ޚަބަރު
ރައީސުލްޖުމްހޫރިއްޔާއަށް އެސްޓޯނިއާގެ ތާރީޚާއި ޘަޤާފަތާއި އާދަކާދަތައް ދައްކާލައިފި

ރައީސުލްޖުމްހޫރިއްޔާ އެސްޓޯނިއާގެ ޤައުމީ ދާރުލްއާސާރަށް ޒިޔާރަތްކުރެއްވުން، ފޮޓޯ: ރައީސް އޮފީސް

ފަރުދުން
16 ޖެނުއަރީ 2025، 08:02
16 ޖެނުއަރީ 2025، 08:02
ހުލާސާ
މި ޒިޔާރަތުގައި އެސްޓޯނިއާގެ ތާރީޙާއި ގުޅިފައި އޮތް ގިނަ ކަންތައްތަކެއް ވަނީ ދައްކާލާފައި.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އެ ޤައުމުގެ ޓާރްޓޫގައި ހުންނަ ޤައުމީ ދާރުލްއާސާރަށް ވަޑައިގެންފިއެވެ. މި ދާރުލްއާސަރަށް ވަނީ އީސްޓީ ރާހްވާ މޫސިއަމްގެ ނަމުން ނަންދީފައެވެ.
ޤައުމީ ދާރުލްއާސާރަށް ވަޑައިގެންނެވުމުން ރައީސުލްޖުމްހޫރިއްޔާއަށް މަރުހަބާ ވިދާޅުވީ، ދާރުލްއާސާރުގެ ޑިރެކްޓަރ ޑޮކްޓަރ ކޭޓޫ ސަކްސްއެވެ.
މި ޒިޔާރަތުގައި ރައީސުލްޖުމްހޫރިއްޔާ ވަނީ، އެ ދާރުލްއާސާރުގެ "އެންކައުންޓަރސް" މަޢުރަޒު ވެސް ބައްލަވާލައްވާފައިވެއެވެ. އަދި އެއަށްފަހު މެހެމާނުން ސޮއިކުރައްވާ ފޮތުގައި ސޮއިކުރެއްވެވިއެވެ.
އެސްޓޯނިއާގެ ޤައުމީ ދާރުލްއާސާރަށް މި ކުރެއްވެވި ޒިޔާރަތުގައި، އެ ޤައުމުގެ ތާރީޚާއި ޘަޤާފަތާއި އާދަކާދަތައް ރައީސުލްޖުމްހޫރިއްޔާއަށް ދައްކާލާފައިވެއެވެ. އަދި މީގެ އިތުރުން، އެ ޤައުމުގެ އެވޭލާ ތާރީޚާއި، ޒަމާނީ އިޖުތިމާޢީ ކުރިއެރުންތަކާއި، އިޖުތިމާޢީ ޝަޚްޞާއި، ތަރިކަ އަދި ފަންނިންޔާތުގެ ތަރައްޤީއާއެކު، އެސްޓޯނިއާގެ ތާރީޙާއި ގުޅިފައި އޮތް ގިނަ ކަންތައްތަކެއް ވަނީ ދައްކާލާފައެވެ.
އެސްޓޯނިއާގެ ދަތުރުފުޅުގެ ތެރެއިން އެ ޤައުމުގެ ޓާރްޓޫ ސިޓީއަށް މި ކުރައްވާ ޒިޔާރަތުގައި އެމަނިކުފާނު އަދި އެސްޓޯނިއަން ބަޔޯބޭންކަށް ވެސް ޒިޔާރަތްކުރައްވާނެއެވެ.