ހަމަލާތަކުގެ ސަބަބުން ފަލަސްޠީނުގެ ރައްޔިތުންނަށް ލިބުނު ގެއްލުންތަކުގެ ބަދަލު ދޭންޖެހޭ: ރައީސުލްޖުމްހޫރިއްޔާ

އިސްރޭލުން ފަލަސްޠީނުގެ ޣައްޒާއަށް ދީފައިވާ ލާއިންސާނީ ހަމަލާތަކުގެ ސަބަބުން އެ ގައުމުގެ ރައްޔިތުންނަށް ލިބުނު ގެއްލުމުގެ ބަދަލުދޭންޖެހޭނެ ކަމުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، ޣައްޒާއަށް ދެމުންގެންދާ ހަމަލާތައް ހުއްޓާލުމަށް ހަމާސް އާއި އިޒްރޭލާ ދެމެދު އެއްބަސްވެފައިވުމާ ގުޅިގެން، 'އެކްސް'ގައި ކުރެއްވެވި ޕޯސްޓެއްގައެވެ.

މީގެ އިތުރުން އެމަނިކުފާނު ގޮވާލެއްވީ، އެއްބަސްވެވުނު ގޮތަށް ކަންކަން ކުރިޔަށް ގެންދިއުމަށާއި، ގެދޮރު ގެއްލިފައިވާ މީހުންނަށް އެމީހުންގެ ވަޒަން އަނބުރާ ހޯދައިދިނުމަށާއި އަދި އިންސާނީ އެހީއަށް ފުރުޞަތު ދިނުމަށެވެ. 

އަދި އިޒްރޭލުން ދިން ހަމަލާތަކާ ގުޅިގެން ސުންނާފަތިވެފައިވާ ފަލަސްޠީނުގެ އިމާރާތްތަކާއި ބިނާރު އަލުން އާރާސްތުކުރުމަށް ބޭނުންވާ އަވަސް އެހީ ފަލަސްޠީނަށް ފޯރުކޮށްދިނުމަށް ވެސް ބައިނަލްއަޤުވާމީ މުޖުތަމަޢުއަށް އެމަނިކުފާނު ގޮވާލެއްވިއެވެ.

ރައީސުލްޖުމްހޫރިއްޔާ 'އެކްސް'ގައި ކުރެއްވި ޕޯސްޓުގައި ޣައްޒާއަށް ދޭ ހަމަލާތައް މެދުކަނޑާލަން ނިންމުމަށް މެދުވެރިވެދިން ފަރާތްތަކުން ކުރި މަސައްކަތް ފާހަގަ ކުރައްވައި، އެ ފަރާތްތަކުގެ އަގު ވަޒަންކުރައްވާ ކަމުގައި ވެސް ވަނީ ވިދާޅުވެފައެވެ.

އަދި އެ މަނިކުފާނު މިކަން ސިފަކުރެއްވީ، ހިތްފުޅަށް ލިބިވަޑައިގެން ހިތްހަމަޖެހުމެއްގެ ގޮތުގައެވެ.

We are relieved to hear that a ceasefire deal has been reached after 15 months of genocidal war in Gaza.

The Maldives expresses its profound appreciation to the countries that have facilitated this agreement.

We urge the international community to ensure the continuation of…

— Dr Mohamed Muizzu (@MMuizzu) January 15, 2025

މި ހަނގުރާމަ ފެށީއްސުރެން ދިވެހިރާއްޖެއިން ދިޔައީ މިކަން ކުށްވެރިކޮށް، ބައިނަލްއަޤުވާމީ އެކި މަންސަތަކުގައި ފަލަސްޠީނުގެ އުޚުއްވަތްތެރި ރައްޔިތުންގެ ޙައްޤުގައި ގިނަ މަސައްކަތްތަކެއް ކުރަމުންނެވެ.

އެގޮތުން އ.ދ.ގެ ސަލާމާތީ މަޖިލީހުގައި ރައީސުލްޖުމްހޫރިއްޔާ ގޮވާލައްވާފައިވަނީ، ޤައުމަކުން އިންސާނީ ޙައްޤުތަކަށް އަރައިގަންނަ ހިނދު، އެކަން ތަޙައްމަލުކޮށްގެން ނުތިބުމަށެވެ. އަދި އެފަދަ ޙާލަތެއްގައި، އެ ޤައުމެއްގެ ކުޑަބޮޑު މިނަކީ ނުވަތަ އެ ޤައުމެއްގެ މުއްސަނދިކަމަކީ ބަހަނާއަކަށް ވެގެން ނުވާނޭކަމަށްވެސް ރައީސުލްޖުމްހޫރިއްޔާ ވިދާޅުވެފައިވެއެވެ.