ ކަމަށެވެ. 

މި ބައްދަލުކުރެއްވުމުގައި އެސްޓޯނިއާގެ މަޖިލީހުގެ ރައީސް ހުއްސާރު ވަނީ، އީ ގަވަނެންސް ދާއިރާއިން އެ ޤައުމު ހޯދާފައިވާ ކާމިޔާބީތަކާ ގުޅޭ ގޮތުން އެ މަނިކުފާނުގެ ވިސްނުންފުޅު ޙިއްސާކުރައްވާފައެވެ. 

މީގެ އިތުރުން، ބައިނަލްއަޤްވާމީ ސުލްހަ މަސަލަސްކަމާ، ސަލާމަތާ ގުޅޭ ގޮތުން ވެސް މަޝްވަރާކުރައްވާފައި ވެއެވެ. އަދި ބައިނަލްއަޤަވާމީ މައިދާނުގައި ދެ ޤައުމުން ގުޅިގެން މަސައްކަތް ކުރެއްވުމުގެ އަޒުމު އައުކުރައްވާފައިވެއެވެ.